Jesu akĩruta andũ gĩcigo-inĩ gĩa Kaisarea Filipi, kĩrĩa kĩrĩ kilomita ta 25 kuuma Kĩrĩma-inĩ kĩa Herimoni, akeera atũmwo ake ũndũ materĩgĩrĩire, akoiga: “Ngũmwĩra atĩrĩ o ma, nĩ harĩ amwe marũgamĩte haha matagacama gĩkuũ o rĩ nginya mambe mone Mũrũ wa mũndũ agĩũka arĩ Ũthamaki-inĩ wake.”​—Mathayo 16:28.

Arutwo makarigwo nĩ ũrĩa Jesu arenda kuuga. Kiumia ta kĩmwe thutha ũcio, agathiĩ kĩrĩma-inĩ hamwe na atũmwo ake atatũ, nĩo Petero, Jakubu, na Johana. No kũhoteke nĩ ũtukũ tondũ arũme acio atatũ marĩ na toro. Rĩrĩa Jesu arahoya, akagarũrũka ũrĩa atariĩ makĩĩyonagĩra. Atũmwo acio makona ũthiũ wake ũgĩkenga ta riũa na makona nguo ciake ikĩhenia ta ũtheri, na ikerũha mũno.

Hagacoka hakoimĩra andũ erĩ, nĩo “Musa na Elija.” Makambĩrĩria kwaria na Jesu ũhoro wĩgiĩ ‘gũthiĩ gwake kũrĩa kũrĩ hakuhĩ kũhinga thĩinĩ wa Jerusalemu.’ (Luka 9:​30, 31) Gũthiĩ kũu nĩ gũkua kwa Jesu na kũriũka, kũrĩa erĩgĩte kwaria ũhoro wakuo. (Mathayo 16:21) Mĩario ĩno ĩkonania atĩ mũgarũ na ũrĩa Petero oigire, gĩkuũ gĩa thoni kĩrĩa Jesu egũkua ti kĩndũ angĩĩthema.

Mokĩrĩte biũ rĩu, atũmwo acio atatũ makerorera na magathikĩrĩria mamakĩte. Gĩkĩ nĩ kĩoneki, ĩndĩ gĩtariĩ ta ũndũ wa ma biũ nginya Petero akeingĩria ndeereti-inĩ ĩyo, akoiga: “Rabii, nĩ wega gũkorũo tũrĩ haha. Nĩ ũndũ ũcio reke twambe hema ithatũ, ĩmwe yaku, ĩmwe ya Musa, na ĩmwe ya Elija.” (Mariko 9:5) Hihi no kũhoteke Petero arenda hema ciambwo nĩguo kĩoneki kĩu gĩikaikare?

O Petero akĩaragia, itu ikengu mũno rĩkamahumbĩra na mũgambo ũkoima thĩinĩ wa itu rĩu ũkoiga: “Ũyũ nĩ Mũrũ wakwa, ũrĩa nyendete, na nĩ ndĩmwĩtĩkĩrĩte. Mwathĩkagĩrei.” Maigua mũgambo wa Ngai, atũmwo acio amaku magaturumithia mothiũ mao thĩ, no Jesu akameera: “Ũkĩrai. Mũtigetigĩre.” (Mathayo 17:​5-7) Mokĩra, atũmwo acio makona o Jesu tu. Kĩoneki nĩ gĩathira. Gwakĩa, magĩikũrũka kuuma kĩrĩma-inĩ, Jesu akameera: “Mũtikeere mũndũ o na ũrĩkũ ũhoro wa kĩoneki kĩu nginya rĩrĩa Mũrũ wa mũndũ akaariũkio.”​—Mathayo 17:9.

Elija gũkorũo kĩoneki-inĩ kĩu gũkoimĩria kĩũria. Atũmwo makoria ũũ: “Nĩ kĩĩ gĩtũmaga andĩki-Watho moige atĩ no mũhaka Elija ambe oke?” Jesu akamacokeria: “Elija nĩ arĩkĩtie gũka, ĩndĩ matiamũmenyire.” (Mathayo 17:​10-12) Jesu araria ũhoro wa Johana Mũbatithania, ũrĩa waahingirie itemi o ta rĩa Elija. Elija aaharĩirie Elisha njĩra, na noguo Johana aaharĩirie Kristo.

Kĩoneki kĩu gĩkomĩrĩria Jesu na atũmwo ake mũno! Gĩkuonanagia riri ũrĩa Kristo agaakorũo naguo Ũthamaki-inĩ. Kwoguo nĩ ta arutwo monire “Mũrũ wa mũndũ agĩũka arĩ Ũthamaki-inĩ wake,” ta ũrĩa aamerĩte. (Mathayo 16:28) Rĩrĩa moima kĩrĩma-inĩ, nĩ ‘meyoneire riri wake mũnene.’ O na gũtuĩka Afarisai meendaga kĩama gĩa kuonania atĩ Jesu nĩwe wathurĩtwo nĩ Ngai atuĩke Mũthamaki, Jesu ndaamaringĩire. No arutwo amwe a Jesu nĩ metĩkĩririo kuona Jesu akĩgarũrũka, ũndũ ũrĩa wonanirie morathi megiĩ Ũthamaki nĩ ma ma. Nĩkĩo Petero aacokire kwandĩka thutha-inĩ atĩ, “Kiugo kĩa ũrathi nĩ gĩĩkĩrĩtwo hinya o na makĩria.”​—2 Petero 1:​16-19.