Jesusajj Pedrompi Santiagompi Juanampi qollut saraqaniskäna ukhajja, waljaniw tantachatäsipkäna. Mä jan waltʼäwiw utjäna. Escribanakajj discipulonakar muyuntasaw jupanakamp jiskhisisipkäna. Jaqenakajj Jesusar uñjasajj wal kusisipjjäna, aruntiriw tʼijunipjjarakïna. Jesusajj akham sasaw jisktʼäna: “¿Kunjjatsa jupanakamp jiskhisisipkta?” sasa (Marcos 9:16).

Mä jaqew Jesús nayraqatar killptʼasisajj säna: “Yatichiri, yoqall wawajaruw juman ukar apanta, jupajj amut demonion mantatawa. Kawkjantï uka demoniojj katjki ukjaruw liwnoqe, wawajan lakapat jupoqow juti, laka chʼakhanakapsa wal tʼurusi, jan chʼamaniw uñjasiraki. Uka demonior alissurapita sasaw discipulonakamar ruwtʼasta, jupanakajj janiw uk lurirjamäpkiti” sasa (Marcos 9:17, 18).

Amuyatajja, escribanakajj uka waynar jan qollañ puedepjjatapatwa discipulonakarojj jiskʼachasipkäna. Jesusajj uka llakit jaqer janïr kamskasas jaqenakarojj sänwa: “Aka tiempon jakir jan wali jaqenaka, janiw jumanakajj Diosar confiyapktati, ¿kunapachkamas jumanakampïskäjja? ¿Kunapachkamarak aguantapjjämasti?” sasa. Ukham sasajj escribanakaruw parlaskäna, jupanakaw Jesusan jan ukankatapat discipulonakar jiskhisipkäna. Llakit awkir uñtasajj Jesusajj akham sänwa: “Uka wawar irptanipjjam” sasa (Mateo 17:17).

Jesusan ukar waynitur jakʼachayapjjäna ukhajja, demoniojj uka waynitur wal thaljäna, oraqeruw liwnoqarakïna. Waynitojj walpun watʼakiskäna, lakapatsa jupoqow jutarakïna. Jesusajj uka waynitun awkiparu akham sasaw jisktʼäna: “¿Qhawqha tiempos jupajj ukhamäjje?” sasa. Jupasti sarakïnwa: “Wawatpach ukhamänjja, jiwayañatakiw sapa kutis uka demoniojj ninarus umarus liwintaraqetu” sasa. Ukatjja  akham sasaw Jesusar ruwtʼasïna: “Jumatejj qollirjamästa ukhajja, sinttʼasipjjakitaya, yanaptʼapjjeta” sasa (Marcos 9:21, 22).

Discipulonakajj janiw uka waynitur qollirjamäpkänti, ukatwa awkipajj wali llaktʼatäskäna. Uka llakit jaqen ruwtʼasitapat akham sasaw Jesusajj chʼamañchtʼäna: “¿Kunatsa nayarojj ‘qollirjamästa ukhajj yanaptʼapjjeta’ sasin sista? Diosar confiyiritakejj taqe kunas lurasikispawa” sasa. Jankʼakiw uka llakit jaqejj akham säna: “¡Nayajj Diosar confiytwa! ¡Wakischi ukhajja, Diosar jukʼamp confiyañatak yanaptʼita!” sasa (Marcos 9:23, 24).

Walja jaqenakaw tʼijunipjjäna, Jesusasti jupanakan uñjkataw demonior toqenoqäna, akham sasa: “Amutu, oqar demonio, nayaw sissma, uka wawat mistum, janipuniw mayampis jupar mantätati” sasa. Uka demoniojj mistuñatakejja, uka wayniturojj jachʼatwa warariyäna, walja kutiw thaljarakïna. Waynitojj jiwatjamaw jaqosiskäna, ukatwa waljanejj akham sapjjäna: “¡Jiwatawa!” sasa (Marcos 9:25, 26). Ukampis Jesusajj waytkäna ukhajja, sartjjänwa, “ukaratpachaw waliptjjäna” (Mateo 17:18). Jesusajj kuntï lurkäna uk uñjasajj wal musparapjjäna.

Jesusajj discipulonakar Diosan arup yatiyir khitkäna ukhajja, jupanakajj demonionakar nayrajj alissupjjerïnwa. Ukatwa jupanakajj mä utan jamasat Jesusar akham sasin jisktʼapjjäna: “¿Kunatsa nanakatakejj uka demonior alissuñajj chʼamäpachäna?” sasa. Jesusajj Diosar jukʼamp confiyañaw faltapjjtam sasaw säna. “Uka kasta demoniojj oracionampikiw mistuspa” sasaw sarakïna (Marcos 9:28, 29). Uka wali chʼamani demonior alissuñatakejja, Diosar taqe chuyma confiyaña ukhamaraki Diosan chʼamap oracionan mayiñaw wakisïna.

Jesusajj akham sasaw parlañ tukuyäna: “Qhanakwa sapjjsma, jumanakatejj mä mostaza jatha ukchʼaksa Diosar confiyapjjasma ukhajja, aka qollurojj ‘akawjat khaya cheqar jittam’ sasaw sapjjasma, ukat uka qollojj jittaspawa. Ukatjja janirakiw kunas jumanakatakejj chʼamäkaniti” sasa (Mateo 17:20). ¡Diosar taqe chuyma confiyañajj wali wakiskiriwa!

Jehová Diosar servisajja, jan walinakana llakinakanwa uñjassna, mä jachʼa qollükaspas ukham jarkʼistaspa. Jiwasatï Diosar taqe chuyma confiyañäni ukhajja, uka jan walinakarojj atipjañäniwa.