Pengudah Jesus berubah gamal sereta ngeraika siku nembiak ke dirasuk melikat ti jai di Kaisaria Pilipi, Jesus ngagai Kapernaum. Maya nya, Jesus semina bejalai enggau bala murid iya, laban iya enggai orang “nemu dini alai iya.” (Mark 9:30) Enggau nya, Jesus bisi peluang baru ngambika ulih nyediaka ati bala murid iya ke pemati iya, sereta pengawa ke deka digaga sida pengudah iya mati. Iya madah: “Anak Mensia deka diserahka ngagai munsuh. Sida deka munuh iya. Lalu ba hari ti ketiga, iya deka diidupka baru.”—Matthew 17:22, 23.

Utai ke dipadahka Jesus ukai utai ti baru didinga sida. Sebedau tu, Jesus kala madah iya deka dibunuh. Tang Peter enggai pechayaka nya. (Matthew 16:21, 22) Kelimpah ari nya, tiga iku rasul udah meda Jesus berubah gamal lalu ninga randau pasal Jesus ke deka “mupuk.” (Luke 9:31) Nya alai, ati bala murid Jesus “balat tusah,” taja pan sida enda entu meretika jaku Iya. (Matthew 17:23) Tang sida takut deka nanya iya mayuh agi pasal pekara nya.

Enda lama udah nya, sida datai ba Kapernaum, iya nya endur alai Jesus mayuh ngereja pengawa nginjil. Lalu Kapernaum mega endur asal beberapa iku ari bala rasul Jesus. Ba dia, orang ke ngumpul chukai Rumah Sembiang mansang ngagai Peter. Sida engka deka nuduh Jesus laban enda mayar chukai. Nya alai, sida nanya Peter: “Kati pengajar kita bisi mayar duit chukai Rumah Sembiang?”—Matthew 17:24.

“Bisi,” Peter nyaut. Maya nya, Jesus ba rumah, tang iya nemu utai ke udah nyadi. Ari ke nganti Peter nyebut pasal pekara nya, Jesus dulu agi nanya: “Baka ni ku penemu nuan, Simon? Ari sapa raja dunya ngambi chukai barang enggau chukai pala? Ari anak sida, tauka ari orang ke enda dikelala?” Peter nyaut: “Ari orang ke enda dikelala.” Udah nya, Jesus nyaut: “Enti pia, anak sida enda ibuh mayar chukai.”—Matthew 17:25, 26.

Apai Jesus nya Raja Alam Semesta lalu Iya disembah ba Rumah Sembiang nya. Nya alai, Jesus enda ibuh mayar chukai. Taja pia, Jesus madah: “Tang ngambika sida enda pedis ati, alai nuan nginti ba danau. Dalam nyawa ikan ti keterubah ke diulih nuan, nuan deka tetemuka sesingkap duit pirak. Bai duit nya lalu beri ngagai sida, kena mayar chukai ke tua.”—Matthew 17:27.

Enda lama pengudah nya, bala murid Jesus begelumu. Taja pan sida takut deka nanya Jesus pasal pemati iya, tang sida enda nangi deka nanya Jesus pasal sapa ke pemadu besai ba Perintah serega. Sida deka nemu pasal utai ke deka nyadi ngagai sida jemah ila. Jesus nemu utai ke diperundingka sida. Iya nemu sida bekelikuh lebuh sida ba pejalai ngagai Kapernaum. Nya alai, iya nanya: “Nama utai ti dikelikuhka kita ba rantau jalai tadi?” (Mark 9:33) Tang bala murid malu deka nyaut. Nyadi, sida enda bemunyi laban sida bekelikuh pasal sapa ke pemadu besai entara sida. Ke pengujung iya, bala rasul madah ngagai Jesus pasal tanya ke dikerandauka sida. Nya alai, sida nanya: “Sapa orang ke pemadu besai dalam Perintah serega?”—Matthew 18:1.

Taja pan sida udah tiga taun begulai enggau Jesus, tang nama kebuah sida agi bekelikuh pasal pekara nya? Tu ketegal sida enda sempurna, lalu ari mit sida udah dikelingi orang ke ngemeratka pangkat sereta penuduk ti tinggi.  Kelimpah ari nya, Jesus baru besemaya enggau Peter deka meri iya “kunchi” Perintah. Ketegal nya, kati Peter ngasaika diri penting agi ari orang bukai? Nambahka nya, James enggau John engka ngasaika utai ti sama laban sida meda enggau mata sida empu, Jesus berubah gamal ba mua sida.

Nya alai, Jesus patut ngemetulka runding sida. Jesus ngangauka siku anak mit, lalu ngasuh iya bediri ba tengah-tengah sida. Ku Jesus madah ngagai bala murid iya: “Enti kita enda berubah lalu nyadi baka anak mit, kita enda ulih tama ngagai Perintah serega. Nya alai, barang sapa ke ngemaruhka diri baka anak mit tu, iya meh ke pemadu besai dalam Perintah serega. Lalu barang sapa nerima anak mit baka tu dalam nama aku, mega nerima aku.”—Matthew 18:3-5.

Chara Jesus ngajar amat manah. Iya enda nganu bala murid iya, tauka ngumbai sida amu sereta gila pangkat. Tang iya ngena anak mit kena ngajar bala murid iya. Bala anak mit enda ngemeratka pangkat ti tinggi tauka ngumbai diri penting agi ari orang bukai. Nya alai, Jesus ngasuh bala murid iya ngembuan runding ke baka nya. Ba pengujung iya, Jesus madah ngagai sida: “Barang sapa ke ngemaruhka diri, iya meh ke besai agi.”—Luke 9:48.