Yezu cogoya yɛlɛmanin kɔ, a ye jina gwɛn ka bɔ cɛdennin dɔ la Sezare Filipi mara la. Sisan, a n’a ka kalandenw be tagara Kapɛrnaum. U be dogora ka taga walisa jama kana “bɔ u tɛmɛtɔ kala ma.” (Mariki 9:30). O ye sababu di a ma k’a ka kalandenw labɛn a ka saya kama ani u tun bena baara min kɛ ale sanin kɔ. A y’a fɔ u ye ko: “U bena Mɔgɔ Dencɛ don mɔgɔjuguw bolo, k’a faga, tile sabanan loon a faganin kɔ, a bena kunun.”—Matiyo 17:22, 23.

Yezu ye min fɔ a ka kalandenw ye, u siɲɛ fɔlɔ tɛ k’o mɛn. Yezu tun kɔnna k’a fɔ k’u bena ale faga. Nka, Piyɛri tun ma la a la k’o koo ɲɔgɔn be se ka kɛ (Matiyo 16:21, 22). Ka fara o kan, a ka ciden saba y’a ye a cogoya yɛlɛmana ani a tun bena “sa cogo min na,” u y’o mɛn (Luka 9:31). Yezu ka kalandenw m’a ka kuma kɔrɔ tigitigi bɛɛ faamu. O n’a ta bɛɛ, u “hakili ɲagamina kosɔbɛ” o kuma kosɔn (Matiyo 17:23). Nka, u be siranna ka Yezu ɲininga o koo la.

Yezu n’a ka kalandenw labanna ka se Kapɛrnaum. A tun b’a ka waajuli baara fanba kɛ o yɔrɔ lo la ani a ka kalandenw fanba ka dugu lo. O yɔrɔ la, Alabatosoba ka lanpominɛlaw nana Piyɛri ɲininga ko: “Aw ka karamɔgɔ nin te to ka bolomafara [wala lanpo] di wa?” N’a sɔrɔ u tun b’a ɲinina ka Yezu jalaki ko a tɛ sɔn ka lanpo sara.—Matiyo 17:24.

Piyɛri y’u jaabi ko: “Ɔnhɔn, a be to k’a di.” Min kɛra, Yezu tun b’o kala ma ka ban. O kama, Piyɛri sera soo tuma min na, Yezu kɔnna k’a ɲininga ko: “Simɔn, ele ka miiriya ye jumɛn ye koo nin na? Mɔgɔ jumɛnw le ka kan ka wusuru, walima lɛnpo sara faamaw ye? U deenw wa, walima mɔgɔ wɛrɛw?” Piyɛri y’a jaabi ko: “Mɔgɔ wɛrɛw lo.” Yezu y’a fɔ a ye ko: “O kɔrɔ k’u deenw lafoninin be kɛ!”—Matiyo 17:25, 26.

Yezu Faa lo ye duniɲa kuru bɛɛ Masa ye ani mɔgɔw be Ale lo bato Alabatoso kɔnɔ. O kama, sariya t’a waajibiya ko Ala Dencɛ ka lanpo sara Alabatoso kama. Yezu ko: “Nga waasa miiriyajugu kana don mɔgɔ nunu kuun na, o kama, i ka dulen ta ka taga baa la k’a fili yen. N’i kɔnna ka jigɛ min minɛ, i k’a daa yɛlɛ ka filɛ yen. I bena wari sɔrɔ yen min be i ka bolomafara ni ne ta bɔ. I ka taga o di.”—Matiyo 17:27.

Sisan, Yezu ka kalandenw bɛɛ be ɲɔgɔn fɛ ani u b’a fɛ ka Yezu ɲininga ko jɔn lo bena kɛ mɔgɔba ye ka tɛmɛ bɛɛ kan Ala ka Masaya kɔnɔ. A ma mɛɛn, siranya y’a to u ma sɔn ka Yezu ɲininga a ka saya koo la. Nka sisan, u ma siran ka Yezu ɲininga u ka siniɲasigi koo la. Yezu b’u ka miiriya lɔn ka ban. K’u to Yezu kɔfɛ, u tun ye ɲɔgɔn sɔsɔ o koo la. O kɛra tuma min na u tun be kɔsegira Kapɛrnaum dugu la. O kosɔn, Yezu y’u ɲininga ko: “Aw tun be mun sɔsɔli lo la sira kan?” (Mariki 9:33). U ma fɛɛn fɔ maloya kosɔn, sabu u tun be ɲɔgɔn sɔsɔra ko jɔn le ye kuntigi ye u cɛma. A laban, cidenw tun be ɲɔgɔn sɔsɔra koo min na, u ye Yezu ɲininga o la ko: “Sankolo masaya la, jɔn le ye mɔgɔbaba ye?”—Matiyo 18:1.

A saan saba ɲɔgɔn ye nin ye, Yezu ka kalandenw be tugura a kɔ ani k’a lamɛn. O kama, a ka gwɛlɛ ka la a la k’u y’o sɔsɔli ɲɔgɔn kɛ. Nka, u ye mɔgɔ dafabaliw lo ye. Ka fara o kan, u lamɔna diinan sira min kan, mɔgɔ be ni lɔyɔrɔ min ye, o kɔrɔtanin lo kosɔbɛ! A ma mɛɛn fana, Yezu tun y’a fɔ Piyɛri ye ko a bena Ala ka Masaya “konnigɛ” di a ma. N’a sɔrɔ o y’a to a  y’a miiri ko ale lɔyɔrɔ ka bon ka tɛmɛ tɔɔw ta kan. N’a sɔrɔ Zaki ni Zan fana b’o ɲɔgɔn miiri sabu u ɲɛɛ lara Yezu kan tuma min na a cogoya yɛlɛmana.

A ka kɛ min o min ye, Yezu y’a ɲini k’u ka miiriya latilen. A ye deen dɔ weele k’a lɔ u cɛma. O kɔ, a y’a fɔ u ye ko: “N b’a fɔ aw ye ko n’aw m’aw sɔɔn yɛlɛma k’a kɛ i n’a fɔ denmisɛnw ta, aw tena don sankolo masaya la. O la, mɔgɔ min b’a yɛrɛ majigi ka kɛ i n’a fɔ denmisɛn nin, o tigi bena kɛ mɔgɔbaba ye sankolo masaya la. Ni mɔgɔ min be denmisɛn nin ɲɔgɔn minɛ ka ɲa ne kosɔn, o tigi be ne le minɛ ka ɲa.”—Matiyo 18:3-5.

O ye mɔgɔw kalancogo ɲuman ye dɛ! Yezu ma dimi a ka kalandenw kɔrɔ ani a m’a fɔ k’u ye kuncɛbaw ni wasabaliw ye. Nka, a tɛmɛna ɲɛyirali dɔ fɛ walisa k’u dɛmɛ. Denmisɛnw t’a ɲini ka kɛ ni lɔyɔrɔba ye wala ka tɔgɔba sɔrɔ. Yezu y’a yira ko a ka kalandenw ka ɲi k’a ɲini ka kɛ n’o miiriya ɲɔgɔn lo ye. O kɔ, Yezu y’a ka kuma kuncɛ ni lasɔmini kuma nunu ye ko: “Min ye aw bɛɛ la dɔgɔmannin ye, o de ye aw la mɔgɔba ye.”—Luka 9:48, ABM.