Jesu, Pitrosi, Jakobo, ni Joani habashetumuka kuzwa fa lilundu bakatana buñata bobutuna. Kunani butata. Bañoli bainzi hamoho ni balutiwa, inze bakananisana. Batu batabezi kubona Jesu mi bamumatela kuyo mulumelisa. Jesu ubabuza kuli: “Mukananañi ni bona?”—Mareka 9:16.

Muuna yomuñwi mwahalaa buñata ukubama fapilaa Jesu mi uli: “Muluti, nitisize mwanaka ku wena kakuli unani moya omupalelwisa kubulela. Kai ni kai kou muswalela, umuwisezanga fafasi, mi uzwanga lufulo kwa mulomo ni kukweca meeno mi ufelelwanga ki maata. Nenikupile balutiwa bahao kuli bauleleke kono nebapalezwi kueza cwalo.”—Mareka 9:17, 18.

Kubonahala kuli bañoli basweli kunyaza balutiwa kakuli bapalezwi kufolisa mushimani yo. Ka mukwa ocwalo, kufita kualaba ndate yaziyelehile yo, Jesu ubulelela buñata kuli: “Mina lusika lolusina tumelo ni lolukopami, nikaina ni mina ni kuitiisa ni mina kuisa lili?” Manzwi ao a kalimelo uabulelela bañoli babakatazanga balutiwa bahae ka nako yasiyo. Jesu ufetuhela ku ndate yaziyelehile yo, mi uli: “Tisa mwanaa hao kwanu.”—Luka 9:41.

Mushimani hanze aatumela Jesu, mudimona oku yena umuwiseza fafasi ni kumunyakaulisa maswe. Mushimani uzwelapili kualabana fafasi mi uzwa lufulo kwa mulomo. Jesu ubuza ndate yo kuli: “Ukalile lili kuezanga cwana?” Uaalaba kuli: “Kuzwa feela kwa bwanana bwahae, mi hañata moya wo umunepelanga mwa mulilo ni mwa mezi kuli umubulaye.” Muuna yo ukupa kuli: “Haiba wena wakona kueza sesiñwi, haku luutwele makeke mi ulutuse.”—Mareka 9:21, 22.

 Ndate yo uziyelehile hahulu, kakuli mane nihaiba balutiwa ba Jesu bapalezwi kumutusa. Jesu ualaba muuna yaziyelehile yo, mi umususueza ka kubulela kuli: “Uli, ‘Haiba wakona’! Hanili lika kaufela zakonahala ku mutu yanani tumelo.” Honafo ndatahe mwana uhuwa kuli: “Ninani tumelo! Haku nituse moifokola tumelo yaka!”—Mareka 9:23, 24.

Jesu ubona buñata inze buakufela ku yena. Jesu ukalimela mudimona fapilaa batu kaufela, uli: “Wena moya otahiseza mutu kuba simumu ni susu, nakulaela, zwa ku mushimani yo mi usike wakena ku yena hape!” Hauzwa ku yena, mudimona utahisa kuli mushimani ahuwe ni kunyakaula hahulu. Hamulaho wa fo, mushimani ulapama asanyanganyi. Batu hababona cwalo, bali: “Ushwile!” (Mareka 9:25, 26) Kono Jesu haswala mushimani kwa lizoho, mushimani wayema mi ‘wafola ka yona nako yeo.’ (Mateu 17:18) Batu bakomokiswa hahulu ki za eza Jesu.

Kwamulaho, Jesu hanaalumile balutiwa kuli bayo kutaza, nebakonile kuleleka madimona. Kono cwale, habali mwa ndu banosi, babuza Jesu kuli: “Ki kabakalañi luna hane lupalezwi kuuleleka?” Jesu utalusa kuli ki kabakala kuli habana tumelo, uli: “Mufuta wo ukona feela kuzwa ka tapelo.” (Mareka 9:28, 29) Nebatokwa kuba ni tumelo yetiile ni kulapela kukupa maata a Mulimu kuli abatuse kuleleka mudimona omaata.

Jesu ufeza ka kubulela kuli: “Kakuli nimibulelela niti nili: Haiba munani tumelo yelikana feela ni peu ya masitete, mukakona kubulelela lilundu le kuli: ‘Shimbuluka fa, uye fale,’ mi likashimbuluka, mi hakuna sesika pala ku mina.” (Mateu 17:20) Tumelo inani maata luli!

Butata bobulutibela kueza zwelopili mwa sebelezo ya luna ku Jehova bukona kubonahala inge lilundu lelituna hahulu lelisa koni kusutiswa. Kono haluba ni tumelo, lwakona kutula butata bo buswana sina lilundu lelituna.