Thupene la Iesu a ketre pengön, me aloine la nekönatr hna löth e Kaisaria Filipi, Iesu hë me itretre dreng a trongëne la nöje Kaperenauma. Nyidrëti hi me itretre dreng, ke “tha ajane kö Iesu troa atre lai” hnene la ka ala nyim. (Mareko 9:30) Celë hi ijine ka lolo troa hnëkëne la itretre drei nyidrë kowe la meci nyidrë, me huliwa hna troa ahnithi koi angatr. Öni nyidrë: “Tro ha nue la Nekö i atr kowe la ime ne la itre atr, nge tro angatr a humuthi angeic, nge ame ngöne la hnaakönine drai, tro ha amele angeice hmaca.”—Mataio 17:22, 23.

Tha ewekë ka hnyipixe kö koi itretre dreng, ke ase hë Iesu ithanatane la meci nyidrë lo Peteru a xele ma kapa. (Mataio 16:21, 22) Ketre, hnene la köni aposetolo hna öhnyi Iesu a ketre pengön, me drenge la kola porotrikëne la “tro” i Iesu. (Luka 9:31) Enehila, kola ha “hleuhleu atraqatr” la itretre dreng, ngacama tha nyipi trotrohnine kö angatr la thangane la itre trengewekë celë. (Mataio 17:23) Ngo xou i angatr ma hnyingën.

Angatre hë e Kaperenauma, hnë mel me hnë huliwa i Iesu, nge zi ne la itre xa aposetolo fe. E cili, hnene la itre trahmanyi hna tro koi Peteru. Ma angatre jë a thele troa qajangazo Iesu pine tha kuiën la mani hna athip, öni angatr: “Tro fe kö la atre ini nyipunie a hane hamë mani thatraqane la uma ne hmi?”—Mataio 17:24.

Sa jë hi Peteru ka hape: “Öö.” Ame hë la Peteru a lö koi hnalapa, atre fe hë Iesu la ewekë ka traqa. Matre tha treqene kö nyidrë tro Peteru a ithanata, ngo canga öni nyidrë: “Hapeu Simona, itre joxu a kapa qaathei drei la mani hna athip memine la hna kuiën qa ngöne la hna salem? Qaathene la itre nekö i angatr maine qaathei itre trenyiwa?” Sa jë hi Peteru ka hape: “Qaathene la trenyiwa.” Öni Iesu jë hi: “Haawe, nga pëkö hna athipi kowe la itre nekön.”—Mataio 17:25, 26.

Keme i Iesu la Joxu ne la hnengödrai me fen, nge nyidrëti la hna nyihluen hnine la uma ne hmi. Haawe, tha meköti kö tro la nekö i Akötresie a kuië mani hna athip. Ngo öni Iesu: “Wanga troa hetre iwesitrë me angatr, tro jë kowe la hnagejë, nge ea ju la pane ie. Thupene lai, fe pi la që ne ej, nge tro eö a öhne e cili la ketre mani. Haawe, tro fë jë la mani cili koi angatr göne lo hna athipe koi nyiso.”—Mataio 17:27.

Traqa asë hë la itretre dreng, nge hetre hnyinge i angatr. Angatr a pi atre la ka tru ngöne la Baselaia. Eue hi lo, angatr a isa cile hnö troa hnying göne la meci Iesu, ngo enehila, tha xou i angatre hë troa hnying göne la mele i angatr elany. Ngo atre hi Iesu la mekuna i angatr, ke ngöne gojenyi a tro Kaperenauma, ase hë angatre pane ithanatan acon, lo angatr a tro hutrö i nyidrë. Matre öni nyidrë: “Nemene lo hnei nyipunieti hna ithanatan e cahu gojeny?” (Mareko 9:33) Kola isa hmahma me lapa thaupe la itretre dreng, ke angatre hmaca a isi pi ka tru. Ngo nango qea pi hë, angatr a qaja jë lo hnying hnei angatr hna ithanatan: “Drei la ka tru ngöne la Baselaia ne hnengödrai?”—Mataio 18:1.

Ma easë a sesëkötre laka, thupene köni macatre ne goeën me drei Iesu, angatre pala kö a isi pi ka tru. Ngo ame pe, itre atr ka tha pexeje  fe angatr. Nge hna hetru angatr ngöne la hmi ka wangatrune la göhnë me hnëqa. Ketre, hnei Iesu lo hna sisinyi koi Peteru troa hamë angeic la itre “kii” ne la Baselaia. Matre hapeu, hnei angeice kö hna pi tru fë? Nge ma hnei Iakobo fe me Ioane hna hane mekune tun, ke nyidroti fe la ka öhne la Iesu a ketre pengön.

Iesu a thele troa amekötine la aqane ujë i angatr. Nyidrëti a hëne jë la ketre nekönatr, me acilë nyën nyipi angatr, me hape: “E tha saze kö nyipunie matre tune la nekönatr celë, tha tro kö nyipunieti lai a hane lö kowe la Baselaia ne hnengödrai. Haawe, ame la atre ipië angeice kö tune la nekönatr, tre angeice hi la ka tru ngöne la Baselaia ne hnengödrai. Nge ame la atre kapa la nekönatr ka tui nyëne la, pine la ëjeng, angeice fe hi lai a hane kepe ni.”—Mataio 18:3-5.

Lolo catre la aqane hamë ini celë! Tha wesitre kö Iesu me jelë angatre ka hape, ka pi tru maine pi mama. Ngo nyidrëti pe a xome la ketre tulu. Eje hi, tha ka meku göhnë maine götrane qa kö la itre nekönatr. Iesu hi lai a amamane kowe la itretre dreng ka hape, nyipiewekë tro angatr a wai angatr tune la nekönatr. Thupene lai, Iesu a nyipune jë me hamëne la ketre ini kowe la itre ka xötrethenge nyidrë. Öni nyidrë: “Ame la atre ujë tune la ka co thei nyipunie, angeice hi la ka tru.”—Luka 9:48.