To wunmẹdidiọ lọ po azọ̀nhinhẹngbọna visunnu he tindo gbigbọ aovi tọn de po godo to agbegbe Sesalea Filippi tọn ji, Jesu dedo Kapẹlnaumi. E zingbejizọnlin po devi etọn lẹ kẹdẹ po, na gbẹtọgun lẹ nikaa “yọnẹn.” (Malku 9:30) Ehe hùn dotẹnmẹ devo dote na ẹn nado wleawuna devi etọn lẹ na okú etọn, podọ na azọ́n he yé na wà to enẹgodo. E basi zẹẹmẹ dọmọ: “Visunnu gbẹtọ tọn na yin didehia do alọ gbẹtọ lẹ tọn mẹ, bọ yé na hù i, podọ to azán atọ̀ntọ gbè, e na yin finfọn.”—Matiu 17:22, 23.

Hogbe ehelẹ ma dona ko yin onú yọyọ de na devi etọn lẹ. Jesu dọ to ojlẹ de mẹ wayi dọ emi na yin hùhù, ṣigba Pita gbẹ́ nado yise dọ enẹ sọgan jọ. (Matiu 16:21, 22) Podọ apọsteli atọ̀n wẹ mọ wunmẹdidiọ lọ bosọ sè hodọdopọ de gando “yìyì” Jesu tọn go. (Luku 9:31) Todin, hodotọ etọn lẹ “blawu tlala” gando nuhe Jesu to didọ lẹ go, dile etlẹ yindọ yé ma mọnukunnujẹ zẹẹmẹ hogbe etọn lẹ tọn mẹ to gigọ́ mẹ. (Matiu 17:23) Etomọṣo, yé dibu nado kannubiọ ẹ dogọ gandego.

To ojlẹ de godo, yé jẹ Kapẹlnaumi, yèdọ ahọnkan lizọnyizọn Jesu tọn, podọ tòdaho he mẹ apọsteli susu wá sọn. To finẹ, sunnu he nọ ṣinyan takuẹ tẹmpli tọn lẹ dọnsẹpọ Pita. Vlavo, nado sawhẹdokọna Jesu dọ e ma nọ sú tòkuẹ, yé kanse dọ: “Be mẹplọntọ mìtọn ma nọ sú [takuẹ tẹmpli tọn] dlakma awe tọn lọ wẹ ya?”—Matiu 17:24.

Pita gblọn dọ “Mọwẹ.” To whenue yé lẹkọwa whégbè, Jesu ko yọ́n nuhe jọ. Enẹwutu, kakati nado nọte Pita ni fọ́n whẹho lọ dote, e kanse e dọmọ: “Etẹwẹ hiẹ lẹn, Simọni? Mẹnu si wẹ ahọlu aigba tọn lẹ nọ yí dèkuẹ lẹ kavi takuẹ te? Sọn visunnu yetọn lẹ si kavi sọn jonọ lẹ si? Pita gblọn dọmọ: “Sọn jonọ lẹ si.” Enẹgodo Jesu dọmọ: “To whenẹnu, be visunnu lẹ vò sọn tòkuẹ nina mẹ niyẹn.”—Matiu 17:25, 26.

Otọ́ Jesu tọn wẹ yin Ahọlu wẹkẹ lọ tọn podọ mẹhe nọ yin sinsẹ̀n basina to tẹmpli lọ mẹ. Enẹwutu, e ma sọgbe to osẹ́n-liho nado biọ dọ Visunnu Jiwheyẹwhe tọn ni sú takuẹ tẹmpli tọn. Ṣigba Jesu dọ dọ, “na mí nikaa hẹn yé dahli wutu, yì ohù ji bo dlan omlẹn, bosọ yí whèvi tintan he na wá aga, podọ eyin hiẹ kẹ̀ onù etọn, a na mọ fataka-kuẹ de. Yí enẹ bo ze e jo na yé, na yẹn po hiẹ po tọn.”—Matiu 17:27.

