Yesu pafundija bantu mu ntanda ya Kesalea Fidipai, idi ku kintu kya makilometele 25 na Lūlu lwa Helemone, wasapwila batumibwa bandi binenwa bibezemukwa amba: “I bine nemulombola’mba kudi bamo bemene pano’pa kebakafupo poso’nka bamone bidi Mwanā muntu wiya mu Bulopwe bwandi.”​—Mateo 16:28.

Bana ba bwanga ye bano abeipangula bine bisaka kunena Yesu. Yenga umo pa kupita’po, wasela batumibwa basatu—Petelo, Yakoba, ne Yoano—wakanda nabo ku lūlu lulampe. Padi i bufuku, mwanda bano bantu basatu bevwene tulo. Yesu palombela, washinta ku meso abo. Batumibwa abamone mpala yandi keyeñenya bwa dyuba ne bivwalwa byandi kebikelema bwa kitōkeji, kebitōka tō.

Kupwa pabamweka byelekejo bibidi, kya “Mosesa ne Ediya.” Kebesambe na Yesu ‘myanda ya lwendo lwandi lwa ku Yelusalema.’ (Luka 9:30, 31) Bimweka bu lwendo lwa Yesu i lwa kukafwa kadi akasangulwe, lusangukilo lwine lwaesambilanga’po. (Mateo 16:21) Bino byobesamba bibeshila na byanene Petelo pa kusoñanya Yesu epuke lufu lwa bumvu.

Batumibwa basatu’ba, tulo pa kwibatōka mu meso, abamone ne kuvwana bintu bitulumukwa. Petelo wamone kino kimonwa bu mwanda wa bine, waeela’mo na kunena’mba: “A Labi, i kipite buya twikale pano. Nanshi longa tushimike mapema asatu, umo obe, mukwabo wa Mosesa, ungi nandi wa Ediya.” (Mako 9:5) Le Petelo usaka kushimika mapema mwanda wa kimonwa’kya kilepele’ko?

Pakisamba Petelo, dikumbi dilelema dibebapūta ne diwi dibatambe’mo kedinena’mba: “Uno’u i wami Mwana, muswedibwe, ondoelelwe. Mwivwanei.” Batumibwa pa kwivwana diwi dya Leza, moyo ubebakwata abapone mapala pa nshi, ino Yesu webanena’mba: “Imanai. Kemwakikwatwai moyo.” (Mateo 17:5-7) Batumibwa basatu pa kwimana, abepamone’nka Yesu bunka. Kimonwa kibapu. Abo pa kukya kebatūka ku lūlu, Yesu webasoñanya’mba: “Kemwakilombolai muntu nansha umo kino kimonwa enka ne bisangulwa Mwanā muntu mu bafwe.”​—Mateo 17:9.

Muntu umweka bwa Ediya mu kimonwa walengeja kipangujo kimo. Batumibwa abaipangula’mba: “Mwanda waka basonekeji banenanga’mba Ediya ufwaninwe bidi kwiya?” Yesu walondolola’mba: “Ediya ke mwiye kala, kadi kebamujingulwilepo.” (Mateo 17:10-12) Yesu wisambilanga pa Yoano Mubatyiji waingile mwingilo bwa wa Ediya. Ediya walongolwedile Edisha dishinda, Yoano nandi dya Kidishitu.

Bine kino kimonwa kibakomeja Yesu ne batumibwa! I ntompejo ya ntumbo ya Yesu mu Bulopwe. Nanshi bana ba bwanga abamone “Mwanā muntu wiya mu Bulopwe bwandi,” monka mwekilaile Yesu. (Mateo 16:28) Pobakidi ku lūlu, abaikala “batumoni bemwenine bukatampe bwa ntumbo yandi.” Nansha Bafadiseo byobadi basaka kiyukeno kilombola’mba Yesu i Mulopwe mutongwe wa Leza, kebapelwepo nansha kimo. Ino batumibwa bapwene na Yesu bininge abapebwa mukenga wa kumona kushinta kwa Yesu, kwine kwalombola’mba bupolofeto butala pa Bulopwe bukafikidila. Kyo kyālengeje Petelo alembe mwenda mafuku amba: “Tudi na kinenwa kya bupolofeto kiningijibwe kutabuka.”​—2 Petelo 1:16-19.