Nté Yésus a ye’ele bôt mefôla ya Césarée ya Philippe, bebé bekilimeta 25 a Nkôle Hermon, a ve minlômane mié ngule foé a jô’ô na: “Me ajô mia na, bôt be tele va, bevo’o be aye bo te wu, ve tame yene Mone môt a za’a ayoñe dé.”​—Matthieu 16:28.

Beyé’é ba yiane sili bebiene jôm Yésus a kômbô jô. Bebé sondô wua mvuse ya valé, a nyoñe minlômane mié milal (Pierre, Jacques, a Jean) a ke be akekui nkôle yôp. Alu é nga yiane bo amu ôyo ô mbili bôte bete belal. Nté Yésus a ye’elan, a taté na a veñesane be ôsu. Minlômane mia yen ane asu dé da faé ane nlô jôp a yen ane ngômesane jé ja mane bo éfumulu ne fuum.

A teme na, bôte bebaé be funa’ane “Moïse ba Élie” be nto valé. Ba taté na ba kobô a Yésus ajô dulu ‘a ye bo Jérusalem.’ (Luc 9:30, 31) Dulu ba jôô je va e ne awu Yésus a jam da yiane tôñ: ñwômane wé, ñwô émien a nga kobô ôyôm éyoñe mvus. (Matthieu 16:21) Mejô mete ma liti na, akusa bo Pierre a nga simesan aval afe, Yésus a vo’o sa’ale mbia awu a tele nye ôsu.

Minlômane mila mi veeya nya mveane, a ba yen a wô’ô jame da boban be too fe’e ne vema. A ne ñyenan, ve a ne v’ane mam mete ma bobane fo’o. Amu nalé Pierre a jô na: “A Rabbi, a ne mvaé bi atabe va: ntama lôñane bibem bila; wo jia, Moïse jia, a Élie jia.” (Marc 9:5) Éko éziñ Pierre a kômbô lôñe bibem bilal asu ya na ñyenan ôte ô bo te ji’a man.

Nté Pierre a kobô, nkut wo zu dibe be yôp a tyiñe ja so nkut été é jô’ô na: “Nyina a ne Mone wom me anye’e, me ayene nye mvaé; vô’ôla’ane nye.” Éyoñe minlômane mia wô’ô tyiñe Zambe, ane ba ko mbia woñ a buti mesu map e si, ve Yésus a jô be na: “Kôla’ane si, te koane woñ.” (Matthieu 17:5-7) Éyoñe ba kui mis, minlômam mi nji yene môte mfe, ve Yésus. Ñyenan ô maneya. Éyoñe tyé ja lende a na ba siliki nkôl, Yésus a jô be nya njôane na: “Te katane môt jam mi ate yen, ve éyoñ Mone môt a ye wômô soñ.”​—Matthieu 17:9.

Mbôl Élie a mbe ñyenan ôte, nalé a bo na nsili ô bômbô. Minlôman mia sili na: “Amu jé beyeme bekalate ba jô na Elie a yiane taté beta so?” Yésus a yalane na: “Élie a soya so, ve be nji kômbô yeme nye.” (Matthieu 17:10-12, Mfefé Nkôñelan) Yésus a kobô ajô Jean Baptiste, nnye ate a nga bo aval ésaé da ane Élie. Élie a nga kôme zen asu Élisée, a Jean a nga bo v’avale da asu Krist.

Ñyenan ôte wo yiane ve Yésus a minlômane mié ngule nyul! A ne atata’a ya duma ya Éjôé Krist. Beyé’é be nga yene fo’o “Mone môt a za’a [Éjôé] jé,” ane Yésus a nga ka’ale. (Matthieu 16:28) Nté be mbe nkôle yôp, be nga to “bengaa be nga yen étôto’o jé a mis.” Ja’a Bepharisien be nga sili ndeme ja liti na Yésus a ye bo nyô Zambe a te top ane Njôô, a ye be ve to’o jia. Ve beyé’é be Yésus be mbe nye bebé be nga bi mvome ya yene mveñesan, ñwô wo yemete minkulane mejô a lat a Éjôé. Amu nalé, Pierre a ye bo ngule ya jô melu ma zu na: “Bi bili nkobô bekulu mejô, ñwô ô ne bia mbôka’a.”​—2 Pierre 1:16-19, Mfefé Nkôñelan.