I nun nga Zezi o Sezare Filipu mɛn’n nun lɔ’n, ɔ kacili, kpɛkun ɔ yoli ba yasua mɔ mmusu kle i yalɛ’n i juejue. Siɛn’n, ɔ su kɔ Kapɛɛnaɔmun. Ɔ nin i sɔnnzɔnfuɛ’m be ngunmin yɛ be kɔ-ɔ. Afin ɔ “kunndɛman kɛ sran si sɔ.” (Marki 9:30) Atin’n su’n, ɔ kannin junman nga i sɔnnzɔnfuɛ’m bé wá dí’n, i ndɛ kleli be. Asa ekun’n, ɔ kɛnnin i wie’n i ndɛ kleli be wie. Ɔ seli be kɛ: “Bé wá yí Sran wa’n mán sran mun, yɛ bé kún i, kpɛkun i cɛn nsan su’n, ɔ́ cɛ́n nguan.”​—Matie 17:22, 23.

Zezi w’a kan ndɛ sɔ’n w’a kle be le. Afin i osu’n nin-a cɛman, ɔ kɛnnin i wie’n nin i cɛnlɛ’n be ndɛ. Sanngɛ Piɛli w’a faman su. (Matie 16:21, 22) Asa ekun kɛ ɔ kacili’n, i akoto’m be nun nsan be wunnin i. Kpɛkun be tili “kɔlɛ m’ɔ́ wá kɔ́’n,” i su yalɛ nga Zezi nin Moizi nin Eli be kokoli’n. (Liki 9:31) I sɔnnzɔnfuɛ’m b’a wunmɛn i wie ndɛ sɔ’n i wlɛ kpa. Sanngɛ “be wla boli be wun dan kpa.” (Matie 17:23) Kusu b’a usɛmɛn i ndɛ sɔ’n i bo, afin srɛ kun be.

Kapɛɛnaɔmun lɔ yɛ Zezi dili i junman’n i dan lika-ɔ. I akoto’m be nun sunman be fin lɔ. Kɛ be juli lɔ’n, yasua nga be dede Ɲanmiɛn i sua’n i su lapo’n, be wunngeli Piɛli wun lɛ. Be waan bé tɔ́n Zezi i suɛn kɛ ɔ tuaman lapo’n wie. I sɔ’n ti’n, be usali Piɛli kɛ: “?Amun like klefuɛ kpa’n, ɔ tuaman [Ɲanmiɛn i sua’n i su] lapo sika draki nɲɔn’n wie?”​—Matie 17:24.

Piɛli tɛli be su kɛ: “I yo, ɔ tua.” Kpɛkun Piɛli wluli sua’n nun lɔ. Kɛ ɔ́ yó sɔ’n, nn Zezi w’a si ndɛ’n nun lalaa. Ɔ maan w’a minndɛman kɛ Piɛli bo ndɛ sɔ’n su naan w’a usɛ i kɛ: “?Simɔn, a bu ndɛ nga sɛ? ?Ninnge nga be yo be atɛ’n be su sika nga be dede’n, ɔ nin sran kun i ti lapo ng’ɔ su’n, wan’m be sa nun yɛ asiɛ’n su famiɛn’m be dede i sɔ sika’n niɔn? ?Be mma’m be sa nun yɛ, annzɛ aofuɛ’m be sa nun-ɔn?” Ɔ seli kɛ: “Aofuɛ’m be sa nun-ɔn.” Yɛ Zezi seli i kɛ: “Ɔ maan be mma’m be suman lapo.”​—Matie 17:25, 26.

Zezi i Si’n yɛ ɔ sie like kwlakwla-ɔ. Asa ekun’n, i yɛ be su i Ɲanmiɛn i sua’n nun lɔ-ɔ. Ɔ maan ɔ nunman nun kɛ i Wa’n tua Ɲanmiɛn i sua’n i su lapo’n wie. Sanngɛ Zezi seli kɛ: “Kɛ ɔ ko yo naan e ti’n, be akunndan’n w’a sannganman’n, kɔ jenvie’n su lɔ ko to kowa. Jue klikli nga a trɛ i’n, trɛ i nuan’n nun. Á wá wún jɛtɛ mma ufue kun [yɛle kɛ statɛɛ mma kun annzɛ tetradraki kun]. Fa naan fa tannin e nin wɔ e ti.”​—Matie 17:27.

