Kalpasan ti panagbalbaliw ti langa ni Jesus ken ti panangpaimbagna iti ubing a lalaki a naluganan iti demonio idiay Cesarea Filipos, napan idiay Capernaum. Dagiti laeng adalanna ti kaduana a nagdaliasat tapno saan a “maammuan” dagiti tattao. (Marcos 9:30) Daytoy ti mangted kenkuana iti gundaway a mangisagana kadagiti adalanna iti ipapatayna ken iti trabaho nga aramidendanto. Inlawlawagna: “Mayawat ti Anak ti tao iti ima dagiti bumusbusor kenkuana, ket patayendanto, ngem mapagungar iti maikatlo nga aldaw.”​—Mateo 17:​22, 23.

Saan koma a masdaaw dagiti adalanna iti daytoy nga imbagana. Imbagana idin a mapapatay, ngem saan a mamati ni Pedro a mapasamak dayta. (Mateo 16:​21, 22) Nakita met ti tallo nga apostol ti panagbalbaliw ti langana ken nangngegda ti saritaan maipapan iti ‘ipapanaw’ ni Jesus. (Lucas 9:31) Gapuna, “kasta unay ti ladingit” dagiti pasurotna maipapan iti ibagbaga ni Jesus, nupay saanda a maawatan ti kaipapanan dagiti sasaona. (Mateo 17:23) Ngem mabutengda nga agsaludsod kenkuana maipapan iti dayta.

Idi agangay, nakasangpetdan idiay Capernaum, ti sentro ti aktibidad ni Jesus ken ti ili ti sumagmamano kadagiti apostolna. Sadiay nga immasideg ken Pedro dagiti lallaki nga agsingsingir iti buis ti templo. Mabalin a tapno padasenda nga akusaran ni Jesus a saan nga agbaybayad iti buis, dinamagda: “Agbaybayad met kadi iti buis [ti templo] ti mannursuroyo?”​—Mateo 17:24.

“Wen,” insungbat ni Pedro. Idi nagsublidan iti balay, ammon ni Jesus ti napasamak. Gapuna, imbes nga urayenna ni Pedro a mangibaga iti dayta, insaludsod ni Jesus: “Panagkunam, Simon, paggapgapuan ti nagduduma a buis a maaw-awat dagiti ari ditoy daga? Kadagiti annakda wenno kadagiti sabsabali?” Insungbat ni Pedro: “Kadagiti sabsabali.” Kinuna ni Jesus: “Saan ngarud nga agbayad dagiti annak iti buis.”​—Mateo 17:​25, 26.

Ti Ama ni Jesus ti Ari iti intero nga uniberso ken Daydiay daydayawenda iti templo. Gapuna, saan a masapul nga agbayad iti buis ti templo ti Anak ti Dios. “Ngem tapno awan ti maibagada,” kinuna ni Jesus, “mapanka agbanniit idiay baybay ken ungapem ti ngiwat ti ikan nga umuna a mabanniitam ket makakitakanto iti pirak a sinsilio [maysa nga estater, wenno tetradrakma]. Alaem dayta sa bayadam ti buista.”​—Mateo 17:27.

Idi kuan, naguummong dagiti adalan ket sinaludsodda ken Jesus no asino ti agbalin a katan-okan iti Pagarian. Dagitoy met laeng dagidi mabuteng nga agsaludsod ken Jesus maipapan iti umay nga ipapatayna, ngem ita, naturedda a mangsaludsod iti masakbayanda. Ammo ni Jesus ti pampanunotenda. Nagsusupiatanda dayta idin bayat a magmagnada nga agsubli idiay Capernaum. Gapuna, insaludsodna: “Ania ti nagsusupiatanyo iti dalan?” (Marcos 9:33) Gapu ta nabainanda, nagulimek dagiti adalan, ta nagsusupiatda no asino ti katan-okan kadakuada. Gapuna, dagiti apostol imbagada ken Jesus ti nagsusupiatanda: “Asino ti katan-okan iti Pagarian ti langit?”​—Mateo 18:1.

Kasla di nakappapati a pagsusupiatan dagiti adalan dayta kalpasan a dandani tallo a tawen a napalpaliiw ken nangnangngegda ni Jesus. Ngem siempre, imperpektoda. Dimmakkelda pay iti relihioso a lugar a maipagpaganetget ti saad ken posision. Kasta met, nabiit pay nga inkari ni Jesus ken Pedro ti sumagmamano a “tulbek” ti Pagarian. Mariknana ngata nga isu ti katan-okan? Mabalin  a kasta met laeng da Santiago ken Juan, ta nakitada a mismo ti panagbalbaliw ti langa ni Jesus.

Aniaman ti makagapu, tinubngar ida ni Jesus. Nangayab iti maysa nga ubing ket pinagtakderna iti tengngada, ken imbagana kadagiti adalan: “No saankay nga agbalbaliw ken agbalin a kas kadagiti ubbing, saankayto a makastrek iti Pagarian ti langit. Gapuna, asinoman nga agpakumbaba a kas iti daytoy nga ubing, isunto ti katan-okan iti Pagarian ti langit; ket asinoman nga umawat iti maysa a kas iti daytoy nga ubing maigapu iti naganko, inawatnak metten.”​—Mateo 18:​3-5.

Talaga a nagsayaat dayta a pamay-an ti panangisuro! Saan a nakaunget ni Jesus kadagiti adalanna ken saanna nga inawagan ida nga agum ken ambisioso. Imbes ketdi, nangusar iti banag a pakasursuruanda. Napakumbaba ken saan a napannakkel dagiti ubbing. Ipakpakita ngarud ni Jesus a masapul a patanoren dagiti adalan ti kinapakumbaba. Kalpasanna, inngudo ni Jesus ti leksion para kadagiti pasurotna. Kinunana: “Ti agbalin a nanumnumo kadakayo isu ti natan-ok.”​—Lucas 9:48.