Ojlẹ kleun de to enẹgodo, devi lẹ kanhose Jesu gando mẹhe na klohugan to Ahọluduta lọ mẹ go. To ojlẹ kleun de jẹnukọn, sunnu ehelẹ ko dibu nado kannubiọ Jesu gando okú etọn go, ṣigba todin yé ma dibu nado dọho hẹ ẹ gando sọgodo yelọsu tọn go. Jesu yọ́n nuhe lẹn yé te. Nuhe go devi lẹ ko dọnnu gando to gbejizọnlinzin yetọn jei Kapẹlnaumi whenu lọ wẹ, ehe zọ́n bọ yé ma deafọ. Enẹwutu, e kanse yé dọ: “Etẹ dọ̀n wẹ mì te to aliho ji?” (Malku 9:33) Winyan hù devi lẹ bọ yé ma kẹnù, na yé ko dọnnu to yedelẹ ṣẹnṣẹn gando mẹhe klohugan go wutu. To godo mẹ, apọsteli lẹ kàn kanbiọ he ji yé ko to nudọn do lọ sè Jesu dọmọ: “Mẹnu wẹ yin mẹhe klohugan to Ahọluduta olọn tọn mẹ taun?”—Matiu 18:1.

E vẹawu nado yise dọ devi lẹ na dọnnu gando whẹho mọnkọtọn go, to whenue yé ko dotoaina Jesu bosọ mọ nuyiwa etọn lẹ na nudi owhe atọ̀n godo. Ṣigba, gbẹtọ mapenọ wẹ yé yin. Podọ to sinsẹ̀n he mẹ yé yin pinplọn whẹ́n te, ogántẹn po tẹnmẹ-yinkọ po wẹ nọ duahunmẹna  gbẹtọ lẹ hugan. Humọ, to ojlẹ kleun de jẹnukọn, Jesu dopà nado na Pita “họnhungan” Ahọluduta lọ tọn delẹ. Be enẹ sọgan ko zọ́n bọ e na lẹndọ emi yiaga hú mẹhe pò lẹ wẹ ya? Jakọbu po Johanu po sọgan ko tindo numọtolanmẹ dopolọ, na yelọsu yin kunnudetọ wunmẹdidiọ Jesu tọn wutu.

Depope he whẹho lọ yin, Jesu yí nude wà nado jla pọndohlan yetọn do. E ylọ ovi pẹvi de, bo ze e do ṣẹnṣẹn devi lẹ tọn, bosọ dọna yé dọmọ: “Eyin mìwlẹ ma diọ bo taidi yọpọvu lẹ, mì ma na biọ Ahọluduta olọn tọn mẹ to aliho depope mẹ. Enẹwutu, mẹdepope he na whiwhẹ ede taidi yọpọvu ehe wẹ yin mẹhe klohugan to Ahọluduta olọn tọn mẹ; podọ mẹdepope he yí yọpọvu ehe nkọtọn dopo to oyín ṣie mẹ, yí yẹnlọsu ga.”—Matiu 18:3-5.

Aliho mẹpinplọn tọn dagbe nankọ die! Jesu ma gblehomẹ do devi etọn lẹ go bo ylọ yé dọ nukunkẹnnọ kavi ṣejannabinọ gba. Kakatimọ, e yí nuplọnmẹ titengbe de zan. Otẹn he yiaga kavi yindidi ma nọ duahunmẹna yọpọvu lẹ paali. Gbọnmọ dali, Jesu dohia dọ pọndohlan ehe wẹ devi emitọn lẹ lọsu dona wleawuna gando yede go. Enẹgodo, nado dotana nuplọnmẹ lọ, e dọna hodotọ etọn lẹ dọmọ: “Ewọ he ze ede whè to mìmẹpo ṣẹnṣẹn wẹ omẹ lọ he klo.”—Luku 9:48.