I sin’n, kɛ Zezi nin i sɔnnzɔnfuɛ’m be yiali likawlɛ’n, be kunndɛli kɛ bé úsɛ i ndɛ kun. Yɛle kɛ ɔ kle be sran ng’ɔ́ yó sran dan Ɲanmiɛn i Famiɛn diwlɛ’n nun lɔ’n. Ndɛ sɔ’n i usalɛ’n w’a kunman be srɛ. Kusu nn Zezi i wie’n i su ndɛ usalɛ’n kunnin be srɛ. Sanngɛ Zezi si be klun akunndan’n. Afin kɛ bé kɔ́ Kapɛɛnaɔmun’n, nn bé sí ndɛ sɔ’n su akplowa bé sú i su. I sɔ’n ti’n, ɔ usali be kɛ: “?Ngue ndɛ yɛ amun kɛnnin i atin’n nun lɔ’n niɔn?” (Marki 9:33) Kɛ ɔ usali be sɔ’n, ɲannzuɛn m’ɔ kun be’n ti’n b’a wunman ndɛ kun sa b’a kanman. Afin blɛ sɔ’n nun’n, nn be su si sran ng’ɔ ti be nun sran dan’n i su akplowa. Sanngɛ kasiɛn su’n, be wa fali be ndɛ sɔ’n usali Zezi. Be usɛli i kɛ: “?Ɲanmiɛn su lɔ Famiɛn diwlɛ’n nun’n, wan yɛ i dan trɛ i wiengu mun-ɔn?”​—Matie 18:1.

Nanwlɛ, kɛ be te si ndɛ sɔ’n i su akplowa’n, i sɔ’n bo e nuan. Afin be nin Zezi be o nun i afuɛ nsan yɛ. Ɔ maan be tili like nga Zezi kle’n yɛ be wunnin like ng’ɔ yo’n. Sanngɛ be ti klɔ sran, yɛ fɔ o be nun. Asa ekun’n, lika nga be tali be’n nun  lɔ’n, sran ng’ɔ le ɲrun’n yɛ be bu i sran-ɔn. Asa kusu’n, Zezi seli Piɛli kɛ ɔ́ fá Ɲanmiɛn i Famiɛn diwlɛ’n i “lakle mun” mɛ́n i, i osu nin-a cɛman. I sɔ’n ti’n, atrɛkpa Piɛli buli i kɛ i kpa tra be nga mun. Kɔlɛ Zaki nin Zan be kusu be buli i kɛ be kpa tra be onga mun wie. Afin kɛ Zezi káci’n, be wunnin nun.

I kwlaa yoli-o, Zezi yoli like kun naan i sɔnnzɔnfuɛ’m be kaci be akunndan’n. Ɔ flɛli bakan kun naan w’a fɛ i w’a sie i be afiɛn lɛ. Kpɛkun ɔ seli be kɛ: “Nanwlɛ, ń kán klé amun kɛ sɛ amun a kaciman naan amun a yoman kɛ ba kanngan mun sa’n, ɔ lemɛn i yowlɛ, amun su wluman ɲanmiɛn su lɔ Famiɛn diwlɛ’n nun. Ɔ maan sran ng’ɔ kɛn i wun ase’n, m’ɔ yo i wun kɛ bakan nga sa’n, i yɛ ɲanmiɛn su lɔ Famiɛn diwlɛ’n nun’n, i dan trɛ i wiengu mun-ɔn. Yɛ sran ng’ɔ sɔ ba kaan nga nun min dunman nun’n, nn w’a sɔ min nun wie.”​—Matie 18:3-5.

Wafa nga Zezi kleli i sɔnnzɔnfuɛ’m be like’n, ɔ yo ɲɛnmɛn-o! W’a faman be wun ya, yɛ w’a seman be kɛ be su tu be wun. Sanngɛ ɔ fali bakan kun i su sunnzun ase. Afin ba kanngan’m be leman ɲrun, yɛ ɔ leman be nun sran dan. Zezi waan ɔ fata kɛ i sɔnnzɔnfuɛ’m be yo kɛ be sa. I sɔ’n ti’n, kɛ ɔ́ gúɛ i ndɛ’n i bo’n, ɔ seli be kɛ: “Sran ng’ɔ yo i wun kaan amun kwlaa amun nun’n, i sɔfuɛ’n yɛ ɔ le ɲrun-ɔn.”​—Liki 9:48.