PES 60
Yésu a nhéñha—Ba ntehe lipém li Kristô
MATÉÔ 16:28–17:13 MARKÔ 9:1-13 LUKAS 9:27-36
-
YIINDA I ÑÉBA YÉSU A NHÉÑHA
-
BAÔMA BA NOK KIÑ DJOB
Kiki Yésu a yé niiga bôt libôga li Kaisaréa i tison i Filipi, li li yé haa ni Hikôa hi Hermôn, jam kiki bo 25 kilôméta, a nkal baôma bé jam li hélha: “Me nkal bé maliga le: Bahogi ipôla bôt ba téé hana b’a wo yaga bé ibale ba mbôk bé ba tehe Man mut a nlo ikété Ane yé.”—Matéô 16:28.
Banigil ba nlama badba le kii Yésu a nsômbôl kal. Sonde yada i mbus ngéda, Yésu a nkena baôma baa, Pétrô, Yôhanes, ni Yakôbô i ngii hikôa hi nlôôha ba ngii. I jam li li ntagbe juu, jon i bôt baa bana ba nteñgee ilo. Mu kiki Yésu a yé soohe, a nhéñha bisu gwap. Baôma ba ntehe su wé u mbai kiki hiañgaa, yak mambot mé ma mpôp le puum.
I mbus, bôt iba ba pôn-ga “Môsi bo Éliya” ba mbôdôl kwel ni Yésu inyu “liké jé, li a bé bebee ni yônôs i Yérusalem.” (Lukas 9:30, 31) I nene le liké jé li gwé maada ni nyemb yé ni bitugne gwé bi a bi pôdôl hala a yé ndék ngéda. (Matéô 16:21) Nkwel u u yé maselna ni yom Pétrô a nhoñol, i nyemb ini i nwéhna nyuu i ta bé jam Yésu a nlama keñgle.
Kiki ba yé péé nano, baôma ba yé nhelek ni yom ba ntehe ba nogok ki. I yiinda ini i nene ntiik kayéle Pétrô a nyoñ ngaba mu nkwel u, a kal le: “A Rabi, hala a yé loñge jam kiki di yé hana. Jon, di téé mandap ma mabadô maa, yada inyu yoñ, yada inyu Môsi, ni yada inyu Éliya.” (Markô 9:5) Baa Pétrô a gwé ngôñ le ba oñ bilap inyu boñ le i yiinda i i ke ni bisu?
Kiki Pétrô a ngi podok, ond i mbai i nhô bo, kiñ i mpémél mu ond i kalak le: “Man wem nunu, man wem nu gwéha, nyen a nlémél me. Emblana nye.” Kiki ba nok kiñ, baôma ba nkon woñi, ba ôm maboñ isi, ndi Yésu a nkal bo le: “Telbana. Ni kon bañ woñi.” (Matéô 17:5-7) Ngéda ba ntelep, baôma bobaa ba ntehe bé mut numpe ndik Yésu nyetama. Yiinda i mal. Kiki ba yé sôs hikôa, Yésu a nkal bo le: “Ni añle bañ mut nye ki nye yiinda ini letee Man mut a tuge.”—Matéô 17:9.
Mu kiki Éliya a bak mu yiinda, baôma ba mbadba le: “Inyuki bayimbén ba nkal ni le Éliya a nlama ndugi lo?” Yésu a ntimbhe le: “Éliya a bi lo, ndi ba bi yi bé le nye nu.” (Matéô 17:10-12) Yésu a bé pôdôl Yôhanes Nsôble, nu a bi yônôs nlélém nson kiki Éliya. Éliya a bi kôôba njel inyu Élisa, yak Yôhanes a kôôba njel inyu Yésu.
I yiinda ini i nlama lédés Yésu ni baôma ngandak! I ñéba lipém Yésu a ga bana i Ane yé. Banigil ba bi tehe toi “Man mut a nlo ikété Ane yé,” kiki Yésu a bi bôn. (Matéô 16:28) Ngii hikôa, ba bi ‘tehe lipémba jé ni mis map.’ Ngéda Farisai i bi bat Yésu le a ñéba bo yimbne i i bé lama kwés bo nkaa le a yé toi Kiñe Djob a mpohol, Yésu a bi tjél. Ndi banigil ba Yésu ba bi bana pôla i tehe lipém jé, hémle yap inyu Ane Djob i bi kônde let. Jon, Pétrô a bé le a tila i mbus ngéda le: “Di gwé bañga i bipôdôl bi bapôdôl i i yé yaga ntiik.”—2 Pétrô 1:16-19.