Okathi Yesu aawiixuttiha awe atthu muttetthe wa oKesareya wa oFilipi, yoowo waarakamelanne ni Mwaako Hermoni ikiloomo 25, Yesu aahaaleela arummwa awe wira: “Kinolèlani ekhweli wira: àkhala vava ahinrowa okhwa, ehimonne toko Mwana a mutthu arwaka n’Umwene awe”.​—Matheyo 16:28.

Arummwa ale yaaniikoha etthu Yesu aaphavela awe ohimya. Maana esumana emosa yaavinre, aahaakuxa arummwa araru, Pedru, Yakobo ni Yohani anarowa omwaako. Okhala wira waari ohiyu, alopwana ale yaahivoliwa ikhove. Okathi Yesu aavekela awe, owo aahithatuwa. Arummwa ale yaahimoona Yesu aaryaka ntoko nsuwa, nto ikuwo sawe saahitteela sinaarya ntoko muthuko.

Nuumala-vo, yaahikhumelela atthu anli, “Moise ni Eliya”. Atthu awo yaahipacerya olavula ni Yesu voohimya sa etthu yaarowa “wiraneya oYerusalemu”. (Luka 9:30, 31) Etthu ene, waari okhwa ni ohihimuxiwa, Yesu aalavunle awe vahinatthi. (Matheyo 16:21) Ovaanela iwe waahooniherya wira muupuwelo wa Pedru waari woohiloka, maana Yesu khaawerya osyaka wiiviwa.

Nuumala ovenya, arummwa ale araru yaahiiwa ni yaahiweha etthu yootikiniha. Nnaamwi yaari yowoonihiwa, yaakhala ntoko wira etthu ele yiiraneya okathi ene yoole, nto Pedru aahihimya wira: “Pwiya, varerenle hiyo okhalaka vava. Nnoteka vava ihema ttharu: emosá yawinyu, ekina ya Moise, ekina-tho y’Eliya”. (Marko 9:5) Niireke Pedru aaphavela oteka iheema iye wira yowoonihiwa ele ehimale?

Nlelo Pedru olavulaka, naahikhumelela neeku noowaarya khwaakhuneela. Nto muneekuni mmo naahiiwanyeya nsu naahimya wira: “Ola ti Mwan’aka onimphentexaka: yola t’osiveliwa waka. Mmwiweleleke yola!” Vaavo yiiwale aya nsu na Muluku, arummwa ale yaahoova, masi Yesu aahaaleela wira: “Venyani! Muhòvé!” (Matheyo 17:5-7) Nuumala ovenya, arummwa ale khiyanwenhe mutthu mukina ohikhanle Yesu paahi. Yowoonihiwa ele yaahimala. Nuumala oxa, yaahikhuruwa omwaako, Yesu khuhimya wira: “Muhimulèle mutthu itthu sònalyanyu, Mwana a mutthu ahinatthi ohihimuwa mokhwani”.—Matheyo 17:9.

Okhumelela Eliya yowoonihiwa ele, ennikumiherya nikoho nna: “Xeeni” arummwa yaakonhe aya wira “awixuttihi a ikano anihimerya-ni wira Eliya t’ompajerya orwa?” Yesu aakhunle so: “Eliya ahorwa tthiri, nto khuhisuweliwa”. (Matheyo 17:10-12) Yesu aamuhimya Yohani Mbatiza, yoowo aavanre muteko ntoko wa Eliya. Maana Eliya aahilokiherya ephiro ya Eliseyo, ntoko siisaale Yohani aalokihenrye awe ephiro ya Kristu.

Tthiri yowoonihiwa ele yaahimulipiha Yesu ni arummwa! Nave yaahooniherya ovuwa wa Kristu Momweneni. Tivonto, awiixutti yaahimoona “Mwana a mutthu arwaka n’Umwene awe”, ntoko Yesu aahimmye awe. (Matheyo 16:28) Ari ene omwaako, arummwa yaahoona ni ‘maitho aya ovuwa wawe wulupalexa’. AFarisi yaahinvekela Yesu ethoonyeryo yooniherya wira aari Mwene othanliwe ni Muluku. Masi Yesu khaavanhe. Awiixutti Yesu aathanlale awe, aahiweemererya woona waarya wawe, etthu yeeyo yaattittimiherya iprofesia sa Omwene. Tivonto, muhoolo mwaya Pedru aalempe awe wira: “Siso àlipihiwa masu a maprofeta ankupalihu”.​—2 Pedru 1:16-19.