Yesu, Petelo, Yakoba ne Yoano byo bafumine ku mutumba, bataaine jibumba jikatampe. Kwamwekele kintu kyatama. Banembeshi bazhokolokele baana banji ba bwanga saka bepachika nabo. Jibumba byo jamwene Yesu, jakuminye bingi kabiji jamunyemejile ne kumwimuna. Wibashikishe’mba: “Mubena kwipachika nabo pa ñanyi kintu?”—Mako 9:16.

Umo mu jibumba waishile kufukama kwi Yesu ne kumwambila’mba: “Mufunjishi, naji kuleta mwanami wa mulume kwi anweba, mambo uji na mupashi wamulengela kwikala kamaama. Umvwe wavulumuka, umutaya panshi, ne kapofu ku kanwa kabiji ushenka ku meno ne bulume bumupwa. Naji kwambila baana benu ba bwanga namba bamupangemo, bino baji kukankalwa.”—Mako 9:17, 18.

Kyamweka banembeshi balengulwilenga baana ba bwanga na mambo a kukankalwa kubuka awa kalombwana. Yesu kechi wakumbwile yewa mwanamulume wapelejilwe ne, bino waambijile jibumba’mba: “Anweba kisemi kyabula lwitabilo kabiji kyabula koloka, bimye binga byo nkekala nenu? Bimye binga byo nkemulekelako mambo?” Kyamweka Yesu wakajipijilenga banembeshi bakatezhenga baana banji ba bwanga kimye kyo afuminepo. Kepo aambijile yewa shanji mwana amba: “Muletai kuno.”—Mateo 17:17.

Bino kalombwana byo aishilenga kwi Yesu, ndemona wajinga mwi aye wamuponeshe panshi ne kumuvulañanya. Uno kalombwana waalañenenga panshi ne kapofu ku kanwa. Yesu washikishe shanji mwana amba: “Watendekele ñanyi kimye kuba bibye?” Aye wamukumbwile’mba: “Kufumatu ku bwanyike, javula umutaya mu mujilo ne mu mema kukeba kumwipaya.” Kepo uno mwanamulume amusashijile Yesu amba: “Umvwe paji kyo mwakonsha kwitubila, tubilai lusa ne kwitukwasha.”—Mako 9:21, 22.

Baana ba bwanga ba kwa Yesu byo bakankelwe  kubuka mwananji, shanji mwana wamwene’mba kyapwa bunga bwapwila pa mpuki. Yesu byo amwene lukatazho lwajinga na uno muntu, wamukoseshe’mba: “Mambo ka o ubena kwambila’mba, ‘Umvwe mwakonsha’? Mambo uji na lwitabilo kafwako kintu nangwa kimo kyo akankalwa kuba ne.” Ponkapotu shanji mwana wabijikile’mba: “Nji na lwitabilo! Nkwashai nkoseshe lwitabilo lwami!”—Mako 9:23, 24.

Yesu byo amwene’mba jibumba jibena kunyemena ko bajinga, wakajipijile ndemona amba: “Obewa mupashi kamaama kabiji washinka matwi, nakukambizha namba, lupukamo mwi aye kabiji kutwelamo jibiji ne!” Ndemona pa kulupukamo, walengejile kalombwana kubijika jibiji ne kumuvulañanya. Uno mwana walaajiletu sulubya kya kuba bantu bavula baambilenga’mba: “Wafwa!” (Mako 9:25, 26) Bino Yesu byo akwachile kalombwana ku kuboko, wamwimenye kabiji “wabukilwe pa kyonkakya kimye.” (Mateo 17:18) Kine, bantu bakuminye bingi pa kumona byaubile Yesu.

Kimye kitanshi Yesu kyo atumine baana ba bwanga na kusapwila, bapangilenga bandemona. Onkao mambo, byo batwelele mu nzubo bamushikishe Yesu ku mbaji amba: “Mambo ka o twaji kukankelwa kumupangamo?” Yesu wibalumbulwijile kuba’mba bakankelwe kumupangamo ndemona mambo a kubula lwitabilo. Waambile’mba: “Uno mupashi wakonsha kufumamotu kana na lulombelo.” (Mako 9:28, 29) Bakebewenga lwitabilo lwakosa ne kulomba Lesa amba ebape bulume bwa kwibakwasha kupangamo ndemona wajinga na bulume.

Kepo Yesu apezhezheko kwamba’mba: “Kine nemwambila namba, inge mwaikala na lwitabilo nobe luchacha wa masitate, mukambila uno mutumba amba, ‘Fuma papo uye popa,’ ne aye ukafumapo, kabiji kafwako kintu kyo mukakankalwa kuba ne.” (Mateo 17:20) Kine, lwitabilo lukwasha bingi.

Mikiika ne makatazho alengela kubula kwingila bulongo mwingilo wa Yehoba akonsha kumweka nobe mitumba ikatampe ya kukankalwa kukanjila nangwa kupalañanya. Pano bino, umvwe twaikala na lwitabilo, tukashinda mikiika ne makatazho aji nobe mitumba.