A Zeezi ra keta soolem ning b sẽn boond tɩ Filip Sezaare wã. Be ne Hɛrmo tãngã zemsa kilo 22. A sẽn wa n zãmsd nebã, a togsa a tʋm-tʋmdbã bũmb sẽn ling-b wʋsgo. A yeel-b lame: “Sɩd-sɩda, mam yeta yãmb tɩ sẽn be-b ka wã, neb kẽer n ka na n ki hal tɩ b yãnd Ninsaal Bi-riblã sẽn wat ne b naamã ye.”—Matye 16:28.

Tõe tɩ karen-biisã ra sokda b mens a Zeezi gomdã sẽn dat n yɛɛlga. Rasem a yopoe loogr poore, a talla a tʋm-tʋmdb a tãab n dʋ tãn-lug-lug zug n na n pʋʋse. Yaa a Pɩyɛɛr ne a Zak la a Zã. Tog n yɩɩ yʋngo, bala b ra suusdame. A Zeezi sẽn wa n pʋʋsdẽ wã, a tedga b taoore. B yãame t’a nengã yãgda wa wĩntoogã, t’a futã me lebg pɛɛlg faga, n pɩnda.

B wa n yãa rap a yiib sẽn puki. Ra wõnda “a Moyiis ne a Eli.” Rap a yiibã sɩngame n gomd ne a Zeezi b sẽn na n kʋ-a Zeruzalɛmmã yelle. (Luk 9:30, 31) Sẽn nan pa kaoose, a Zeezi goma a kũumã la a vʋʋgrã yell ne a karen-biisã. (Matye 16:21) Tedgrã sasa wã, rap a yiibã sẽn gom ne a Zeezi a kũumã yellã wilgdame tɩ pa bũmb a sẽn tõe n gili, wa a Pɩyɛɛr sẽn da ratã ye.

Yel-solemdã kɩtame tɩ tʋm-tʋmdb a tãabã fãa gõeemã wɩlge, tɩ b getẽ la b kelgdẽ. Baa sẽn da yaa vẽnegr buudã, a Pɩyɛɛr yamẽ, ra yaa sɩda, hal t’a bao n na n kẽes a toogo. A yeela a Zeezi yaa: “Karen-saamba, yaa sõama tɩ tõnd pa ka, tɩ d tilg fu-rot a tãabo: a yembr yãmb yĩnga, a yembr a Moyiis yĩnga, la a yembr a Eli yĩnga.” (Mark 9:5) D pa mi a sẽn yeel woto wã sã n yaa a sẽn dat tɩ b sẽn ne bũmb ningã wogl ye.

A Pɩyɛɛr sẽn ket n gomda, sawadg sẽn pɩnd n lud b fãa. B wʋma koɛɛg sẽn yi sawadgẽ wã n yeele: “Ada yaa mam Bi-ribl-nongr sẽn ta mam yam zãnga. Kelg-y-yã-a.” Tʋm-tʋmdbã sẽn wʋm Wẽnnaam koɛɛgã, rabeem kãseng yõk-b lame tɩ b fõgen b nens tẽnga. La a Zeezi kolgame n yeel-b yaa: “Yik-y-yã, da zoe-y rabeem ye.” (Matye 17:5-7) B sẽn yikã, b pa yã ned a to n zʋʋg a Zeezi ye. Beoogã sẽn vẽeg tɩ b yi tãngã zug n sigdã, a Zeezi yeel-b lame yaa: “Da gom-y ne ned ba a yembr yã-kãngã yell hal tɩ Ninsaal Bi-riblã wa vʋʋg n bas kũum ye.”—Matye 17:9.

Tʋm-tʋmdbã sẽn yã ned sẽn wõnd a Eli a Zeezi tedgrã wakatã, b soka a Zeezi yaa: “Bõe yĩng tɩ tõog karen-saam-dãmbã yetẽ t’a Eli n tog n deng n wa?” T’a leok-b yaa: “Mam yeta yãmb t’a Eli zoe n waame la nebã ka bãng-a ye.” (Matye 17:10-12) A Zeezi ra gomda a Zãmbatiis yelle, bala a tʋma tʋʋmd sẽn wõnd a Eli tʋʋmdã. A Eli manega sor a Eliize yĩnga. A Zã me manega sor Kirisã yĩnga.

Tedgrã sɩd kenga a Zeezi ne a tʋm-tʋmdbã raoodo. Ra wilgda Kirisã sẽn da na n wa lebg Rĩm saasẽ wã. Dẽnd karen-biisã paam n yãa “Ninsaal Bi-riblã sẽn wat ne b naamã.” (Matye 16:28) Tãngã zugã, b yãnda a Zeezi ziirã ne b nifu. Baa ne Fariizẽ-rãmbã sẽn da rat t’a Zeezi maan bãnd sẽn wilgd tɩ yẽ la Rĩm ning Wẽnnaam sẽn yãkã, a pa sak ye. La a Zeezi karen-biis kẽer paam n yãa a tedgrã, sẽn wilgd tɩ no-rɛɛsdbã sẽn da togs Wẽnnaam Rĩungã wɛɛngẽ wã yaa sɩdã. Rẽ n so t’a Pɩyɛɛr meng wa tõog n yeel woto: “Tõnd leb n mii vẽeneg tɩ pĩnd-n-bãngr goam sẽn da togsã yaa sɩda.”—2 Pɩyɛɛre 1:16-19.