Ĩtina wa ũla woni wa kũalyũka kwa mũvw’ano wa Yesũ na ĩtina wa kũvow’a kwa kamwana kaĩ na ndaimoni kĩsionĩ kya Kaisalea ya Vilivu, Yesũ nĩwaendie kĩsionĩ kya Kavelinaumi. Yesũ ndaaendany’a na andũ angĩ ate o amanyĩw’a make nũndũ ndendaa ĩkomano yĩimanya “ĩũlũ wa ũndũ ũsu.” (Maliko 9:30) Kwĩka ũu nĩkwatumie ombany’a amanyĩw’a kwondũ wa kĩkw’ũ kyake na kwondũ wa wĩa ũla meeteele kũtethya. Ĩvindanĩ yĩu me oka, ameie atĩĩ: “Mwana wa mũndũ nũkũvũnyanĩwa kũla kwĩ andũ, namo makamũaa, na mũthenya wa katatũ aithayũũkw’a.”—Mathayo 17:22, 23.

Yĩu tiyo yaĩ ĩvinda ya mbee Yesũ kũmatavya ĩũlũ wa kĩkw’ũ kyake. Mbeenĩ, nĩwamatavĩtye kana aĩ oawe, o na kau Vetelo ndaaĩtĩkĩla kana ũndũ ũsu no wĩkĩke. (Mathayo 16:21, 22) Atũmwa atatũ ma Yesũ nĩmeeyoneie kũalyũka kwa mũvw’ano wake na meew’a ngewa ĩla yaendeee ĩũlũ wa ‘kũthi’ kwake. (Luka 9:31) Amanyĩw’a asu maendanĩtye na Yesũ nĩmakwatiwe nĩ “kyeva mũno” nũndũ wa ndeto ila wamatavisye o na kau mayaeleawa nesa ũito wasyo. (Mathayo 17:23) O na ũu wĩ o vo, nĩmakĩaa kũmũkũlya ĩũlũ wa ũndũ ũsu.

Yesũ na amanyĩw’a make nĩmavikie Kavelinaumi, ndũanĩ ĩla watavanĩtye mũno na nĩvo amanyĩw’a make aingĩ maumĩte. Me vau, andũ ala moosanasya koti wa ĩkalũ nĩmaendie vala ve Vetelo. Noĩthwa andũ asu mendaa kwanangĩa Yesũ ĩsyĩtwa kwa kwasya kana ndaĩvaa koti, na kwoou makũlya atĩĩ: “Mũmanyĩsya wenyu nũĩvaa koti wa [ĩkalũ] ndulakima ilĩ?”—Mathayo 17:24.

Vetelo amasũngĩie amea atĩĩ: “Ĩĩ.” Ĩndĩ Yesũ e o nyũmba nĩwamanyie maũndũ ala meekĩka. Yĩla Vetelo walikile nyũmba, Yesũ ndaaeteela Vetelo ese kũmũelesya kĩla kyeethĩwa, na kwoou amũkũlya-ĩ: “We wĩona ata Simoni? Asumbĩ ma nthĩ mosanasya ĩelo kana koti wa kĩla mũndũ kuma kwaũ? Nĩ kuma kwa ana moo, kana nĩ kuma kwa aeni?” Vetelo asũngĩie asya: “Kuma kwa aeni.” Ĩtina wa kũsũngĩa ũu, Yesũ amwĩie atĩĩ: “Nĩ w’o, ana mayĩĩvaa koti.”—Mathayo 17:25, 26.

Ĩthe wa Yesũ nĩwe Mũsumbĩki ũla mũnene vyũ ĩtunĩ na nthĩ, na nĩwe wathaithĩawa ĩkalũnĩ. Kwoou, nĩ ũndũ waaĩlĩte kwasya kana Mwana wa Ngai ndaaĩle kumya koti wa ĩkalũ. Ĩndĩ Yesũ eeie Vetelo atĩĩ: “Nĩ kana tũikamalulutĩkye, enda ũkanganĩ ũkekye ndoano, na ũyosa ĩkũyũ yĩla ũũkwatya mbee, na wayathamũkany’a kanyw’a, nũkwĩthĩa sekeli wa vetha [ndulakima inya]. Wose ũĩve kwondũ wakwa na kwondũ waku.”—Mathayo 17:27.

