Vaavaa Yesu aahusiheiye achu mmuceche wa Kaisareya elapo ya Filipi, weiwo orakama wa ephiro onaakhwana mastatiya 25 ovinya o Mwaako Hermoni, Yesu onnaloca echu oohuserya awe yaahaaweheryaaya, ariki: “Eparipari kinnolèlani wi akina wa nyuwo muri vava hanakhwa ehimonne Mwana a mutxhu arwaka momweneni mwawe.”—Mateu 16:28.

Oohuserya akhweya haniiwexexa phaama yeeyo Yesu onachuneiye oloca. Ivinrevo isumana vakhaani ohoolo waya, owo onnaakuxa oohuserya araru—Petro, Yakopo, ni Yohani nave annawela vasulu va mwaako woorakama. Akhweya yaari elukuluku ya ohiyu, woona wi oohuserya yaala ooraaru yaanapacerya otuthela. Yesu arikimvekela, oohuserya awe annoona waarya wa ncicimiho nawe. Awo annoona ethoi awe yaaryaka ntoko nsuwa nave tho soowara sawe saaryaka ntoko onyaari.

Voocharela, yaahooneya alopwana apiili yaawo Piipiliya onawiichaneiye “Mose ni Eliya.” Awo yaapacerya ovaanela ni Yesu vooloca sa “orowa wawe waya wakhwanela o Yerusalemu.” (Luka 9:30, 31) Orowa iwo akhweya onaahiwa okhwa ni oviihiwa mookhwani wa Yesu, yoowo owo aalonceiye elukuluku vakhaani muculi. (Mateu 16:21) Ovaanela wu, waahooniherya wi yeeyo Petro aalonceiye yaari yoohiyana ni yeeyo yaahaala weereya, okhwa woomoriha ikharari wa Yesu waahaala weereya chiryene.

Vano ikhove siwuukununwe, oohuserya ooraaru annoona ni owiriyana echu yootikhiniha. Eyo yaari yawoona. Nyenya, yakhala ntoko wi yaari eparipari ophiyerya wi Petro apacerya opaka makupa mu ovaanela yoowo, ariki: “Muhusiha, ti yaphama nikhale vava; nnamuteka misakala miraru: mmoha wawà, mukina wa Mose ni mukina wa Eliya.” (Marko 9:5) Apwanne Petro onachuna opaka misakala wi yawoona eyo etitelele?

Petro arikimuloca, neeku nawaarya naahaahuruwela nave muneekuni naahiiweya nsu nriki: “Ola ti Mwanaka òkhweleyasa, kinaphwanyakamo ohakalala waka: mun’wiriyaneke.” Nave yiiwalaaya masu ala, nthowa na woova yaathipela iyuuci saya vathi, nave Yesu aahi wa yaawo: “Vinyani ni muhòve!” (Mateu 17:5-7) Vaava awo yaavinnyaaya, anamoona pahiru Yesu. Yawoona yoomala. Erikimukhuruwa omwaako wooxixelo aya, Yesu onnaalopola ariki: “Muhimulèle mutxhu yeyo monnanyu, ahakunve Mwana a mutxhu ovinya mokhwani.”—Mateu 17:9.

Wooneya wa Eliya va yawoona yeela, ennaweeriha oohuserya okhalano minikwa, nave annamukoha Yesu eriki: “Ntakhara seni alipa òrepa analotxaya wi Eliya t’oni apatxerye orwa?” Yesu onnawaakhula: “Eliya òrwa, nto àhisuweliwa.” (Mateu 17:10-12) Yesu onamwaaha Yohani Mpatisi, yoowo aapanke muteko woolikana ni wa Eliya. Eliya aarehererya ephiro wa Eliseu, nave Yohani aaheerano emohamoha wa Kristu.

Moohikhwa minikwa, yawoona ela yaamulipiha Yesu vamoha ni oohuserya awe! Awo amala omoona Kristu mu ncicimiho na Omwene awe. Mweeparipari, oohuserya yaamoona “Mwana a mutxhu arwaka momweneni mwawe,” hiiha ntoko aalonceiye. (Mateu 16:28) Vaavaa yaaryaaya vamwaako, awo yaakhala “anamona” a otokweene awe. Naamwi Afarisi yaachunne eneneeryo yeeyo yaahaala wooniherya wi Yesu aari muchu aathanliwe ti Muluku, owo haawoninhe. Nyenya arummwa awe oororomeleya yaahoona eneneeryo yeeyo. Mwawiihiiha, ohoolo waya Petro aarepa ariki: “Hiha wòlipihiwa mutxhaka olaleyiwe ti alipa a miririmu.”—2 Pedro 1:16-19.