Mvuse mveñesan a éyoñ a maneya saé mona fam a mbe a bili mbia nsisim e Césarée ya Philippe, Yésus a ke mfa’a ya Capernaoum. Ba beyé’é bé ba ke étam amu a nji yi na bôte be “yem ajô te.” (Marc 9:30) Nalé a ve nye fane ya kômesane beyé’é bé asu awu dé a ésaé ba yiane bo. A kate be na: “Ba yiane ve Mona môt e mo me bôt; a ba ye wôé nye, ve môse lale a ye wômô.”​—Matthieu 17:22, 23, Mfefé Nkôñelan.

A nji bo mfefé jam asu beyé’é. Yésus a nga kate be ajô awu dé biyoñe ya mvus, akusa bo Pierre a nji be a buni’i de. (Matthieu 16:21, 22) A fe na, minlômane milal mi nga yene mveñesan a wô’ô mam be mbe be kobô’ô été me fombô’ô ‘nkeane’ Yésus. (Luc 9:31) Éyoñe ji, beyé’é bé be nga “dañe wô’ abé” a jame Yésus a ke ôsu a jô valé, ja’a be nji tu’a wô’ô atinane ya bifia bié. (Matthieu 17:23) Ve da, ba ko woñe ya sili nye mam mefe a lat jam ete.

Ba su’ulane kui Capernaoum, vôme Yésus a dañe tabe a ta’a ésaé jé, a abui minlômane da so fe vôm ate. Vôm ate, bôte ba nyoñe toya e temple ba subu Pierre bebé. Éko éziñ ba kômbô bôté Yésus ajô na a nji ya’ane toya; nde ba sili na: “Ye masa wônan a nji ya’ane toya ya nda Zambe nga?”​—Matthieu 17:24, Mfefé Nkôñelan.

Pierre nye na, “A ve.” Éyoñe be bulaneya nda, Yésus a nga yeme jame da te boban. Nde, teke yange na Pierre a bôô ajô ete tebele yôp, Yésus a sili na: “A Simon, wo asimesan aya? Bejô bôte ya si nyô be anyoñe moné ya taxe mfa’a mbé? Ye be bone bap, ye be bôte befe?” Pierre nye na: “Be bôte befe.” Ane Yésus a jô na: “Ajô te bon be ne beti.”​—Matthieu 17:25, 26.

Ésa Yésus a ne Njô ya émo minlañ ése a Nyô ba kañ e temple. Nde, Mone Zambe a nji yiane ya’ane toya e temple. Yésus a jô na: “Akôsa bo nalé, bi za kolé be ôbak, kele’ atok, ô wua nnop été, a nyoñe kos wo aye taté wôé; éyoñ wo aye kui je anyu wo aye yene franc ébaé [statère, nge na tétradrachme]: nyoñe’e je, ô ve be je mfa’a wom a mfa’a wôé.”​—Matthieu 17:27.

Éyoñe beyé’é ba mane bo nsamba wua, ba kômbô sili Yésus nsili a lat a za ya be be a ye dañe ba bevo’ Éjôé ya yôp. Bôte ba, be mbe be to be ko woñe ya sili Yésus nsili a lat a awu dé, ve éyoñe ji, be nji ve’ele ko woñe ya sili nye mam ma fombô ényiñe jap ya melu ma zu. Yésus a yeme jame ba simesan. A ne jame be jaéya sañetane nté be mbe be za’a ba tôñe nye, éyoñe be mbe be bula’ane Capernaoum. Nde a sili be na: “Jé mia te zu mia sañetan e zenezen?” (Marc 9:33, Mfefé Nkôñelan) Fe’e njañan, beyé’é ba tabe évô, amu be mbe be sañeta’ane zañe jap ajô ya za a dañe ba bevok. Minlôman mia su’ulane kate Yésus e jam ba too be sañetan a jô na: “Za a dañe beta môt Éjôé ya yôp?”​—Matthieu 18:1, Mfefé Nkôñelan.

A ne fo’o jame ya kame na, beyé’é be nga’an be sañetan avale mame di, a to ke na, be boya mimbu mila a Yésus, be yene’e a wô’ô mam a bo. Ve be be’e metyi ya abé. A nne fe na, be nga yaé vôme bôte ba dañe fas ajô minkôñ a bité. A fe na, Pierre a ndôme wô’ô Yésus a kate’e nye na a ye ve nye “bidiba’a” y’Éjôé. Ye jam ete e ne nye bete nlô? Jacques ba Jean  be’ fe ba yiane wô’ôtan avale da amu ba too bengaa ya mveñesane Yésus.

To’o aya, Yésus a sôan ôsimesane wop. A loone mone mongô, a tele nye zañe jap, a jô beyé’é na: “Nge mi nji tyendé a bo ane ayôme bongô, mia ye bo te nyiin Éjôé ya yôp. Nyô a ye ñhe suu émiene si ane ôyôme mongô, nye a dañe beta môt Éjôé ya yôp. A nyô a nyoñ ôyôme mongô wua avale te a jôé dam, mamiene le a nyoñ.”​—Matthieu 18:3-5, Mfefé Nkôñelan.

Za avale mbamba zene ya ye’ele di! Yésus a nji wô’ô beyé’é bé ôlun nge bame be amu ba sôñe beta be mam. Ve, a viane belane ñye’elan ô ne volô be. Ayôme bongô e nji bi beta minkôñe, nge beta minsôñane miziñ. Ajô te Yésus a liti beyé’é bé na ba yiane tyendé avale ba yene bebien. Yésus a mane ñye’elan a ve bôte ba tôñe nye a jô’ô na: “Nyô a dañe tyôtyoé e mia bese été e nye ñhe a dañ.”​—Luc 9:48, Mfefé Nkôñelan.