Tingki turun Jesus rap dohot si Petrus, si Jakobus dohot si Johannes sian dolok i, diida nasida ma godang halak marpungu. Didapothon nasida ma punguan i. Disi, marsoal do sisean ni Jesus dohot angka siboto surat. Ujungna, disungkun Jesus ma, “Aha do diparsoalhon hamu dohot nasida?”​—Markus 9:16.

Ro ma sahalak baoa marsinggang tu jolo ni Jesus mandok, “Guru, naeng tu ho hian do huboan anakkon, ai ngungu do ibana dibahen suru-suruan na jahat. Molo dirajai suru-suruan na jahat i ibana, didabuhon do ibana tu tano. Margumo-gumo ma babana jala marantukan ma ngingina, dung i gale ma ibana. Hupangidohon do tu angka siseanmu palaohon i, alai ndang tolap nasida.”​—Markus 9:17, 18.

Ra direhei angka siboto surat i do sisean ni Jesus, ala ndang boi dipalao nasida suru-suruan na jahat i. Alani i, andorang so dialusi Jesus amang ni baoa i, didok ma tu angka jolma i, “E hamu sundut na so porsea dohot na lilu, sadia leleng nai ingkon rap ahu dohot hamu? Sadia leleng nai ingkon sabar ahu maradophon hamu?” Sasintongna, tu angka siboto surat i do hatana i. Dung i didok Jesus ma tu amang ni baoa i, “Boan ma ibana tuson.”​—Mateus 17:17.

Dung naeng jonok anakna i tu Jesus, dibahen suru-suruan na jahat i ma ibana marsitoltol jala didabuhon tu tano. Marguling-guling ma anakna i jala margumo-gumo babana. Disungkun Jesus ma, “Nunga sadia leleng ibana songon i?” Dialusi ma, “Sian na gelleng. Jotjot do naeng didabuhon suru-suruan na jahat i  ibana tu api dohot tu aek laho pamatehon ibana. Molo tarpamalum ho do ibana, asi ma roham jala urupi ma hami.”​—Markus 9:21, 22.

Nunga mandele amangna i, ai ndang tarpamalum sisean ni Jesus anakna. Alai dipatogu Jesus ma rohana, ninna ma, “Boasa dohononmu ‘molo tarpamalum ho urupi ma hami’? Ai saluhut do tarpatupa tu halak na porsea.” Pintor dialusi amang ni baoa i ma, “Porsea do ahu! Urupi ma ahu na hurang porsea on!”​—Markus 9:23, 24.

Lam godang ma halak na ro mangida Jesus. Disonggak Jesus ma suru-suruan na jahat i, ninna ma, “E ho suru-suruan na jahat, na mambahen ngungu jala nengel. Huparentahon ma tu ho, laho ma ho sian ibana jala unang be ro ho tu ibana!” Dibahen suru-suruan na jahat i ma marsurak baoa i jala marsitoltol. Dung i laho ma suru-suruan na jahat i jala peak ma baoa i. Gabe didok angka jolma i ma, “Nunga mate be ibana!” (Markus 9:25, 26) Alai ditogu Jesus ma tangan ni baoa i jala “laos satongkin i malum ma ibana”. (Mateus 17:18) Longang ma roha ni halak mangida i.

Sasintongna, tingki disuru Jesus angka siseanna marbarita, nunga boi dipalao nasida suru-suruan na jahat. Alani i, disungkun nasida ma Jesus, “Boasa ndang tarpalao hami suru-suruan na jahat i?” Dipaboa Jesus ma na hurang togu do haporseaon ni nasida jala ninna ma, “Holan marhite tangiang do boi tarpalao sisongon on.” (Markus 9:28, 29) Tangkas ma, asa boi mangusir suru-suruan na jahat, ingkon togu do haporseaon ni sisean i jala martangiang mangido huaso sian Debata.

Didok Jesus ma muse, “Tutu do na hudok on tu hamu, molo adong haporseaonmu nasa batu ni siarum, boi do dohononmu tu dolok on, ‘Pinda ma ho tusan,’ pinda do i. Jala ndang adong na so boi bahenonmu.” (Mateus 17:20) Tutu, balga do laba ni haporseaon i.

Godang do na mangambati hita manomba Debata. Dipatudos do i songon dolok na mansai balga. Alai molo marhaporseaon hita boi do i taadopi.