E a nako Kaberenaum Iesu imwin onikakina ao kamarurungan te teinimwaane are taniaki n te taimonio n aononi Kaitareia Biribi. E mwananga ni kaokoroa ma taan rimwina bwa e aonga n aki “ataaki taekaia” irouia te koraki. (Mareko 9:30) E a bati riki ngkai ana tai ni kataubobongaia taan rimwina ibukini matena ao ibukin te mwakuri are a na karaoia. E kabwarabwaraa ni kangai: “E na kamwaneaki Natin te aomata nako nanoni baia aomata, ao a na kamatea, ao e na kautaki n te katenua ni bong.”​—Mataio 17:22, 23.

A aki riai taan rimwina n taku bwa e boou te iango anne. E a kaman taekina taekani kamateana Iesu, e ngae ngke e rawa Betero ni kakoauaa bwa e na riki anne. (Mataio 16:21, 22) A nora onikakin Iesu abotoro ake teniman ao a ongoraea te maroro i aon taekan ‘nakon’ Iesu. (Ruka 9:31) “A a rangi n nanokawaki” taan rimwina n te baere e taekinna, e ngae ngke a aki ota raoi iai. (Mataio 17:23) Ma a bon teimatoa naba ni maaku n titirakinna riki taekan te baei.

Imwina riki ao a bon roko i Kaberenaum ae te tabo are e kakaraoa riki iai ana mwakuri ni minita Iesu ao bon aia kaawa abotoro aika bati. Ikanne are a kawara Betero taan rikoa te taekiti ibukin te tembora bwa tao a kani kabuakakaa Iesu ibukin aki kabwakaan te taekiti, ao a titiraki ni kangai: “E na kabwakaa te taekiti ibukin te tembora ami tia reirei?”​—Mataio 17:24.

E kaeka Betero ni kangai: “Eng.” E a kaman ataa te baere riki Iesu ngke e mena n te auti. N oneani mwin are e kariaa Betero bwa e na tuangnga taekan anne, e a titirakinna ni kangai: “Tera am iango Timon? E anaaki mairouia antai te tiute ke te roo n rabwata are a anganaki uean aonnaba? Mairouia natiia ueea ke ianena?” E kaeka Betero ni kangai: “Mairouia ianena.” Ngaia are e taku Iesu: “Mangaia ae a aki kabwakaa te roo n rabwata naati.”​—Mataio 17:25, 26.

Boni Ueani bwaai ni kabane Taman Iesu ao boni Ngaia ae e tataromauriaki n te tembora. Ngaia are e aki kabaeaki Natin te Atua bwa e na kabwakaa ana angabwai ibukin te tembora. E taku Iesu: “Ma ti kaawa ni kaunia, ngaia are naako n te nama ao kabwakaa te ao ma te matau, ao atika te ika are moan teke, ao ngkana ko kaurea wina, ane ko na kunea iai te mwane ae te tirewa [te titeitia ke te teeraturakemwa]. Anaia ao angania ibukiu ma ngkoe.”​—Mataio 17:27.

A botaki naba ngkekei taan rimwina ao a titirakina Iesu bwa antai ae e na riki bwa te kabanea ni kakannato n te Tautaeka n Uea. Boni mwaane aikai ake a maaku n titirakina Iesu taekani matena, ma ngkai a aikoa maaku n titirakinna ibukin aroia nakon taai aika imwaia. E ataa Iesu te baere a iangoia. Bon te baere a a tia ni kauntaekaia ngke a ririmwina n okira Kaberenaum. Ngaia are e a titirakinia ni kangai: “Tera are kam kauntaekaia i aoni kawaimi?” (Mareko 9:33) A boni maamaa, ngaia are a aki kakarongoa ibukina bwa a kauntaekaa ae antai te kabanea ni kakannato i buakoia. N tokina ao a a kaota aia titiraki nakoina are a a tia ni maroroakinna ae kangai: “Antai raoi te kabanea ni kakannato n te Tautaekan n Uea ae bwaini karawa?”​—Mataio 18:1.

E taraa ni kamimi ngkai a kauntaeka taan rimwina ibukina bwa e a kaania tenua aia ririki n nonora aron Iesu ao n ongongora irouna. Ma e ngae n anne a bon aki kororaoi. A a tia ni kaikawaaki ni katein aia Aro are e kaungaaki iai kakawakin te mwakuri ao te nakoa ae rietata. Irarikin anne, e a tibwa tia n ongo Betero ana berita Iesu nakoina ae taekan “taiani kiing” ibukin te Tautaeka n Uea. E koaua bwa e namakinna ae e kakannato? A bae naba n namakina anne Iakobo ao Ioane ibukina bwa a nora onikakin Iesu.

E kaetiia Iesu n aki ongeia bwa tera ae a iangoia. E wetea te teei ni kateia i buakoia, ao e tuangia taan rimwina ni kangai: “Ngkana kam aki rairaki ma ni katotongia ataei, ao kam aki kona n rin n te Tautaeka n Uea ae bwaini karawa. Mangaia ae te aomata ae karinanoa n aron te ataei aei, ao boni ngaia te kabanea ni kakannato n te Tautaeka n Uea ae bwaini karawa. Ao ane e butimwaea temanna te ataei ae ai aron aei n arau, ao e butimwaeai naba.”​—Mataio 18:3-5.

Ai nakoraoira te waaki n angareirei anne! E aki un Iesu irouia taan rimwina ao n atongia bwa a nanonrang ke a kani kakannato. Ma e kabongana te reirei ae kakawaki ae aroia ataei aika akea nakoaia aika bubura ke a aki kakannato naba teutana. Ngaia are e kaotia Iesu bwa a riai taan rimwina ni karikirakea irouia te iango aei. Imwin anne e a motika ana taeka n reirei nakoia taan rimwina ni kangai: “Ane e iangoia bwa e mangori riki i buakomi ao e boni kakannato.”​—Ruka 9:48.