Mangajari ma Jesus di Kaesarea Pilippi, hira-hira 25 kilometer ma dao ni inganan i sian Dolok Hermon. Tingki i, didok Jesus ma tu angka siseanna, “Tutu do na hudok on tu hamu, adong do sian na jongjong dison na so mangkilala hamatean, so jolo diida nasida ro Anak ni jolma i di Harajaonna.”​—Mateus 16:28.

Aha do lapatan ni hata ni Jesus i? Hira-hira saminggu nai, diboan Jesus ma si Petrus, si Jakobus dohot si Johannes tu sada dolok. Tingki i mondok-ondok do angka sisean i, ra ala nunga tonga borngin. Alai tingki martangiang Jesus, diida nasida ma marsinondang bohi ni Jesus songon mata ni ari, jala pangkeanna pe mansai bontar.

Diida nasida ma “si Musa dohot si Elia” di parnidaan i. Mangkata-hatai do nasida dohot Jesus, “taringot tu parlaho ni Jesus na laho gohanna di Jerusalem”. (Lukas 9:30, 31) Hata ‘laho’ di ayat i patuduhon na laho mate nama Jesus jala laho hehe do muse. (Mateus 16:21) Ndang songon na nidok ni si Petrus i, parnidaan on patuduhon ingkon mate do Jesus.

Dung diida apostel na tolu i parnidaan i, ndang mondok-ondok be nasida. Nang pe holan parnidaan, alai songon na tutu do i masa dihilala si Petrus. Didok ma tu Jesus, “Guru, las do rohanami dison. Hupajongjong hami ma tolu kemah dison ate. Sada di ho, sada di si Musa, jala sada di si Elia.” (Markus 9:5) Boasa didok si Petrus songon i? Asa umleleng do parnidaan i idaonna?

Tingki mangkatai dope si Petrus, tarida ma ombun na marsinondang mangalinggomi nasida. Adong ma soara na mandok, “On do Anakku, haholonganki, halomoan ni rohangku do ibana. Tangihon ma ibana.” Mabiar ma angka apostel i mambege i jala manungkap ma nasida. Alai didok Jesus ma, “Hehe ma, unang mabiar.” (Mateus 17:5-7) Hehe ma nasida alai ndang adong be parnidaan i. Dung tiur ari turun ma nasida sian dolok i. Didok Jesus ma tu nasida, “Unang paboa-boa manang tu ise na niidamuna i sahat tu na hehe Anak ni jolma i sian hamatean.”​—Mateus 17:9.

Ala diida nasida do si Elia di parnidaan i, disungkun apostel i ma tu Jesus, “Boasa didok angka siboto surat ingkon jumolo ro si Elia?” Dialusi Jesus ma, “Nunga ro si Elia alai ndang ditanda nasida.” (Mateus 17:10-12) Si Elia na nidok ni Jesus disi, i ma si Johannes Pandidi. Ai diparade si Elia do dalan tu si Elisa, dos songon si Johannes na paradehon dalan tu Kristus.

Tontu lam togu do Jesus dohot angka siseanna alani parnidaan i! Ai tarida do di parnidaan i hamuliaon ni Kristus di Harajaon ni Debata. Jala songon janji ni Jesus nunga diida angka sisean i “Anak ni jolma i di Harajaonna”. (Mateus 16:28) Lomo do roha ni halak Parise mangida tanda na patuduhon, Jesus i Raja na pinillit ni Debata. Alai ndang dipatuduhon i tu nasida. Holan tu angka sisean ni Jesus na solhot tu ibana do tanda i dipatuduhon. Alani i, lam pos ma roha ni nasida tu surirang taringot tu Harajaon i. Di pudian ni ari didok si Petrus ma, “Lam pos ma rohanami tu angka surirang.”​—2 Petrus 1:16-19.