Dung sian Kaesarea Pilippi, borhat ma Jesus dohot angka siseanna tu Kapernaum di na so pamotoan ni angka jolma i. (Markus 9:30) On ma tingki na denggan di Jesus laho mangurupi angka siseanna asa rade mangulahon ulaon na laho lehononna. Ai na laho mate nama Jesus. Didok ma, “Pasahatonna ma Anak ni jolma i tu angka musuna, jala bunuon ni nasida ma ibana. Alai, hehe do ibana di ari patoluhon.”​—Mateus 17:22, 23.

Sasintongna, ndang pola tarsonggot be angka siseanna mambege i, ai nunga hea dipaboa Jesus i tu nasida. Alai tingki i ndang porsea si Petrus. (Mateus 16:21, 22) Asing ni i, marhite parnidaan nunga dibege apostel na tolu i taringot tu “parlaho” ni Jesus. (Lukas 9:31) Gabe “lungun ma roha” ni angka siseanna mambege i, nang pe ndang diantusi nasida dope sude lapatan ni hata i. (Mateus 17:23) Alai ndang barani nasida manungkun i tu Jesus.

Sahat ma nasida di Kapernaum, huta ni angka apostelna. Disi, didapothon angka sijalo pajak ni bagas joro ma si Petrus. Ra, naeng mangalului sala ni Jesus do nasida, disungkun ma si Petrus, “Digarar gurumuna i do pajak [ni bagas joro] na dua drakhma i?”​—Mateus 17:24.

Dialusi si Petrus ma, “Digarar.” Nunga diboto Jesus na masa i andorang so masuk si Petrus tu jabu i. Alani i, pintor disungkun Jesus ma ibana, “Boha do pandapotmu Simon? Sian ise do dijalo angka raja ni portibi on guguan manang pajak? Sian angka anakna do manang sian halak na asing?” Dialusi si Petrus ma, “Sian halak na asing.” Dung i, didok Jesus ma, “Tutu, alani i ndang ingkon manggarar pajak angka anakna i.”​—Mateus 17:25, 26.

Raja ni saluhut hasiangan on do Ama ni Jesus. Jala Ibana do disomba sude jolma na di bagas joro i. Antong ndang ingkon manggarar pajak Jesus. Alai, didok Jesus ma, “Unang ma gabe partuktuhan hita di nasida. Laho ma ho mangkail tu laut. Buat ma dengke na parjolo dapotmu, bungka ma baba ni dengke i jala dapotmu ma sada logam perak [manang, opat drakhma]. Buat ma i jala garar ma tu nasida bahen pajak tu hita na dua.”​—Mateus 17:27.

Sasintongna, adong do na naeng sungkunon ni siseanna i tu Jesus. Ai saleleng di pardalanan tu Kapernaum marsoal do nasida taringot tu ise sian nasida na umbalga di Harajaon i. Alai nunga diboto Jesus i. Alani i, andorang so disungkun nasida didok Jesus ma, “Aha do diparsoalhon hamu di dalan i?” (Markus 9:33) Maila jala sip ma angka sisean i. Alai ujungna disungkun nasida ma, “Ise do na umbalga di Harajaon banua ginjang i?” (Mateus 18:1) Mabiar do nasida laho manungkun taringot tu hamamate ni Jesus, alai ndang mabiar nasida manungkun taringot tu hasangapon na laho jaloon ni nasida.

Nang pe nunga naeng tolu taon angka sisean i rap dohot Jesus, alai marsoal dope nasida taringot tu ise na umbalga sian nasida. Boasa songon i? Ala jolma na mardosa dope nasida. Jala nasida pe mangolu di tonga-tonga ni angka pamimpin ni agama na sai mangalului hasangapon. Asing ni i, olo do ra didok roha ni si Petrus na umsangap ibana sian  donganna, ala nunga dijanjihon Jesus na laho lehononna “kunci” ni Harajaon tu ibana. Jala songon i ma nang pangkilalaan ni si Jakobus dohot si Johannes, ala diida nasida do hasangapon ni Jesus di parnidaan na di dolok i.

Alani i, ringkot do nasida dipasingot. Dijou Jesus ma sahalak dakdanak tu tonga-tonga ni nasida jala ninna ma, “Molo ndang muba hamu jala gabe songon dakdanak on, ndang masuk hamu tu Harajaon banua ginjang i. Alani i, manang ise na patutoru dirina songon dakdanak on, ibana ma na umbalga di Harajaon banua ginjang i. Jala manang ise na manjalo na songon dakdanak on alani goarhu, na manjalo ahu do i.”​—Mateus 18:3-5.

Denggan situtu do cara ni Jesus mangajari sieanna! Ndang muruk ibana jala ndang didok ibana holan na mangalului hasangapon do angka siseanna i. Alai dipangke Jesus do dakdanak gabe tudosan laho mangajari nasida. Ai ndang hea dakdanak mangalului hasangapon jala naeng ma nian songon i angka siseanna. Ujungna didok Jesus ma, “Manang ise na ummetmet di hamu, ibana do na umbalga.”​—Lukas 9:48.