Yesu pa kupwa kushinta ne kubelula nsongwalume mukwatwe na ndemona mu ntanda ya Kesalea Fidipai, waenda ku Kapanama. Waenda mu bufyafya aye ne bandi bana ba bwanga kete, ‘kebasakilepo bibumbo biyuke.’ (Mako 9:30) Wamone uno mukenga mwanda wa kuteakanya bana bandi ba bwanga ku lufu lwandi ne ku mwingilo obasa kushala nao. Washintulula’mba: “Mwanā muntu usa kwabwa ku makasa a bantu, bakamwipaya, ne mu difuku dya busatu, ukasangulwa.”​—Mateo 17:22, 23.

Uno mwanda keufwaninwepo kwibatulumuna, mwanda ke musunsapo umbajinji waanena’o. Yesu wapwile kala kwisambila pa kwipaibwa kwandi, nansha Petelo byaapelele bu kebibwanikapo kulongeka. (Mateo 16:21, 22) Kadi batumibwa basatu bamwene kushinta kadi baivwana ne diwi dīsambila pa “kwenda” kwa Yesu. (Luka 9:31) Pano balondi bandi abafītwa “mutyima fututu” pa byanena Yesu, nansha byokebevwanijepo byonso byasaka kunena. (Mateo 17:23) Ino, abakwatwa moyo wa kumwipangwila’ko bikwabo.

Kupwa abafika mu Kapanama, kitako kine kya mwingilo wa Yesu kadi kyo kibundi kitambile’mo batumibwa bavule. Kwine’kwa, bantu basonkeja musonko wa tempelo abafwena kudi Petelo. Padi i mwanda wa kutopeka Yesu amba kafutangapo musonko, abaipangula Petelo amba: “Lelo mufundiji wenu kafutangapo musonko wa ndakuma ibidi [wa tempelo]?”​—Mateo 17:24.

Petelo walondolola’mba: “Aa, ufutanga.” Pobajokela kwinjibo Yesu wadi uyukile kala byalongekanga. Pa kyaba kya kwilaija Petelo amulombole mwanda, Yesu wamwipangula’mba: “A Shimona, le ulanga namani? Le balopwe ba ntanda bafutyijanga bāni bitanshi ne musonko wa muntu ne muntu? Le i babo bana’ni, i beni?” Petelo amba: “I beni,” Penepo Yesu wamunena’mba: “Nanshi na bubine bana kebasonkangapo.”​—Mateo 17:25, 26.

Shandya Yesu i Mulopwe wa diulu ne ntanda Mwine utōtwa mu tempelo. Nanshi, Mwanā Leza kadipo kyafutyila musonko wa mu tempelo. Yesu wanena’mba: “Ino kutyina’tu kwibakukaja, enda ku dijiba, ukalobe na bulobo, ebiya yata mushipa mubajinji owakasamuna’wa, posa kwiupūtula mu kyakanwa, usa kutana’mo kityele kya ndalama [shitatele imo, nansha ndakuma iná]. Yata’kyo ukebafute musonko wami ne obe.”​—Mateo 17:27.

Na pano kala bana ba bwanga abebunge pamo, kebepangula Yesu mwanda wa kuyuka mukatampe mu Bulopwe shi i ani. Enka bano bantu bamo bonka bakwetwe moyo wa kwipangula Yesu pa lufu lusa kumutana, ino pano kebakikwetwe moyo wa kumwipangula būmi bwabo bwa kumeso. Yesu uyukile byobalanga. I mwanda obepatenye ne dikwabo pobadi bamulonda kunyuma pa kujokela ku Kapanama. Penepa webepangula’mba: “I bika le byomwadi mwipatanya mwishinda?” (Mako 9:33) Bana ba bwanga pa kukwatwa bumvu, abaube talala, mwanda bepatanyanga pa kusaka kuyuka mukatampe mobadi shi i ani. Ku mfulo, batumibwa abalombola Yesu mwanda obadi bepatanya amba: “Lelo na bubine i ani utabukile bukatampe mu Bulopwe bwa mūlu?”​—Mateo 18:1.

Bimweka bu bikomo kwivwana bana ba bwanga bepatanya pa uno mwanda, abo bantu baikala na Yesu, bamumwene ne kumwivwana kintu kya myaka isatu mituntulu. Nabo i bampikwa kubwaninina. Batamine mu bipwilo mwadi  mufwilwa bifuko ne bitenta. Ne kadi, baivwene Yesu ulaya Petelo kumupa “mafungulo” amo a Bulopwe. Le ye uno wimwene bu mukatampe? Padi ba Yakoba ne Yoano ye bano nabo bemona nabya, nakampata byobemwenine kushinta kwa Yesu.

Nansha bikale namani, Yesu walemununa mulangilo wabo. Waite mwana mutyetye, ne kumwimika umbukata mwabo, kadi wasapwila bana ba bwanga amba: “Shi kemwalamukilepo ne kwikala pamo bwa bana batyetye, kemukatwelapo nansha dimo mu Bulopwe bwa mūlu. Nanshi, ense uketyepeja pamo bwa uno mwana mutyetye ye aye utabukile bukatampe mu Bulopwe bwa mūlu; kadi ense utambula yewa udi pamo bwa uno mwana mutyetye pa mwanda wa dijina dyami nabya wauntambula ne ami mwine.”​—Mateo 18:3-5.

Ano shao o manwa mayampe a mwa kufundijija! Yesu kalobēlepo bandi bana ba bwanga kadi kebetyilepo bu ba makomwa-meso nansha ba lwiso. Ino, waingidija biyampe kimfwa kimweke. Bana batyetye kebekalangapo na bitenta nansha na ntumbo. O mwanda Yesu walombola bandi bana ba bwanga amba basakilwa kwimona uno muswelo. Kupwa Yesu wavuya bufundiji na kunena balondi bandi amba: “Mwanda yewa wiendeja aye mwine pamo bwa mutyetyetyetye umbukata mwenu yao e ye mukatampe.”​—Luka 9:48.