Pa numa ya kwaluka mu cimonwa e lyo no kundapa umulumendo uwali ne cibanda mu Kaisarea Filipi, Yesu aile ku Kapernahumu. Pali ubu ubulendo, aile fye na basambi bakwe, talefwaya abantu bambi “ukwishiba.” (Marko 9:30) Ici calengele akwate inshita ya kweba abasambi pa mfwa yakwe na kabili e lyo na pa mulimo bali no kulabomba. Abebele ukuti: “Umwana wa muntu bali no kumufutuka no kumupeela mu minwe ya bantu, kabili bakamwipaya, na pa bushiku ubwalenga shitatu akabuuka.”—Mateo 17:22, 23.

Uyu tawali muku wa kubalilapo ku basambi ukumfwa ili lyashi. Yesu alilandilepo na kabili ukuti ali no kwipaiwa, nangu ca kutila Petro tasumiine ukuti ici cikacitika. (Mateo 16:21, 22) Kabili abatumwa batatu balimweneko uko Yesu ayalwike kabili balyumfwile ne lyashi lya kuti Yesu ‘akafumapo.’ (Luka 9:31) Abasambi bakwe ‘balyumfwile ubulanda nga nshi’ pa fyo Yesu abebele nangu ca kuti tabaumfwikishe umo aloseshe. (Mateo 17:23) Na lyo line balyumfwile umwenso wa kumwipushapo.

Basukile bafika mwi tauni lya Kapernahumu, umo Yesu alebombela sana kabili umo abasambi bakwe abengi baleikala. Abalesonkesha imisonko baile kuli Petro. Nalimo balefwaya ukupeela Yesu umulandu wa kuti talipila imisonko. E ico baipwishe abati: “Bushe kasambilisha wenu alalipila indalama sha musonko we tempele?”—Mateo 17:24.

Petro ayaswike ati: “Alalipila.” Ilyo Yesu abweleele ku ng’anda ukwali Petro, alishibe ico balelandapo. E ico Yesu talolelele ukuti Petro amwebe ifyo bamwipwishe, afikile fye no kumwipusha ati: “Uletipo shani Simone? Ni kuli bani ishamfumu sha pano isonde shipoka umutuulo nelyo umusonko? Bushe ni ku bana ba shiko nelyo ni ku bantu bambi?” Petro ayaswike ati: “Ni ku bantu bambi.” Lyena Yesu atile: “Kanshi ninshi abana tabafwile ukulipila umusonko.”—Mateo 17:25, 26.

Wishi wa kwa Yesu e Mfumu ya mu muulu na pano isonde, kabili eo balepepa pe tempele. Kanshi Umwana wa kwa Lesa taalingile ukulipila umusonko wa pe tempele. Yesu atile: “Lelo pa kuti twibakalifya, kabiye kuli bemba, upoosemo indobo, no kubuula isabi ilyo ulebalilapo ukuloba, kabili ilyo wa-asamuna akanwa ka liko, ulesangamo indalama ya statere. Uibuule ubapeele, ulipile umusonko wandi no obe.”—Mateo 17:27.

Awe abasambi basukile balongana pamo kabili baipwishe Yesu pa wali no kuba umukalamba mu Bufumu. Ku numa ilyo Yesu aebele abasambi bakwe pa mfwa yakwe, balyumfwile umwenso wa kumwipusha, lelo pali iyi inshita tabatiinine ukumwipusha ifyo cali no kuba kuli bena nga afwa. Yesu alishibe ico baletontonkanyapo. Ico cine e co bakansaninepo na lintu balemukonka pa numa pa kubwelelamo ku Kapernahumu. E ico abepwishe ukuti: “Cinshi mwacilakansaninapo mu nshila?” (Marko 9:33) Batalele fye tondolo, ico balyumfwile insoni, pantu balekansanina pa wali no kuba umukalamba pali bena. Awe abatumwa basukile baeba Yesu ico balekansaninapo. Bamwipwishe abati: “Nani kanshi umukalamba mu Bufumu bwa mu muulu?”—Mateo 18:1.

Tatwingenekela abatumwa ukukansanina pali uyu mulandu pantu pali iyi inshita ninshi nabasambililako pa myaka mupepi na itatu ku  fyo Yesu alecita na ku fyo alelanda. Na lyo line, tabali abapwililika. Kabili bakuliile mu mipepele umo abantu babikile sana amano ku kukwata ififulo fya pa muulu. E lyo kabili Petro e lyo bamwebele fye kuli Yesu ukuti akapeelwa “amakii” ya Bufumu. Nalimo e calengele aleimona ukuti e mukalamba pali bonse. Yakobo na Yohane nabo bafwile baleimona ukuti e bakalamba pantu balimweneko uko Yesu ayalwike.

Nampo ifi nga e fyalengele nelyo iyo, Yesu alibalungike. Aitile umwana no kumwiminika pa kati kabo e lyo aeba abasambi bakwe ati: “Nga tamwalwike no kuba nga bana abanono, tamwakengile mu Bufumu bwa mu muulu. E ico onse uuleicefya ngo yu mwana umunono, e ukaba umukalamba mu Bufumu bwa mu muulu; kabili onse uwapokelela umwana umunono umo ngo yu pa mulandu we shina lyandi, ninshi na ine nampokelela.”—Mateo 18:3-5.

Alibafundile bwino sana! Yesu tafuliilwe abasambi kabili talebamona kwati ni bakaitemwe nelyo balitemwisha ukulumbuka. Lelo abomfeshe umwaice pa kubafunda. Abana abanono tabafwaya ififulo fya pa muulu nelyo ukulumbuka. Kanshi Yesu alefunda abasambi bakwe ukuti balingile ukuicefya nga abana abanono. Lyena pa kulekelesha aebele abasambi bakwe ati: “Uwaiceefya pali imwe bonse e mukalamba.”—Luka 9:48.