Ĩtina wa kavinda kanini, amanyĩw’a onthe maĩ vamwe, na mambĩĩa kũmũkũlya Yesũ ĩũlũ wa ũla ũkethĩwa e mũnene Ũsumbĩnĩ wa ĩtu. Mbeenĩ, amanyĩw’a asu nĩmaemetwe nĩ kũmũkũlya Yesũ ĩũlũ wa kũkw’a kwake, ĩndĩ yu mayaaemwa nĩ kũmũkũlya ĩũlũ wa ũndũ ũsu wakonetye ĩvinda yoo yũkĩte. Yesũ nĩwamanyie mosũanĩo moo nũndũ me nzĩanĩ maendete Kavelinaumi makwetye kũkananĩa me ĩtina wake ĩũlũ wa ũla mũnene katĩ woo. Amakũlilye-ĩ: “Mwĩneenanĩasya kyaũ nzĩanĩ?” (Maliko 9:33) Amanyĩw’a asu mavindisye mew’ĩte nthoni mbingĩ nũndũ makananĩaa ĩũlũ wa ũla mũnene katĩ woo. Mũthya, nĩmesie kũmũkũlya Yesũ ĩkũlyo yĩla makũlanasya. Mamũkũlilye:  “Nũũ mũnene Ũsumbĩnĩ wa ĩtu?”—Mathayo 18:1.

Nũndũ amanyĩw’a nĩmekalanĩtye na Yesũ na nĩwamamanyĩĩtye kwa ĩvinda ya myaka vakuvĩ ĩtatũ, ndwaĩ ũndũ wa kwendeesya nongi kwona maikananĩa ĩũlũ wa ũla ũkethĩwa e mũnene katĩ woo. Ĩndĩ o na vamwe na ũu, maĩ andũ me na naĩ na meanĩe kĩsionĩ kyaĩ na ndĩni yeekĩaa andũ vinya memanthĩe monene. O na ĩngĩ, Vetelo nĩweew’ĩte Yesũ aimwatha kũmũnenga “mbungũo” sya Ũsumbĩ. Ũu nĩwĩthĩwa watumie ona tawe mũnene kwĩ ala angĩ? O na no kwĩthĩwa Yakovo na Yoana meew’aa o ta Vetelo nũndũ nĩmeeyoneete mũvw’ano wa Yesũ ũialyũka.

O na ethĩwa nĩ ũndũ wĩva watumaa atũmwa menda kwĩthĩwa me anene, Yesũ nĩwalũngile mosũanĩo moo. Eetie kana kanini na akaũngamya katĩ woo na amea atũmwa make atĩĩ: “Mwaema kũalyũka mwĩthĩwe ta syana nini mũikalika nongi Ũsumbĩnĩ wa ĩtu. Kwoou, mũndũ o na wĩva ũla ũkenyivya ta kana kaa kanini nĩwe mũnene Ũsumbĩnĩ wa ĩtu; na mũndũ o na wĩva ũla ũthokasya kana kamwe kanini ta kaa ĩsyĩtwanĩ yakwa ninyie ũkethĩwa athokya.”—Mathayo 18:3-5.

Yesũ atũmĩie nzĩa nzeo mũno vyũ ya kũmanyĩsya! Ndaamathatĩa amanyĩw’a make na ndaamona ta andũ maĩ na ĩtomo na mendete monene. Ĩndĩ atũmĩie ngelekany’o ĩtesa kũla nĩ kana amatetheesye. Syana nini iyĩthĩawa na nguma na monene. Kwoou, Yesũ nĩwamatetheeisye amanyĩw’a make memanyĩsye kwĩthĩwa na woni ta ũsu wa syana nini. Aiminĩĩa ngelekany’o ĩsu yake, nĩwamatavisye ũndũ wa vata amea-ĩ: “Ũla wĩkuaa ta mũnini katĩ wenyu inyw’onthe ũsu nĩwe mũnene.”—Luka 9:48.