Panyuma ya kimwesho kya kwaluka ne kubuka kalombwana wajinga na ndemona mu mpunzha yajinga kwipi na Kesalea Filipai, Yesu wayile ku Kapenama. Wayiletu na baana banji ba bwanga, kechi wakebele muntu nangwa umo “kuyuka kino ne.” (Mako 9:30) Waubile bino kuba’mba akwashe baana banji ba bwanga saka akyangye kufwa ne kwibafunjisha mingilo yo bakengilanga. Wibalumbulwijile’mba: “Mwana muntu bakamusolola ne kumupana mu maboko a bantu, kabiji bakamwipaya, ne kusangulwa pa juba ja busatu.”—Mateo 17:22, 23.

Kino kechi kyo kyajinga kimye kitanshi Yesu kwamba bino byambo ne. Kimye kitanshi waambile pa byo bakamwipaya nangwa kya kuba Petelo wakaine’mba kino kechi kikamumwekela ne. (Mateo 16:21, 22) Batumwa basatu bamwene kimwesho kya kwaluka kabiji baumvwine mwisambo wa “kufumapo” kwa kwa Yesu. (Luka 9:31) Baana banji ba bwanga “baubile bingi bulanda” pa kumvwa byaambile Yesu nangwa kya kuba kechi bakwatakenye mwatajile bintu byo aambilengapo ne. (Mateo 17:23) Pano bino, bachiine kumushikisha byavula.

Kepo bafikile ku Kapenama, Yesu ko aingijile bingi mwingilo wanji kabiji ko kwafumine batumwa bavula. Akwa, banabalume batambulanga misonko ya ku nzubo ya Lesa baishile kwi Petelo. Kampe bakebelenga kupamo Yesu mambo a kubula kupana misonko. Bamushikishe’mba: “Nanchi mufunjishi wenu kechi upana mali a madalika abiji a musonko [wa ku nzubo ya Lesa] nenyi?”—Mateo 17:24.

Petelo wakumbwile’mba: “Ee.” Yesu byo abwelele mu nzubo, wayukile kyamwekele. Onkao mambo, Petelo saka akyangye ne kumubuula ne, Yesu wamushikishe’mba: “Shimona, walangulukapo’mba ka? Nanchi bamfumu ba pano pa ntanda batambula misonko ku bañanyi? Ku baana babo nyi, inyi ku bantu bangi?” Petelo wakumbwile’mba: “Ku bantu bangi.” Ponkapo Yesu wamwambijile’mba: “Ko kuba’mba nanchi baana kechi bafwainwa kupana misonko ne.”—Mateo 17:25, 26.

Shanji Yesu ye Mfumu wa bilengwa byonse, kabiji ye bapopwelanga pa nzubo ya Lesa. Onkao mambo, Mwana Lesa kechi wafwainwe kupana musonko wa ku nzubo ya Lesa ne. Yesu waambile’mba: “Bino pa kuba’mba tubule kwibatuntwisha, yanga ku kalunga ka mema, ukatayepo kanda, kabiji utole jisabi jitanshi jo usakuloba, byo usakwijasamika mu kanwa, usakutaanamo jali ja muwayawaya ja siliva [siteta nangwa’mba Teteladilakima]. Usende ukebape, umpaineko amiwa ne obe mwine.”—Mateo 17:27.

Baana ba bwanga byo bakonkene pamo baipwizhe Yesu ukekala mukulumpe mu Bufumu. Bano bonka banabalume patanshi bachiine kumwipuzha Yesu pa mambo a lufu lwanji, pano pa kikye kimye kechi bachiine kumwipuzha byo bakekala kulutwe ne. Yesu wayukile byo balangulukilenga. Kyajinga kintu kyo byo bepachikilengapo kimye kyo bamulondejilenga pa kuya ku Kapenama. Onkao mambo, wibashikishe’mba: “Nanchi ñanyi kintu kyo mubepachikengapo mu jishinda?” (Mako 9:33) Baana ba bwanga byo baumvwine bumvu, bazhindaminetu nzoo, mambo mu jishinda bepachikilenga pa wafwainwe kwikala mukulumpe pe abo. Kepo batumwa babuujile Yesu bwipuzho bo bepachikilengapo amba: “Ñanyi mukulumpe mu Bufumu bwa mwiulu?”—Mateo 18:1.

Yesu wibafunjishe baana banji ba bwanga pa myaka nobe isatu, mu byubilo ne mu byo aambanga, onkao mambo, kechi bafwainwe kwipachikanga  ne. Pano bino, bajinga bambulwakulumbuluka. Kabiji bakomejile mu bisho bya bupopweshi byanemekele bingi bifulo. Kabiji Petelo waumvwine Yesu byo amulayile’mba ukatambula “makii” a Bufumu. Kampe kyo kyamulengejile kumona’mba ye mukulumpe pa bakwabo. Ba Yakoba ne Yoano nabo kampe bajinga na ino milanguluko mambo bamweneko kwaluka kwa kwa Yesu.

Nangwa byonkabyo, Yesu wibakwashishe kolola ndangulukilo yabo. Waichile mwana mucheche ne kumwimika pakachi kabo, kabiji wibambijile’mba: “Inge mwabula kupimpula byubilo byenu ne kwikala nobe baana ba bacheche, kechi mukatwelamo mu Bufumu bwa mwiulu ne. Onkao mambo, yense ukepelula nobe uno mwana mucheche, ye mukulumpe mu Bufumu bwa mwiulu; kabiji yense utambwila mwana mucheche mu jizhina jami, untambwila ne amiwa.” —Mateo 18:3-5.

Jino jajinga jishinda jawama ja kufunjishamo. Yesu kechi wibazhingijile baana banji ba bwanga ne, kabiji kechi wibambijile’mba belundumika, nangwa’mba baji na kichima nangwa kukebesha bifulo ne. Bino, waingijishe mwana mucheche pa kwibafunjisha. Baana ba bacheche bepelula kabiji kechi bakeba bukulumpe pa bakwabo nangwa kutumbalala ne. Onkao mambo, Yesu wamwesheshe’mba baana banji ba bwanga bafwainwe kwikala na bino byubilo bijipo na banyike. Wapezhezheko amba: “Yense wipelula mwine mwi anweba ye mukulumpe.”—Luka 9:48.