Etyi Sesusi, na Petulu, na Tiaku, na Suau vatunda komphunda, avavasi ovanthu ovanyingi veliongiya. Ankho vena otyitateka. Ovahoneki vovitumino veliseta novalongwa, vekahi nokuveyayesa. Etyi ovanthu vamona Sesusi avahambukwa, avahatekela kwe. Sesusi apulu okuti: “Oityi mukahi nokuveyayesila?” — Maluku 9:16.

Omulume umwe atundu povanthu ovo, aikila konongolo pu Sesusi ati: “Mulongesi, ame naeta omona wange mokonda una otyilulu tyihemuyeke apopie. Apa tyimuvasa, tyimuyumba pohi, ahimbika okutunda onthutu momulungu nokukueka omayo, ahakala nononkhono. Andyiiti kovalongwa vove opo vemupole-tyo, mahi kavetyivilile.” — Maluku 9:17, 18.

Tyipondola, ovahoneki vovitumino ankho vekahi nokuyayesa ovalongwa mokonda kavetyivilile okuhakula omukuendye oo, pahe vevelinga omukuele. Ngotyo, Sesusi nkhele ahakumbulula tate yomukuendye, ankho wasukalala unene, mahi apopila ovanthu okuti: “Onwe vanthu vomuvo uno vokuhena ekolelo, onondingavivi alo nalupi mandyituala-ko okukala no onwe? Alo nalupi mandyitualako okukoleleya ovipuka mulinga?” Sesusi wapopila onondaka ombo ovahoneki vovitumino, ankho vekahi nokuetela ovitateka ovalongwa vae etyi ankho ehepo. Sesusi atale ku tate yomona ankho wasukalala unene, ati: “Mueetei kuno.” — Mateusi 17:17.

Etyi omukuendye ankho ekahi nokufuena ku Sesusi, otyilulu atyimuyumbu pohi, ahimbika okusanina unene. Omukuendye atualako okukulaunguta pohi, otyo ahupa onthutu. Sesusi apulu okuti: “Tyemuvasa nalupi?” Tate yae akumbulula okuti: “Tunde poututu. Ovikando ovinyingi tyimutokesila motupia no momaande opo tyimuipae.” Ati: “Inkha ove una etyi upondola okulinga, tulinge-vo onkhenda, tukuateseko.” — Maluku 9:21, 22.

Tate yomukuendye oo ankho utupu vali ekevelelo mokonda alo umwe ovalongwa va Sesusi kavetyivilile okumukuatesako. Sesusi akumbulula etyi emuita nonondaka mbupameka, ati: “Oityi upopila okuti: ‘Inkha upondola’? Komunthu wokuna ekolelo, ovipuka aviho vitavela okuvilinga.” Liwa-liwa he yomona apopila peulu okuti: “Ame ndyina ekolelo! Nkhuateseko okuyawisa vali ekolelo liange!” — Maluku 9:23, 24.

Sesusi amono ovanthu ankho vekahi nokuhateka no kwe. Ovanthu aveho ankho vemuete iya Sesusi apopila otyilulu okuti: “Tyilulu otyihita-mulungu, notyihita-matwi, ame ndyikupopila okuti, tunda-mo, uhakondoke-mo vali!” Etyi ankho tyikahi nokutunda momukuendye oo, eliyavela otyo asanina. Omukuendye ahapikita vali. Etyi ovanthu vetyimona, ovanyingi avati: “Omona wankhia!” (Maluku 9:25, 26) Mahi etyi Sesusi emukuata mokuvoko, omukuendye akatuka “aveluka poola yatyo.” (Mateusi 17:18) Ovanthu avahuvu unene netyi Sesusi alinga.

Potete, Sesusi watumine ovalongwa vae vakaivise, avetyivili okutaata ovilulu. Mahi pahe, etyi ankho vekahi aveke meumbo limwe, avemupulu okuti: “Omokonda yatyi onthue tuhetyivililile okumupola otyilulu?” Sesusi evepopila okuti omokonda mutupu ekolelo liapama, ati: “Otyilulu otyo tyitunda vala nelikuambelo.” (Maluku 9:28, 29) Ankho vesukisa ekolelo liapama, nokulikuambela okuita ekuateso lya Huku pala okutaata otyilulu ankho tyina epondolo enene.

Sesusi amanuhula okupopia, ati: “Ame ndyimupopila okuti: Inkha mukala nekolelo lilifwe poñgima yo mostarda, mamupopila omphunda ei okuti: ‘Tunda apa enda no oko’, aiyende, iya natyike matyimupono.” (Mateusi 17:20) Ekolelo lina epondolo enene!

Ovitateka tukala navio vipondola okututalameka okuundapa unene movilinga vya Siovaa, pamwe vikala ngatyina omphunda ihetavela okuipola-po. Mahi inkha tulinga ononkhono opo tukale nekolelo tupondola okufinda ovitateka ovio vikahi ngomphunda.