A haapii ai Iesu i te taata na Kaisarea Philipi, e 25 kilometera i te atea i te mouˈa Heremona, faahiti ihora oia i teie parau maere mau i ta ˈna mau aposetolo: “Oia mau ta ˈu e parau atu: Te vai ra vetahi o te feia i ǒ nei o te ore e pohe hou a ite ai i te Tamaiti a te taata nei ia haere mai i roto i ta ˈna Faatereraa arii.”—Mataio 16:28.

Eita e ore e ua ui te mau pǐpǐ eaha te auraa o ta Iesu parau. Tau mahana i muri iho, rave ihora Iesu e toru o na aposetolo, Petero, Iakobo e Ioane, e pauma ˈtura ratou i nia i te hoê mouˈa teitei. Papu e po taua taime ra, ua varea hoi na toru tane i te taoto. A pure noa ˈi Iesu, taui ihora to ˈna huru i mua ia ratou. Ite aˈera ratou i te anaanaraa to ˈna mata mai te mahana e to ˈna ahu mai te maramarama e te uouo-roa-raa.

Fa maira e piti taata, “o Mose raua Elia,” e paraparau maira ia Iesu “e nafea [oia] e faarue mai ai i teie nei ao, o te fatata hoi i te tupu i Ierusalema.” (Luka 9:30, 31) Te faarueraa mai Iesu i teie nei ao, o to ˈna ïa poheraa e tia-faahou-raa mai i muri iho, ta ˈna i faahiti aˈenei. (Mataio 16:21) Ua haapapu maitai teie aparauraa e roohia iho â Iesu i te pohe haama, eiaha râ mai ta Petero i parau.

Hiˈo noa maira na aposetolo tei ara roa e faaroo aˈera ma te maere i te aparauraa. E orama teie. E au ra râ no Petero, e ere ïa, a hinaaro atu ai oia iho e faaô atu, a na ô ai: “Rabi, mea fanaˈo matou i te tiaraa mai i ǒ nei. Vaiiho na ia matou ia faatia e toru fare ie, hoê no oe, hoê no Mose e hoê no Elia.” (Mareko 9:5) No to Petero anei hinaaro ia tamau noa te orama i na reira ˈi oia i te parau?

A paraparau noa ˈi Petero, tapoˈihia maira ratou e te hoê ata anaana e na ô maira te hoê reo no roto mai i taua ata ra: “O ta ˈu Tamaiti teie, tei herehia, ta ˈu i mauruuru roa. A faaroo ia ˈna.” A faaroo ai na aposetolo i te reo o te Atua, tipapa ihora ratou tei mǎtaˈu roa i raro. Parau atura râ Iesu: “A tia mai. Eiaha e mǎtaˈu.” (Mataio 17:5-7) I to ratou tiaraa mai, o Iesu anaˈe ta ratou e ite ra. Moˈe ihora te orama. Ananahi aˈe, pou maira ratou mai nia mai i te mouˈa e faaue atura Iesu: “Eiaha e faaite i te taata i teie orama e ia tia roa mai te Tamaiti a te taata nei mai te pohe mai.”—Mataio 17:9.

No te faraa mai Elia i roto i te orama, ui maira na aposetolo: “No te aha . . . te mau papai parau e parau ai e o Elia na mua te haere mai?” Pahono atura Iesu: “Ua haere ê na mai Elia, e aita ratou i ite e o ˈna tera.” (Mataio 17:10-12) Te parau ra Iesu no Ioane Bapetizo, o tei amo i te hoê â hopoia e ta Elia. Ua faaineine Elia i te eˈa no Elisaia, e o Ioane no te Mesia.

Ua faaitoito mau â teie orama ia Iesu e na aposetolo! E faaiteraa te reira i te hanahana o te Mesia i roto i te Faatereraa arii a muri aˈe. Mea na reira ïa to te mau pǐpǐ iteraa i “te Tamaiti a te taata nei ia haere mai i roto i ta ˈna Faatereraa arii,” mai ta Iesu i fafau na. (Mataio 16:28) I nia i te mouˈa, ua ite mata roa ratou i to ˈna hanahana. Ua hinaaro te mau Pharisea i te hoê tapao no te haapapu e e riro Iesu ei Arii maitihia e te Atua. Aita oia i horoa hoê noa ˈˈe tapao. Area te mau pǐpǐ piri roa ia Iesu, ua tia ïa ia ratou ia ite i te tauiraa to Iesu huru, o te haapapu ra i tei tohuhia no nia i te Faatereraa arii. Ua tia ïa ia Petero ia papai i muri aˈe: “Ua papu roa ˈtu â ia tatou te parau a te mau peropheta.”—Petero 2, 1:16-19.