Jesu uya kwa Kapernauma hamulaho wa kufetuha ni kufolisa mushimani yanaakenwi ki mudimona mwa Sesarea wa Filipi. Uzamaya feela ni balutiwa bahae, kakuli halati kuli buñata ‘buzibe zateñi.’ (Mareka 9:30) Hape kueza cwalo kumufa kolo yakutusa balutiwa bahae kuitukiseza za lifu lahae ni musebezi obakapeta hasamulaho. Ubataluseza kuli: “Mwanaa mutu ukabetekiwa ka kufiwa mwa mazoho a batu, mi baka mubulaya, mi fa lizazi labulaalu, ukazusiwa kwa bafu.”—Mateu 17:22, 23.

Taba yeo haki yenca kwa balutiwa bahae. Kwamulaho, Jesu naabulezi ka za kubulaiwa kwahae nihaike kuli Pitrosi naasika lumela kuli nto yeo ikaezahala. (Mateu 16:21, 22) Hape baapositola babalaalu nebaboni Jesu hafetuha ni kuutwa inze aambola ka za “kufunduka.” (Luka 9:31) Cwale balutiwa bahae “baswaba hahulu” bakeñisa zabulela, nihaike kuli habautwisisi luli zatalusa manzwi ahae. (Mateu 17:23) Kono basaba kumubuza hape ka zateñi.

Hamulaho wa nako bafita mwa Kapernauma, mwakutaleza hahulu Jesu ni mokusimuluha babañwi kwa baapositola bahae. Mwateñi, batelisi baatumela Pitrosi. Mwendi ka kubata kutameleza Jesu kuli haalifi mutelo, babuza Pitrosi bali: “Kana muluti wamina watela lidrakima zepeli za mutelo [wa tempele]?”—Mateu 17:24.

Pitrosi ualaba kuli: “Kucwalo.” Jesu inze ali mwa ndu ki kale aziba zeezahezi. Ka mukwa ocwalo, mwasibaka sakulibelela kuli Pitrosi ato mutaluseza taba yeo, Jesu umubuza kuli: “Ubona cwañi Simoni? Malena ba lifasi baamuhelanga litifo kamba mutelo ku bo mañi? Kwa bana babona kamba kwa batu basili?” Pitrosi uli: “Kwa batu basili.” Honafo, Jesu uli: “Uzibe bana habatokwi kutela.”—Mateu 17:25, 26.

Ndatahe Jesu ki Mulena wa pupo kaufela, mi ki Yena yalapelwa kwa tempele. Ka mukwa ocwalo, Mwanaa Mulimu haswaneli kulifa mutelo wa tempele. Jesu uli: “Kono kuli lusike lwabasitatalisa, uye kwa liwate, uyo nepa kashuto, mi uunge tapi yapili yokaswala, mi hauka iatamisa mulomo, ukafumana mwateñi sheleñi ya silivera. Uunge sheleñi yeo, mi ubafe yona, ibe mutelo waka ni wahao.”—Mateu 17:27.

Kutuha fo, balutiwa bakopana hamoho mi banani puzo yebabata kubuza Jesu ka za yakaba yomutuna mwa Mubuso. Kwamulaho, baana ba, nebasabile kubuza Jesu ka za lifu lahae, kono cwale habasabi kumubuza ka zekaezahala ku bona kwapili. Jesu waziba zebanahana. Ki taba yene bakananisani ka za yona hane bazamaya mwamulaho wa Jesu kukutela kwa Kapernauma. Ka mukwa ocwalo, ubabuza kuli: “Nemukananañi mwa nzila?” (Mareka 9:33) Ka kuutwa maswabi, balutiwa bakuza feela kakuli nebakanana ka za kuli ki mañi yomutuna mwahalaa bona. Kwa mafelelezo, baapositola babuza Jesu puzo yene baambola ka za teñi ya kuli: “Ki mañi luli yomutuna mwa Mubuso wa mahalimu?”—Mateu 18:1.

Kwa komokisa kuli balutiwa bakanana ka za taba yecwalo hamulaho wa kuba ni Jesu ni kuteeleza ku yena ka lilimo zebato ba zetaalu. Nihakulicwalo, habasika petahala. Mi bahulezi mwa bulapeli bobuunga litulo kuba za butokwa hahulu. Hape Pitrosi kihona hanaasazo utwa Jesu inze amusepisa “linotolo” za Mubuso. Ka mukwa ocwalo, waswanela kuikutwa kuba yomutuna.  Jakobo ni Joani ni bona baikutwa cwalo, kakuli nebaiponezi kufetuha kwa Jesu.

Ibe kuli kucwalo kamba kutokwa, Jesu uunga muhato wa kusikulula mubonelo wabona. Ubiza mwanana ni kumuyemisa mwahalaa bona, kihona abulelela balutiwa bahae kuli: “Konji hamuka fetuha kuba sina banana babanyinyani, hamuna kukena mwa Mubuso wa mahalimu. Kabakaleo, mutu kaufela yakaikokobeza sina mwanana yomunyinyani yo, ki yena yomutuna mwa Mubuso wa mahalimu; mi mutu kaufela yaamuhela mwanana alimuñwi yacwalo ka libizo laka, uamuhela ni na.”—Mateu 18:3-5.

Wo ki mulutelo omunde luli! Jesu haanyemeli balutiwa bahae mi habaangi kuli banani mukwañuli kamba kulakaza litulo. Kono uitusisa mwanana kwa kubaluta. Banana babanyinyani hababangi ni litulo kamba mayemo apahami. Ka mukwa ocwalo, Jesu ubonisa kuli balutiwa bahae baswanela kuba ni mubonelo ocwalo. Cwale Jesu ufeleleza tuto yahae kwa balutiwa, ka kubulela kuli: “Yaikeza yomunyinyani mwahalaa mina kaufela ki yena yomutuna.”—Luka 9:48.