Paglugsad nira Jesus, Pedro, Santiago, ngan Juan tikang ha bukid, nakatapo nira an damu nga tawo. May nahitatabo nga diri maopay. Ginpapalibotan han mga eskriba an mga disipulo ngan nakikigdiskusyon ha ira. Pakakita han mga tawo kan Jesus, nasurprisa hira ngan nandadlagan basi tapoon hiya. Hiya nagpakiana: “Ano an gindidiskusyonan niyo ngan han mga disipulo?”—Marcos 9:16.

Usa nga lalaki nga upod han damu nga tawo an linuhod kan Jesus ngan nagsumat: “Magturutdo, gindara ko nganhi ha imo an akon anak nga lalaki kay ginsaniban hiya hin espiritu salit nangula hiya, ngan kon ginpapasakitan hiya hito natutumba hiya ha tuna, ngan nagbubura an iya baba, nangingigot an ngipon, ngan nagluluya hiya. Ginsidngan ko an imo mga disipulo nga pagawson ito, pero waray nira ito mapagawas.”—Marcos 9:17, 18.

Posible nga ginpapakaraot han mga eskriba an mga disipulo tungod kay waray nira matambal an bata, bangin gintatamay pa ngani an ira pangalimbasog. Salit imbes nga batunon an nababaraka nga tatay, nakiistorya hi Jesus ha mga tawo: “Waray pagtoo ngan matinalapason nga henerasyon, tubtob san-o ako makikig-upod ha iyo? Tubtob san-o ako magpapailob ha iyo?” Inin mapwersa nga mga pulong sigurado nga para ha mga eskriba nga nakigdiskusyon ha iya mga disipulo han waray hiya. Katapos, ginsidngan ni Jesus an nababaraka nga tatay: “Dad-a hiya ha akon.”—Mateo 17:17.

Han nadaop na an bata kan Jesus, gintumba hiya ngan ginpakisaykisay gud han demonyo nga nagsanib ha iya. Nagpuropulilid hiya nga nagbubura an baba. Ginpakianhan ni Jesus an tatay: “Kakan-o pa ini nagtikang mahitabo ha iya?” An tatay binaton: “Tikang pa han iya kabata, ngan agsob hiya ilabog ha kalayo ngan ha tubig basi patayon hiya.” Nakimalooy an tatay: “Pero kon may mahihimo ka, malooy ka ha amon ngan buligi kami.”—Marcos 9:21, 22.

Desperado na an tatay tungod kay bisan an mga disipulo ni Jesus waray makabulig ha ira. Ha pagbaton han duro nga pakimalooy han tatay, hi Jesus nagpasarig: “Kay ano nga nasiring ka, ‘Kon may mahihimo ka’? Para ha usa nga may pagtoo, mahihimo an ngatanan.” An tatay nagyakan dayon ha daku nga tingog: “May pagtoo ako! Buligi ako nga magmarig-on an akon pagtoo.”—Marcos 9:23, 24.

Nakita ni Jesus an mga tawo nga nandadlagan tipahirani ha iya. Samtang nagkikita hira ngatanan, ginsaway ni Jesus an demonyo: “Ikaw nga espiritu nga nakakapangula ngan nakakapabungol, ginsusugo ko ikaw nga gumawas ha iya ngan ayaw na pagsulod utro ha iya”! Samtang nagawas an demonyo, ginpaguliat hito an bata ngan ginpakisaykisay hin damu ka beses. Katapos, an bata waray na magkiwa. Han makita ini han damu nga tawo, hira nagsiring: “Patay na hiya!” (Marcos 9:25, 26) Pero han ginkaptan ni Jesus an kamot han bata, binuhat hiya ngan ‘nag-opay hito mismo nga oras.’ (Mateo 17:18) Syempre, nahipausa an mga tawo ha ginbuhat ni Jesus.

Ha naglabay, han ginsugo ni Jesus an mga disipulo nga magsangyaw, nakapagawas hira hin mga demonyo. Salit han nakadto na hira ha usa nga balay ngan hira-hira na la, nagpakiana hira kan Jesus: “Kay ano nga waray namon ito mapagawas?” Iginsaysay ni Jesus nga tungod ito han kakulang nira hin pagtoo, hiya nagsiring: “Ito nga klase mapapagawas la pinaagi han pag-ampo.” (Marcos 9:28, 29) An marig-on nga pagtoo upod an pag-ampo para han bulig han Dios kinahanglan basi mapagawas an gamhanan nga demonyo.

Ha pagtapos, hiya nagsiring: “Ha pagkamatuod, susumatan ko kamo: Kon may pagtoo kamo nga bisan sugad la kagutiay han liso han mustasa, ini nga bukid mabalhin kon sidngan niyo, ‘Balhin ngadto,’ ngan mababalhin ito, ngan waray imposible ha iyo.” (Mateo 17:20) Daku gud an nahihimo han pagtoo!

An mga problema ngan kakurian nga nakakaulang ha pag-uswag ha pag-alagad kan Jehova sugad hin literal nga bukid nga daku gud ngan permanente. Pero kon paparig-unon naton an aton pagtoo, malalamposan naton an sugad-bukid nga mga problema ngan kakurian.