Jesusqa Cesarea de Filipo lawpim Diosmanta hinalla willakurqa, chayqa Hermon urqupa chimpanmi karqa. Chaypim Jesusqa qatiqninkunata nirqa: “Chiqaptapunim nikichik: Kaypi sayaqkunamanta wakinqa manapunim wañunqakuchu runapa churinta munaychakuyninpi hamuqta puntata rikunankukama”, nispa (Mateo 16:28).

Apostolninkunaqa tapukurqakupaschá ima niy munasqanta. Yaqa huk semanamantam Jesusqa Pedrowan, Santiagowan hinaspa Juanwan hatun urquman rirqaku. Yaqachusmi tuta risqankurayku apostolninkunaqa puñuymanta karqaku. Chaymi Jesus mañakuchkaptin apostolninkunapa qayllanpi rikchaynin inti hinaraq kanchariyta qallaykurqa, hawanpi pachanpas yuraq-yuraq rikuriruspam kancharirqa.

Chaymantam musquyninkupi hina rikurirurqa Moisespas chaynataq Eliaspas, hinaspam paykunaqa Jesuswan rimayta qallaykurqaku Jerusalenpi wañukunanmanta (Lucas 9:30, 31). Jesusqa ñam ñawpaqkunatapas willakurqaña wañukunanmanta hinaspa kawsarichisqa kananmantaqa (Mateo 16:21). Chay rimasqankum qawachirqa Pedro mana munachkaptinpas Jesuspa wañukunantaqa mana pipas harkay atinanmanta.

Jesuspa kimsan apostolninkunaqa rikchasqañam tukuy chaykunataqa suma-sumaqta qawarqaku. Musquyninkupi hina kaspankupas chiqaptapunim rikuchkarqaku, chayraykum Pedropas rimarispan nirqa: “Yachachikuq, ima sumaqmi kaypi kasqaykuqa. Ruwarusaqkuyá kimsa carpakunata: Hukninta qampaq, hukninta Moisespaq, huknintañataq Eliaspaq”, nispa (Marcos 9:5). Chaytaqa ichapas nirqa hinallaraq rimasqankuta uyariyta munasqanrayku.

Chaynata Pedro rimachkaptinraqmi kancharichkaq puyu rikuriramuspan llantuykuptin puyumanta Jehova Dios nimurqa: “Paymi kuyasqay churiy, paytam kuyani hinaspapas chaskinim, uyariychikyá”, nispa. Chaynata uyariruspankum apostolninkunaqa mancharikuspanku pampakama kumuykurqaku. Jesusñataqmi nirqa: “Hatariychik, amayá manchakuychikchu”, nispa (Mateo 17:5-7). Hatariykuspankuñataqmi Jesusllataña rikurqaku. Chaynatam tukururqa musquypi hina rikusqankuqa. Achikyaramuptinñataqmi urqumanta kutimuptinku Jesusqa nirqaraq: “Rikusqaykichiktaqa amam pimanpas willakunkichikchu runapa churin wañusqanmanta kawsarimunankama”, nispa (Mateo 17:9).

Eliasta rikusqankuraykum apostolkunaqa Jesusta tapurqaku: “¿Imanasqataq escribakunaqa ninku Elias puntata hamunanmanta?”, nispa. Jesusñataqmi nirqa: “Eliasqa ñam hamurunña hinaptinmi mana riqsispanku munasqankuta paywan ruwarunku”, nispa (Mateo 17:10-12). Jesusqa rimachkarqa bautizaq Juanmantam, Juanqa Jesus chayamunanpaqmi ñanta kichachkaq hina imakunatapas ruwarqa. Chaynam Eliaspas Eliseopaq ruwarqa.

Chay musquypi hina rikusqankuqa Jesustawan apostolninkunatam kallpancharqa, chaymantapas Diospa munaychakuyninpi Jesus kancharinantam qawachirqa. Qatiqninkunaqa Jesuspa nisqanpi hinam “runapa churinta munaychakuyninpi hamuqta” rikuchkarqaku (Mateo 16:28). Chay urqupiqa kikinkupunim Jesuspa kanchariyninta rikurqaku. Jesusqa manam imawanpas fariseo runakunamanqa qawachirqachu kamachiq kananpaq Diospa akllasqantaqa, chay kimsan apostolninkunamanmi ichaqa qawachirqa. Musquyninkupi hina rikusqankuqa Diosmanta willakuqkunapa willakusqankumanta  mana iskayrayanankupaqmi yanaparqa. Chaymi apostol Pedro qipakunaman nirqa: “Diosmanta willakuqkunapa yachachisqankumantaqa manam iskayrayanchikchu”, nispa (2 Pedro 1:16-19).