Ua ō ifo nei Iesu, Peteru, Iakopo ma Ioane mai i le mauga, ma ua latou vaaia ai se motu o tagata e toʻatele. E iai le mea ua tupu. O loo siʻomia ona soo e le ʻautusiupu ma fefinauaʻi ma i latou. Ina ua iloa atu e le motu o tagata Iesu, ona taufaiofo ai lea o i latou ma tamomoʻe atu e faafeiloaʻi o ia. Ua fesili atu Iesu: “O le ā le mea ua outou fefinauaʻi ai ma i latou?”—Mareko 9:16.

Ua sau se tamāloa mai i le motu o tagata ma tootuli i luma o Iesu, ma faapea atu iā te ia: “Le Aʻoaʻo e, ua ou aumaia loʻu atalii ona o loo iā te ia se agaga gūgū; ma o so o se mea lava e puʻea ai o ia e le agaga leaga e na te lafo o ia i le eleele, e fauā ma ū ona nifo, ma mou atu lona malosi. Ona ou fai atu lea i ou soo ina ia tuliese o ia, ae e latou te leʻi mafaia.”—Mareko 9:17, 18.

E foliga mai o loo faitio ma tauemu le ʻautusiupu i le ʻausoo, ona ua lē mafai ona latou faamālōlōina le tama. O lea, nai lo o le tali atu o Iesu i le tamā lotomafatia, ae ua ia fetalai atu i le motu o tagata: “Le tupulaga e, lē faatuatua ma le faapiʻopiʻo, o le ā le umi ou te feagai ai ma outou? O le ā le umi ou te faapalepale ai iā te outou?” E faatatau atu nei faaupuga malolosi i le ʻautusiupu, o ē sa faitioina soo o Iesu. Ua faliu atu Iesu i le tamā lotomafatia ma faapea atu: “Ia aumai o ia iā te aʻu.”—Mataio 17:17.

A o faalatalata atu le tama iā Iesu, ua lafo e le temoni o ia i lalo ma matuā faataafiti o ia. Ua taavale solo le tama i luga o le palapala, ma ua fauā lona gutu. Ua fesili atu Iesu i le tamā o le tama: “O le ā le umi talu ona tupu o lenei mea iā te ia?” Ua tali mai o ia: “Na amata mai lava a o laʻitiiti o ia; e masani ona lafo o ia e le agaga i le afi ma le vai ina ia faaumatia ai o ia.” Ua ʻaiʻoi atu lenei tamā iā Iesu: “Afai e te mafaia ona faia o se mea, ia e alofa ma fesoasoani mai iā i matou.”—Mareko 9:21, 22.

Ua matuā manaʻomia e lenei tamā se fesoasoani, auā e oo lava i soo o Iesu e lē o mafai ona latou faamālōlōina lona atalii. O lea, ina ia tali atu i le talosaga a lenei tamā, ua avatu ai e Iesu se faamautinoaga e faapea: “Aiseā ua e faapea mai ai, ʻAfai e te mafaia’? E te iloa, e mafai ona faia mea uma i se tasi pe a faatuatua o ia.” Ua alaga atu le tamā: “Ua ou faatuatua! Ia e fesoasoani mai ina ia malosi loʻu faatuatua!”—Mareko 9:23, 24.

Ua silafia e Iesu ua taufetuli uma mai le motu o tagata iā te ia, ona ia vavao ai lea i le temoni e faapea: “O oe lenā le agaga gūgū ma tutuli, ou te fai atu iā te oe ia e alu i fafo, ma aua neʻi e toe alu i totonu iā te ia.” A o alu ese le temoni, ua alaga leotele le tama ona o lenei agaga leaga, ma ua lilivau ai o ia. Ua vaai atu tagata ua taatia mai le tama, ma ua latou faapea atu: “Ua oti o ia!” (Mareko 9:25, 26) Peitaʻi, ina ua tago atu Iesu i le lima o le tama, ona tulaʻi ai lea o ia ma ua malosi. (Mataio 17:18) Ua matuā ofo tagata i le vavega ua faia e Iesu.

Ina ua aauina atu e Iesu ona soo e talaʻi, sa mafai ona latou tutuliesea temoni. Ua iai nei na o i latou i se fale, ma ua fesili atu le ʻausoo iā Iesu: “Aiseā ua lē mafai ai ona matou tulia le agaga?” Ua faamatala atu e Iesu, o le māfuaaga ona o le itiiti o lo latou faatuatua. Ua fetalai atu o ia: “E na o le tatalo e mafai ona tuliese ai lea ituaiga o agaga.” (Mareko 9:28, 29) Ina ia mafai ona tuliesea le temoni, e manaʻomia ona malosi le faatuatua ma ia tatalo atu mo le fesoasoani a le Atua.

Ua faaiʻu upu a Iesu i le fetalai atu: “E moni ou te fai atu iā te outou, Afai e pei lo outou faatuatua o le fatu o le sinapi, tou te fai atu i lenei mauga, ʻIa siitia oe i o,’ ona siitia ai lea, ma e leai se mea tou te lē mafaia.” (Mataio 17:20) Maʻeu le malosi e mafai ona oo i ai le faatuatua!

O luʻi ma faigatā ia e taofia ai lo tatou agaʻigaʻi i luma i le auaunaga iā Ieova, e ono avea e pei o ni mauga e sili ona tetelē ma e lē mafai ona siitia. Peitaʻi, pe afai e tatou te atiaʻe le faatuatua, o le a mafai ona tatou manumalo mai ai i na luʻi ma faigatā.