Mbohapy apóstol ohecha kuri peteĩ visiónpe mbaʼéichatapa Jesús Irréinope. Upe riremínte Jesús omonguera peteĩ endemoniádope, ag̃ui Cesarea de Filípogui. Koʼág̃a katu Jesús oho jey Capernaum gotyo, ha oĩse haʼeño idisipulokuérandi, péro “ndoipotái avave oikuaa upéva” (Marcos 9:30). Jesús oikuaa saʼíma ofaltaha omano hag̃ua, ha opreparase idisipulokuérape upearã. Avei ombokatupyryse chupekuéra ojapo hag̃ua pe tembiapo opytátava ikargopekuéra. Jesús heʼi: “Pe Yvypóra Raʼýpe, katuete oñemeʼẽta umi kuimbaʼe pópe, ha ojejukáta, péro tres día haguépe oñemopuʼã jeýta” (Mateo 17:22, 23).

Jesús disipulokuéra oikuaáma oikotaha upéva. Haʼe heʼíma vaʼekue voi chupekuéra ojejukataha, péro Pedro upérõ ndoaseptaséi kuri (Mateo 16:21, 22). Avei mbohapy apóstol ohecha kuri pe visión rupive mbaʼéichapa Jesús apariénsia okambiapa, ha ohendu “mbaʼéichapa ohóta ko múndogui” (Lucas 9:31). Koʼág̃a Jesús disipulokuéra “oñembyasyeterei opytávo” ohendu rire chupe, nontendeporãiramo jepe la oikótava (Mateo 17:23). Péro noporandusevéi chupe mbaʼeve pórke okyhyje hikuái.

Upe rire og̃uahẽ hikuái Capernáumpe, pe siuda Jesús hetave tiémpo opredika haguépe. Avei ko siuda haʼe hína unos kuánto apóstol válle. Upépe oñemboja Pedro rendápe umi kuimbaʼe okovráva impuésto témplope g̃uarã. Oiméne oakusase Jesúspe ndopagái haguére umi impuésto, upévare oporandu hikuái: “¿Ndopagái piko pene mboʼehára pe impuésto témplope g̃uarã?” (Mateo 17:24).

Pedro heʼi: “Opaga”. Jesús oikuaáma la oikóva, ha og̃uahẽ rire pe óga oĩháme hikuái, Pedro omombeʼu mboyve chupe mbaʼeve, Jesús oporandu: “¿Mbaʼépa ere Simón? ¿Mávapa opaga umi impuestokuéra umi mburuvicha guasúpe? ¿Itaʼyrakuéra térãpa ótro hénte?”. Pedro ombohovái: “Ótro hénte”. Jesús heʼi chupe: “Upéicharõ itaʼyrakuéra natekotevẽi opaga umi impuésto” (Mateo 17:25, 26).

Jesús Túva ningo pe Mburuvicha Guasu Ijojahaʼỹva ha chupe ojeadora pe témplope, upévare Ñandejára Raʼy natekotevẽi opaga impuésto templopegua. Upéicharõ jepe Jesús heʼi: “Péro ani hag̃ua ñambopochy chupekuéra, tereho epoi ne pinda pe márpe, ha reikutu vove peteĩ pira, renohẽta ijurúgui peteĩ monéda de pláta. Egueraha upe monéda ha emeʼẽ chupekuéra, cherehe ha nderehe” (Mateo 17:27).

Umi disípulo oĩmbárõ guare oñondive, oporandu Jesúspe mávapa hína iñimportanteve pe Rréinope. Haʼekuéra ningo noporanduséi kuri mbaʼeve Jesúspe imuértere, péro koʼág̃a ndokyhyjéi oporandu hag̃ua mbaʼe puéstopa otokáta chupekuéra. Péro Jesús oikuaa mbaʼépa opensa hína ijapostolkuéra. Haʼe oikuaa mbaʼépa oiko tapére oukuévo hikuái Capernáumpe. Upévare oporandu: “¿Mbaʼére piko pejodiskuti raʼe tapére?” (Marcos 9:33). Umi disípulo ojodiskuti kuri ohecha hag̃ua mávapa iñimportanteve ijapytepekuéra. Upévare otĩeterei ha okirirĩnte hikuái. Amo ipahápe, umi apóstol oporandu Jesúspe: “¿Mávapa añetehápe tuichave hína pe Rréino yvagapeguápe?” (Mateo 18:1).

¡Ni ndajagueroviaséi ningo haʼekuéra osegiha ojodiskuti koʼã mbaʼére! Ojapóma tres áño potaite Jesús omboʼe hague oikóvo chupekuéra. Péro haʼekuéra ningo iñimperfékto, ha oĩ vaʼekue pe rrelihión hudíape, omboʼéva iñimportantetereiha  pe puésto ha autorida. Avei ndaʼaréi Jesús opromete Pédrope omeʼẽtaha umi “lláve” pe Rreinopegua. ¿Oimépa haʼe oñembotuicha upévare? Térã ikatu avei Santiago ha Juan opensa iñimportanteveha pórke ramoite ohecha kuri pe visión ohechaukáva mbaʼéichatapa Jesús Irréinope.

Jesús ohechakuaa tekotevẽha okorrehi ijapostolkuérape. Ohenói peteĩ mitãʼi, omoĩ imbytepekuéra ha heʼi: “Añetehápe haʼe peẽme: Napekambiáiramo pepensa lája, ha peiko mitãicha, ni mbaʼevéicharõ ndapeikemoʼãi pe Rréino yvagapeguápe. Upévare, oimeraẽ oñemomirĩva ko mitãicha, péva hína pe tuichavéva pe Rréino yvagapeguápe. Ha oimeraẽ orresivíva peteĩ mitãmi koichaguápe che rérape, chéve avei cherresivi hína” (Mateo 18:3-5).

¡Ajépa okorrehi porãite idisipulokuérape! Jesús ndojahéiri hesekuéra ni ndeʼíri chupekuéra itaryrýi ha oñemombaʼeguasuseha. Upéva rangue oipuru peteĩ mitãme ehémploramo. Umi mitã ningo ndoikói opensa mávapa ipuésto yvateve ni omandave. Haʼekuéra iñumílde. Péicha Jesús ohechauka idisipulokuéra oñehaʼã vaʼerãha iñumílde umi mitãicha. Heʼi chupekuéra: “Pe oñemomichĩvéva pende apytépe, upéva hína pe tuichavéva” (Lucas 9:48).