Te Yesus, Petrus, Yakobus nanga Yohanes saka fu a bergi den e si wan bigi ipi sma. Wan sani no bun. Den leriman fu Wet e tanapu lontu den disipel èn den e haritaki nanga den. Den sma breiti fu si Yesus èn den e lon kon taki en odi. A e aksi den: „Fu san ede unu e haritaki nanga den?”​—Markus 9:16.

Na mindri den someni sma wan man e saka kindi na fesi Yesus èn a e taki: „Leriman, mi tyari mi manpikin kon na yu, bika a abi wan yeye na en tapu di meki taki a babaw. Awansi pe na ogri yeye e kisi a boi, a e trowe en go na gron, dan en mofo e puru skuma, a e kaw tifi èn a e kon swaki. Mi taigi den disipel fu yu fu yagi a yeye puru na a boi tapu, ma den no ben man.”​—Markus 9:17, 18.

Soleki fa a sori, dan den leriman fu Wet e krutu nanga den disipel fu di den no man dresi a boi. Kande den e spotu den srefi. Na presi fu piki a papa di bruya srefisrefi, Yesus e taki nanga den sma. A e taigi den: „Ke un sondu sma di no abi bribi, o langa mi musu tan nanga unu ete? O langa mi musu frudrage unu ete?” A no de fu taki dati di Yesus taki a seryusu sani disi a ben e taki nanga den leriman fu Wet di ben e muilek den disipel di a no ben de nanga den. Dan a e drai luku a papa fu a boi èn a e taki: „Tyari en kon gi mi.”​—Mateyus 17:17.

Te a boi e kon na Yesus na ogri yeye e trowe en na gron èn a e meki a kisi hebi stoipi. A boi e tan lolo na gron èn en mofo e puru skuma. Yesus e aksi a papa: „O langa kaba disi e pasa nanga en?” A papa e piki: „Sensi di a pikin. Ibri leisi a yeye e trowe en go na ini faya èn na ini  watra fu kiri en.” Dan a e begi Yesus: „Efu yu man du wan sani, dan abi sari-ati nanga wi èn yepi wi.”​—Markus 9:21, 22.

A papa no sabi moro san fu du fu di den disipel fu Yesus srefi no man yepi a boi. Fu di a man e begi Yesus so te, meki Yesus e gi en a deki-ati disi: „Fu san ede yu e taki: ’Efu yu man’? Gi wan sma di abi bribi ala sani man.” Wantewante, a papa e bari: „Mi abi bribi! Yepi mi efu mi e mankeri bribi!”​—Markus 9:23, 24.

Yesus e si taki den sma e lon kon na en. Ala den sma e luku te Yesus e piri-ai gi na ogri yeye. A e taki: „Yu ogri yeye di e meki sma babaw èn dofu, mi e gi yu a komando fu komopo na a boi tapu èn fu no go na en tapu moro.” Te na ogri yeye e komoto na a boi tapu a e meki a boi bari bun tranga èn a e meki a kisi stoipi someni leisi. Dan a boi e didon sondro fu buweigi. Te den sma e si disi, dan furu fu den e taki: „A dede!” (Markus 9:25, 26) Ma te Yesus e teki a boi na en anu, a boi e opo èn a e „kon betre wantewante” (Mateyus 17:18). A no de fu taki dati den sma e fruwondru fu a sani di Yesus du.

Di Yesus seni den disipel fu go preiki, den ben man puru ogri yeye na sma tapu. Fu dati ede, te den wawan de na ini wan oso, den e aksi Yesus: „Fu san ede wi no ben man yagi a yeye puru na a boi tapu?” Yesus e sori den taki den no ben man du dati fu di den no ben abi nofo bribi. A e taigi den: „Na begi wawan kan puru a sortu yeye disi” (Markus 9:28, 29). Fu man puru a tranga ogri yeye dati na a boi tapu, den ben musu abi tranga bribi èn den ben musu begi Gado fu yepi den.

Te fu kaba Yesus e taki: „Fu tru mi e taigi unu: Efu a bribi fu unu pikin leki wan mosterd-siri, dan unu o man taigi a bergi disi: ’Opo fu dya go drape’, èn a bergi o opo ensrefi go drape. Noti sa de di unu no man du” (Mateyus 17:20). Iya, tranga bribi kan meki wan sma du bigi sani!

Son sani noso problema kan meki en muilek gi wi fu go na fesi na ini a wroko fu Yehovah. Den sani disi de leki bigi bergi na tapu wi pasi. Ma efu wi e tranga wi bribi, dan wi o man wini den problema disi.