Ni oti na veivakamataliataki kei na nona vakabulai na cauravou e curumi timoni ena yasayasa o Sisaria Filipai, e gole sara o Jisu i Kapenaumi. Eratou tomani koya ga nona tisaipeli, mera kua ni kila na lewenivanua “na nodratou lako.” (Marika 9:30) Qori ena levu kina na gauna me vakarautaki ratou ena nona mate kei na cakacaka me ratou qarava. E vakamacalataka o Jisu: “Sa vakarau soli na Luve ni tamata ina ligadra na lewenivanua, era na vakamatei koya, ia ena vakaturi ena ikatolu ni siga.”—Maciu 17:22, 23.

E sega ni dodonu me ka vou vei ratou na tisaipeli na itukutuku qori. Sa dau tukuna voli mai o Jisu ni na vakamatei, ia e sega ni via vakabauta o Pita. (Maciu 16:21, 22) Ratou raica na tolu na yapositolo na veivakamataliataki, ratou rogoca tale ga ni veivosakitaki nona sa na “biubiu” o Jisu. (Luke 9:31) Eratou se sega ni kila vinaka nona imuri na ibalebale ni vosa i Jisu, ia e “mositi ratou dina” na veika e tukuna. (Maciu 17:23) Eratou rere tale ga ni tarogi koya ena ka e sega tiko ni matata vei ratou.

Eratou yaco sara i Kapenaumi, na vanua e dau tiko kina vakalevu o Jisu, e nodratou koro tale ga eso na yapositolo. Era mani torovi Pita na daukumuni ivakacavacava ni valenisoro. Ena nodra saga mera beitaki Jisu ni sega ni sauma na ivakacavacava, era taroga: “E dau solia na nomudou qasenivuli na ivakacavacava ni valenisoro?”—Maciu 17:24.

“Io,” e sauma o Pita. Sa kila rawa tu o Jisu na ka e yaco ni lesu i vale, e taroga sara: “Cava nomu rai Saimoni? Era dau kumuna mai vei na tui e vuravura na soli kei na ivakacavacava? Vei ira na luvedra se vei ira na vulagi?” E sauma o Pita: “Vei ira na vulagi.” Sa qai kaya o Jisu: “Kena ibalebale, era sega ni dau soli ivakacavacava na luvenitui.”—Maciu 17:25, 26.

E sokaloutaki na Tamai Jisu e valenisoro, na iLiuliu ni lomalagi kei vuravura. E sega ni gadrevi kina vua na Luve ni Kalou me sauma na ivakacavacava ni valenisoro. E kaya o Jisu: “Mera kua ni tarabe, lako i waitui, viritaka nomu siwa, na imatai ni ika o yavia mai, dolava na gusuna, o na raica kina e dua na ilavo siliva [na steita se tetradrakema]. Kauta qai solia vei ira me nodaru ivakacavacava.”—Maciu 17:27.

Ni ratou tiko kece na tisaipeli ratou sa qai tarogi Jisu se o cei ena levu duadua ena Matanitu ni Kalou. Eratou se rere e liu na tisaipeli ni tarogi Jisu me baleta na nona mate, ia qo eratou sa doudou ni taroga na ka ena yacovi ratou ena gauna se bera mai. E kila vinaka o Jisu na nodratou nanuma, ni ratou a veibataka tiko qori ena ilakolako i Kapenaumi. E mani taroga: “Na cava dou veibataka tiko e gaunisala?” (Marika 9:33) Eratou veigaluvi ena levu ni nodratou madua, ni ratou veibataka tiko se o cei e levu duadua vei ratou. Oti eratou sa qai tukuna vei Jisu na taro eratou veivosakitaka voli mai: “O cei mada e levu duadua ena Matanitu vakalomalagi?”—Maciu 18:1.

E sega ni namaki me ratou veibataka qori na tisaipeli ni sa rauta ni tolu na yabaki nodratou muri Jisu voli. Ia me nanumi tiko ni ratou sega ni uasivi, ratou susugi tale ga ena vakabauta vakalotu e vakaliuci kina na itutu. Dua  tale ga na gauna sa oti, a yalataka o Jisu ni na solia vei Pita na “ki” ni Matanitu ni Kalou. De dua e nanuma kina o Pita ni uasivi ratou na kena vo. A rairai va tale ga qori na nodrau rai o Jemesa kei Joni ni rau raica nona vakamataliataki o Jisu.

Se mani cava nodratou rai, e vakadodonutaki ratou o Jisu. E kaciva sara e dua na gonelailai me mai duri ena kedratou maliwa, qai kaya vei ratou: “Ke dou sega ni veisau mo dou vaka na gone lailai, dou na sega sara ni curu ina Matanitu vakalomalagi. O koya gona, o koya e yalomalumalumu me vaka na gone lailai qo ena okati me levu duadua ena Matanitu vakalomalagi, o koya e vakaceguya e dua na gone lailai va qo ena yacaqu e vakacegui au tale ga.”—Maciu 18:3-5.

E vakasakiti dina na iwalewale ni veivakavulici ya! E sega ni cudruvi ratou nona tisaipeli o Jisu se me tukuna ni ratou kocokoco, se via rogo. E via vakavulici ratou ga. E sega ni dua na ka era vakacerecerei se rogo kina na gonelalai, e tukuna gona o Jisu ni bibi me tiko tale ga vei ratou na tisaipeli na rai ya. Sa qai tinia o Jisu: “O koya e vakamalumalumutaki koya ena kemudou maliwa, o koya qo e uasivi.”—Luke 9:48.