Yendá Jesús ne ca discípulo stiʼ Betsaida. Laga nuube raqué, bedané ca binni que ti hombre ciegu ra nuube ne canabaʼ ca binni que laabe cánabe hombre que ti guianda.

Gunaaze Jesús náʼ hombre que ne guleebe laa fuera de guidxihuiiniʼ que. Despué bichá xhínnibe guié lú ne gunabadiidxabe laa: «¿Cayuuyaluʼ xiixa la?». Para bicabi hombre que: «Cayuuyaʼ binni, peru ruluíʼcabe yaga ni zizá» (Marcos 8:23, 24). De raqué, gudixhenáʼ Jesús lú hombre que sti biaje ne bianda chaahuiʼ lú. Óraque biseendabe laa ra lidxi peru maʼ bianda ne gúdxibe laa cadi guiuu ndaaniʼ guidxihuiiniʼ que.

Despué biree Jesús ne ca discípulo stiʼ zecaʼ neza guiaʼ, región stiʼ Cesarea de Filipo. Naquiiñeʼ sácabe ne quíbacabe biaʼ 40 kilómetru. Riaana guidxi que 350 metru luguiáʼ de nivel stiʼ nisadóʼ ne ladu noreste de guidxi que rihuinni ca hielu ni nuu ique dani Hermón. Zándaca biaʼ chupa chonna gubidxa zandaa para chindácabe guidxi riʼ.

Neza zécabe que, bireechú Jesús para guni orar. Cayaadxaʼ biaʼ gaʼ o chii beeu para guuticabe Jesús ne nuu xizaa pur ca discípulo stiʼ. Stale xpínnibe maʼ bisaanacaʼ laabe ne xcaadxi binni cadi cayene xii ngue cayuni Jesús ne nápacaʼ duda. Zándaca canabadiidxacaʼ xiñee qué niná Jesús ñúnicabe laa rey ne xiñee qué nudii laacabe ti señal para ñánnacaʼ tuu peʼ ngue laabe.

Ora guyé ca discípulo que ra cayuni orar Jesús, gunabadiidxabe laacaʼ: «Según ni riníʼ binni, ¿tuu nga Xiiñiʼ Hombre?». Para bicábicaʼ laabe: «Nuu tu ná laabe nga Juan Bautista. Xcaadxi ná laabe nga Elías. Ne xcaadxi ná laabe nga Jeremías o tobi de ca profeta». Ngue runi riníʼ ique binni naca Jesús ti profeta ni biasa lade gueʼtuʼ. Ne para guʼyaʼ Jesús xi riníʼ ique ca discípulo stiʼ, gúdxibe laacaʼ: «Yanna, ¿para laatu ya? ¿Tuu nga naa?». Óraque bicabi Simón Pedro laabe: «Lii nga Cristu, Xiiñiʼ Dios ni nabani» (Mateo 16:13-16).

Gudxi Jesús Pedro chuʼ nayecheʼ purtiʼ Dios nga bisiéneni laa, ne laaca guníʼ Jesús: «Ne laaca cayabeʼ lii: lii nga Pedro, ne lu guié riʼ chigucueeʼ congregación stinneʼ, ne ca puertaʼ stiʼ Baʼ qué zanda guxhiá ni». Ni nuu Jesús guiníʼ nga laa nga chigucuí ti congregación, ne pa gaca ca xpínnibe fiel dede dxi gáticaʼ la? zusibánibe laacaʼ sti biaje. Ne gúdxibe Pedro: «Zudieeʼ lii ca llave stiʼ Reinu ni nuu guibáʼ» (Mateo 16:18, 19).

Peru cadi caníʼ diʼ Jesús jma risaca Pedro lade guiráʼ apóstol ne qué nibibe laa para gaca base stiʼ congregación. Jesús nga Guié ra chití congregación ca (1 Corintios 3:11; Efesios 2:20). Zacaa Pedro chonna llave. Zápabe ti dxiiñaʼ nabé risaca, zacanebe chuʼ binni de gadxé gadxé grupu lu Reinu stiʼ Dios ni nuu guibáʼ.

Zaquiiñeʼ Pedro primé llave riʼ lu Pentecostés  de iza 33, ora guluiʼbe ca judíu ne ca binni ni guyuu lu religión stiʼ ca judíu ni maʼ guca arrepentir, xi naquiiñeʼ gúnicaʼ para guilacaʼ. Zaquiiñebe guiropa llave ca para gapa ca samaritanu ni gapa fe, oportunidad de chuʼ lu Reinu stiʼ Dios. Ne guionna llave ca zaquiiñebe ni lu iza 36, para gapa ca ni cadi naca judíu oportunidad de chuʼ lu Reinu stiʼ Dios, casi Cornelio, ca pariente stiʼ ne ca ni jma xhamigu (Hechos 2:37, 38; 8:14-17; 10:44-48).

Laga caniʼné ca apóstol que Jesús, nabé triste guyuucaʼ ora binadiágacaʼ guníʼ Jesús maʼ cadi candaa zuninácabe ne zuuticabe laa Jerusalén. Cumu cadi cayene Pedro zabiguetaʼ ziasa Jesús de lade gueʼtuʼ ne zabiguetaʼ guibáʼ, ngue runi yenebe Jesús ti ladu ne gudindenebe laa: «¡Biá lii, Señor! Qué ziuu dxi guizaacaluʼ nga». Peru bidxiideche Jesús Pedro ne gudxi laabe: «¡Guyuu neza decheʼ, Binidxabaʼ! Cuchiiñaluʼ lu neza stinneʼ, purtiʼ cadi caníʼ íqueluʼ casi riníʼ ique Dios, sínuque casi riníʼ ique binni» (Mateo 16:22, 23).

Óraque bicaa rídxibe ca binni que ne ca apóstol stibe ne gúdxibe laacaʼ nagana nga gaca binni discípulo stibe. Jesús guníʼ: «Pa nuu tu racalaʼdxiʼ gaca xpinneʼ la? cadi guibani para laa ne guáʼ yaga stiʼ ne cadi gusaana de guedananda naa. Purtiʼ tu gacalaʼdxiʼ gulá xpida zuniti ni, peru tu guniti xpida pur naa ne pur ca noticia galán la? zulá ni» (Marcos 8:34, 35).

Zacá ni, para chuulaʼdxiʼ Jesús ni runi ca discípulo stiʼ caquiiñeʼ gácacaʼ nadxibalú ne chuʼcaʼ dispuestu gúnicaʼ sacrificiu. Jesús guníʼ: «Purtiʼ tu guituí lú pur naa ne pur stiidxaʼ nezalú generación ni maʼ bichee ne maʼ bisaanaʼ Dios riʼ la? laaca zatuí lú Xiiñiʼ Hombre pur laa ora gueeda lu gloria stiʼ Bixhoze né ca ángel ni gulí» (Marcos 8:38) Ne casi bisiénebe, ora gueedabe «zaguíxebe cada tobi pur ca cosa ni biʼniʼ» (Mateo 16:27).