Samtang nagtututdo hi Jesus ha mga tawo ha rehiyon han Cesarea Filipos, nga mga 25 ka kilometro an kahirayo tikang ha Bukid Hermon, iginpahibaro niya ha mga apostol an usa nga makapainteres nga sumat: “Ha pagkamatuod, susumatan ko kamo nga an iba nga naninindog dinhi diri mamamatay tubtob nga makita anay nira an Anak han tawo nga naabot ha iya Ginhadian.”—Mateo 16:28.

Sigurado nga naghunahuna an mga disipulo kon ano an karuyag sidngon ni Jesus. Paglabay hin mga usa ka semana, iya igin-upod ngadto ha hitaas nga bukid an tulo han iya mga apostol—hira Pedro, Santiago, ngan Juan. Posible nga gab-i hadto kay ginpipiraw na an mga apostol. Samtang nag-aampo hi Jesus, nagbag-o an iya hitsura. Nakita nira nga an iya nawong nagsilaw sugad hin adlaw ngan an iya panapton naglamrag sugad hin sugâ nga nasanag ha kabusag.

Katapos, nagpakita an duha nga indibiduwal nga hira “Moises ngan Elias.” Nakiistorya hira kan Jesus mahitungod han iya ‘pagbaya nga mahitatabo ha Jerusalem.’ (Lucas 9:30, 31) Matin-aw, an iya pagbaya nagpapasabot han iya kamatayon ngan pagkabanhaw nga iya gin-unabi ha naglabay. (Mateo 16:21) Ini nga pag-istorya nagpapamatuod nga kabaliktaran ha ginsagda ni Pedro, an makaarawod nga kamatayon ni Jesus diri sadang likyan.

Nawara an kapiraw han tulo nga apostol ngan nahipapausa nga nagkinita ngan nagpinamati hira. Bisyon ini, pero baga hin tinuod ini salit hi Pedro sinagbang: “Rabbi, maopay kay nakaupod kami nganhi, salit magtitindog kami hin tulo nga tolda, usa para ha imo, usa para kan Moises, ngan usa para kan Elias.” (Marcos 9:5) Karuyag ba ni Pedro maghimo hin mga tolda basi magpadayon an bisyon?

Samtang nagyayakan pa hi Pedro, nalandongan hira hin malamrag nga dampog ngan may tingog tikang hito nga nasiring: “Ini an akon Anak nga hinigugma, nga akon nalilipayan. Pamati kamo ha iya.” Pakabati han mga disipulo ha tingog han Dios, nanyukbo hira ngan nagkahahadlok gud, pero ginsagda hira ni Jesus: “Buhát kamo, ngan ayaw kahadlok.” (Mateo 17:5-7) Pagbuhat nira, waray na hira iba nga nakita kondi hi Jesus. Natapos na an bisyon. Pagkaaga samtang nalugsad hira ha bukid, gintugon hira ni Jesus: “Ayaw niyo isumat ha bisan hin-o adto nga bisyon tubtob nga banhawon an Anak han tawo.”—Mateo 17:9.

Tungod han pagpakita ni Elias ha bisyon, an mga apostol nakagpakiana: “Kay ano nga nasiring an mga eskriba nga kinahanglan mahiuna pagkanhi hi Elias?” Hi Jesus binaton: “Kinanhi na hi Elias pero waray nira kilalaha hiya.” (Mateo 17:10-12) An gin-uunabi dinhi ni Jesus amo hi Juan nga Parabaptis, nga nagtuman han papel nga pariho han kan Elias. Gin-andam ni Elias an dalan para kan Eliseo, sugad han ginbuhat ni Juan para han Kristo.

Ini nga bisyon nakaparig-on gud kan Jesus ngan ha iya mga apostol! Patiuna ini nga pagpakita han himaya han Ginhadian han Kristo. Salit nakita han mga disipulo “an Anak han tawo nga naabot ha iya Ginhadian,” sugad han iginsaad ni Jesus. (Mateo 16:28) Samtang nakadto ha bukid, hira nagin “mga testigo nga nakakita han iya pagkaharangdon.” Bisan kon nag-aro an mga Pariseo hin tigaman nga magpapamatuod nga hi Jesus an pinili han Dios nga magin Hadi, waray hiya maghatag hin tigaman ha ira. Pero an iya duok nga mga disipulo gintugotan nga makakita han pagbag-o han iya hitsura, nga nagparig-on nga matutuman an mga tagna mahitungod han Ginhadian. Salit ha urhi, hi Pedro nagsurat: “Nagin mas marig-on an amon pagsarig ha tagna.”—2 Pedro 1:16-19.