Ke ẹma ẹkekpụhọde Jesus mbiet, enye onyụn̄ anam demon ọwọrọ akparawa kiet ke idem ke Caesarea Philippi, enye adaha aka Capernaum. Enye asan̄a ye mme mbet esie kpọt aka sia enye mîyomke mme owo ‘ẹfiọk.’ (Mark 9:30) Enye ada ini emi etịn̄ ọnọ mme mbet aban̄a n̄kpa imọ ye nte mmọ ẹdinamde utom ukwọrọikọ ke imọ ima ikpa. Enye ọdọhọ mmọ ete: “[Ẹyeda] Eyen owo ẹsịn mme owo ke ubọk, ndien mmọ ẹyewot enye, enye oyonyụn̄ eset ke ọyọhọ usen ita.”—Matthew 17:22, 23.

Ikpanaha idem akpa mme mbet sia idịghe akpa mmọ ẹkopde utọ ikọ emi edi oro. Jesus ama etetịn̄ ke ẹyewot imọ, edi Peter ikenịmke ke utọ n̄kpọ oro eyetịbe. (Matthew 16:21, 22) Apostle ita ẹma ẹkụt nte ẹkpụhọrede Jesus mbiet ẹnyụn̄ ẹkop nte ẹtịn̄de ẹban̄a “unyọn̄” esie. (Luke 9:31) Idahaemi, mbet “ẹfụhọ etieti” ke ini Jesus afiakde etịn̄ ikọ emi, kpa ye emi se iditịbede mîtịmke in̄wan̄a mmọ. (Matthew 17:23) Edi ndịk iyakke mmọ ẹbụp enye n̄kpọ en̄wen ẹban̄a n̄kpa esie.

Mmọ ẹdisịm Capernaum. Jesus esima ndidu mi, ediwak mme apostle esie ẹnyụn̄ ẹto mi. Mbon emi ẹsibọde tax ke temple ẹdi ẹdibụp Peter n̄kpọ. Etie nte mmọ ẹyom ndidori Jesus ikọ ete ke enye isikpehe tax, oro anam mmọ ẹbụp ẹte: “Nte andikpep mbufo esikpe tax drachma iba [emi ẹsibọde ke temple]?”—Matthew 17:24.

Peter ọdọhọ ke Jesus esikpe. Jesus ye mme mbet ẹsịm ufọk, edi enye ọdiọn̄ọ se iketịbede ye Peter ye mme ọbọ a-tax ke temple. Enye ibetke Peter ọtọn̄ọ etịn̄ se iketịbede, edi obụp Peter ete: “Simon, afo ekere didie? Mmanie ke ndidem isọn̄ ẹsibọ utomo m̀mê tax? Nte ẹsibọ nditọ mmọ m̀mê ẹsibọ isenowo?” Peter ọbọrọ ete: “Ẹsibọ isenowo.” Do ke Jesus ọdọhọ ete: “Ke akpanikọ, ndien, nditọ inyeneke ndikpe tax.”—Matthew 17:25, 26.

Ete Jesus edi Andikara ofụri ekondo, kpa enye ke ẹsituak ibuot ẹnọ ke temple oro. Ntre, ikpanaha Eyen esie ekpe tax emi ẹsibọde ke temple. Kpa ye oro, Jesus ọdọhọ ete: “Edi mbak nnyịn idinam mmọ ẹtuak ukot ẹduọn̄ọ, ka inyan̄ kesịn uwam nyụn̄ da akpa iyak eke edimụmde, ndien ke okụbọrede enye inua, afo oyokụt okụk stater [m̀mê tetradrachma]. Da nọ mmọ ke okịm ye okwo.”—Matthew 17:27.

Idahaemi kpukpru mme mbet ẹkem ibat, mmọ ẹnyụn̄ ẹyom ndibụp Jesus mban̄a owo emi okponde akan ke Obio Ubọn̄ heaven. Ndịk akananam mmọ ndibụp Jesus n̄kpọ ekededi mban̄a n̄kpa esie, edi idahaemi ndịk inamke mmọ ndibụp enye mban̄a ini iso mmọ. Jesus ọfiọk se mmọ ẹyomde ndibụp. N̄kpọ emi ke mmọ ẹkesụk ẹneni ke edem Jesus ke ini mmọ ẹfiakde ẹnyọn̄ Capernaum. Ntem enye obụp mmọ ete: “Nso ke mbufo ẹkeneni ke usụn̄?” (Mark 9:33) Bụt iyakke mmọ ẹsioro uyo sia mmọ ẹkeneni m̀mê anie okpon akan ke otu mmimọ. Ekem mme apostle ẹbụp Jesus se mmọ ẹkesụk ẹnemede ke otu idemmọ ẹte: “Anie . . . okpon akan ke obio ubọn̄ heaven?”—Matthew 18:1.

Akpakpa owo idem ndikop nte mme mbet emi ẹma ẹkesan̄a ye Jesus ke n̄kpọ nte isua ita, ẹkop se enye ekpepde, ẹnyụn̄ ẹkụt nte enye odude uwem, ẹnenide utọ n̄kpọ oro. Mfịna edi ke mmọ ifọnke ima, mmọ ẹkenyụn̄ ẹkpon ke ebiet emi mme owo ẹyomde ikpọ itie  ẹnyụn̄ ẹmade uwọrọiso. N̄kpọ en̄wen n̄ko edi nte ke ibịghike Jesus ọkọdọhọ Peter ke imọ imọn̄ inọ enye “mme ukpọhọde” Obio Ubọn̄. Ndi oro akpanam enye ekere ke imọ ikpon ikan? James ye John n̄ko ẹkeme ndikere ke mmimọ ikam ikpon ikan sia mmimọ ima ikụt nte ẹkpụhọrede Jesus mbiet.

Jesus anam n̄kpọ man an̄wam mmọ ẹtre ndiyom ikpọ itie. Enye okot ekpri eyen, anam enye ada ke ufọt mmọ onyụn̄ ọdọhọ mmọ ete: “Ibọhọke mbufo ẹkpụhọde ẹnyụn̄ ẹkabade ẹtie nte n̄kpri nditọ, mbufo idikemeke-keme ndidụk obio ubọn̄ heaven. Ke ntre, owo ekededi eke edisụhọrede idem nte ekpri eyenọwọn̄ emi, edi enye okpon akan ke obio ubọn̄ heaven; ndien owo ekededi eke adarade utọ ekpri eyenọwọn̄ emi ke ntak enyịn̄ mi adara mi n̄ko.”—Matthew 18:3-5.

Nso ukpepn̄kpọ itie ntem! Jesus iyatke esịt ye mme mbet esie inyụn̄ idọhọke ke mmọ ẹdiọk itọn̄ m̀mê ẹyom ikpọ n̄kpọ. Enye akam ada se mmọ ẹdiọn̄ọde ekpep mmọ n̄kpọ. Nditọwọn̄ isiyomke ikpọ n̄kpọ m̀mê uwọrọiso. Ikọ Jesus ọwọrọ ke ana mme mbet imọ ẹtie ntre. Enye ọdọhọ mmọ ndien ete: “Owo emi enịmde idem ke n̄kpri-n̄kan ke otu mbufo kpukpru edi enye emi okponde.”—Luke 9:48.