Sama Yesu puonjo ji e alwora mar Kaisaria Filipi, ma en kilomita ma dirom 25 kama kiwuok e Got Hermon, olando ne jootene wach moro ma kawogi gi wuoro niya: “Adier awachonu ni, nitie moko kuom joma ochung’ kae ma ok nobil tho ngang’ nyaka gikwong gine Wuod dhano ka biro e Pinyruodhe.”​—Mathayo 16:28.

Nyaka bed ni jopuonjre Yesu penjore tiend gima owachono. Chiegni juma achiel bang’e, okawo jootene adek ma gin Petro, Jakobo, kod Johana kendo odhi kodgi nyaka e got moro mabor. Nyalo bedo ni en gotieno, nimar nindo ohewo ji adekgo. Sama Yesu lemo, kite lokore e nyim jootego. Jootego neno ka wang’e rieny kaka ler mar wang’ chieng’ kendo gineno ka nangane rieny ma rachar miwuoro.

Kae to kido ariyo mag “Musa gi Elija,” fwenyorenegi. Ji ariyogo chako wuoyo gi Yesu kuom ‘wuokne e piny ma chiegni timorene Jerusalem.’ (Luka 9:30, 31) Nenore ni wuok e piny miwuoyoeno ochung’ ne tho mar Yesu kod chier mare ma nyocha olosoe. (Mathayo 16:21) Mbakano nyiso ni tho ma kelo wich-kuot nyaka yud Yesu. To mano opogre ahinya gi kaka Petro ne sayo Yesu mondo otim.

Nikech koro joote adekgo osechiew chuth, ging’icho kendo giwuoro mbaka ma giwinjono. Gima ginenono en mana fweny. Kata kamano, wachno chalo ne Petro mana ka gima timore adier. Kuom mano, ochako wacho kama: “Rabi, otimore maber ni wan kae. Omiyo, we wager hembe adek, achiel mari, achiel mar Musa, to achiel mar Elija.” (Mariko 9:5) Be dibed ni Petro dwaro ni oger hembego mondo fwenyno omed dhi nyime?

Sama Petro pod wuoyo, bor polo ma rieny umogi, kendo dwol moro wuok e bor polono ka wacho niya: “Ma Wuoda ma ahero, ma aseyiego. Winjeuru.” Bang’ winjo dwond Nyasaye, jootego podho piny auma kendo luoro makogi. To Yesu jiwogi kama: “Auru malo. Kik uluor.” (Mathayo 17:5-7) Ka giting’o wang’gi malo, joote adekgo koro neno mana Yesu kende. Fwenyno oserumo. Ka piny oru kendo gilor ka gia e got, Yesu chikogi niya: “Kik uhul fwenyno ne ng’ato ang’ata nyaka bang’ ka Wuod dhano osechier oa kuom joma otho.”​—Mathayo 17:9.

Nikech gineno Elija e fwenyno, jootego penjo kama: “Kare ang’o momiyo jondiko wacho ni Elija nyaka bi mokwongo?” Yesu dwokogi niya: “Elija osebiro kendo ne ok gifwenye.” (Mathayo 17:10-12) Yesu wuoyo e wi Johana Jabatiso ma nochopo migawo ma chalo gi mar Elija. Elija noiko yo ne Elisha, to Johana bende noiko yo ne Kristo.

Mano kaka fwenyno jiwo Yesu kod jootego! Fwenyno nyiso motelo duong’ ma Kristo biro bedogo e Pinyruodhe. Mano e momiyo jopuonjre noneno “Wuod dhano ka biro e Pinyruodhe,” mana kaka Yesu nosesingo. (Mathayo 16:28) Ka gin e got, ne ‘gineno duong’ ma en-go gi wang’gi.’ Kata obedo ni Jo-Farisai ne dwaro ni omigi ranyisi ma nyiso ni Yesu e jal ma Nyasaye oyiero mondo obed Ruoth, Yesu ne otamore miyogi ranyisino. Kata kamano, Yesu nomiyo jopuonjrene ma ne chiegni kode ahinya thuolo mar neno kite ka lokore, ma en gima nyiso ni weche ma ne okor e wi Pinyruoth gin adier. Mano e momiyo Petro ne nyalo ndiko bang’e niya: “Wach mokor koro osebedonwa madier chuth.”​—2 Petro 1:16-19.