Bang’ kit Yesu lokore e got kendo bang’ chango wuowi ma nigi jachien e alwora mar Kaisaria Filipi, Yesu koro ochomo Kapernaum. Owuotho ka en mana gi jopuonjrene kende mondo oganda kik “ong’e.” (Mariko 9:30) Mano miye thuolo momedore mar iko jopuonjrene ne thone kod tich ma gibiro timo bang’e. Yesu leronegi kama: “Wuod dhano idhi ndhog mi chiwe e lwet ji, kendo gininege kae to e odiechieng’ mar adek ibiro chiere.”​—Mathayo 17:22, 23.

Wachno ok onego obwog jopuonjrene ka gima en wach manyien. Yesu nosewacho motelo ni ibiro nege, kata obedo ni Petro ne okwer ni mano ok bi timore. (Mathayo 16:21, 22) Bende, joote adek ne oneno kit Yesu ka lokore kendo ne giwinjo mbaka e wi “wuokne e piny.” (Luka 9:31) Kata obedo ni jolup Yesu ok ong’eyo maber chuth tiend weche mowacho, gie sani gin “gi kuyo ahinya” nikech wechenego. (Mathayo 17:23) E wi mano, pod giluor penje weche momedore.

Bang’ kinde, gichopo Kapernaum kama Yesu jatimoe thoth tijene. Kanyo bende e taon ma thoth jootene wuokie. Ka gin kuno, joma sologa osuru mar hekalu biro ir Petro. Nyalo bedo ni gitemo donjo ne Yesu ni ok ochulga osuru. Gipenjo Petro niya: “Be japuonju chuloga osuru mar drakma ariyo [osuru mar hekalu]?”​—Mathayo 17:24.

Petro dwoko kama: “Ochuloga.” Sama Yesu donjo e ot ma Petro nitie, mano yudo ka oseng’eyo gima oa timoreno. Omiyo, kar rito mondo Petro e ma owachne gima oa timoreno, Yesu penjo Petro niya: “Ineno nade Simon? Ruodhi mag piny sologa osuru mopogore opogore koa kuom jomage? Kuom yawuotgi, koso kuom jomamoko?” Petro dwoke kama: “Kuom jomamoko.” Kae to Yesu wachone niya: “Kare adier yawuotgi ni thuolo kuom wach chulo osuru.”​—Mathayo 17:25, 26.

Wuon Yesu e Ruoth manie wi gik moko duto e piny gi polo, kendo en e Ng’at ma ji lamo e hekalu. Kuom mano, onge chik ma Wuod Nyasaye oketho ka ok ochulo osuru mar hekalu. Yesu wacho niya: “To mondo kik wachwanygi, dhi e nam ibol olow, kae to iyaw dho rech mikwongo mako to ibiro nwang’o fedha ma mingli [osach odiechienge ang’wen]. Kaw mano mondo ichulgo jogo, mara kod mari.”​—Mathayo 17:27.

Mapiyo bang’ mano, jopuonjre bedo kanyachiel kae to gipenjo Yesu e wi ng’at ma dibed ni biro bedo maduong’ie moloyo e Pinyruoth. Jopuonjrego nyocha oluor penjo Yesu wach thone. To sani ok giluor penje e wi ngimagi giwegi mar kinde ma biro. Yesu ong’eyo gimomiyo gipenje kamano. Mano en ywaruok ma a gisebedogo sama giluwo bang’e ka giduogo Kapernaum. Omiyo, openjogi niya: “Ang’o momiyo a ubedo gi mbaka matek ka un e ndara?” (Mariko 9:33) Wich-kuot makogi kendo giling’ thi nikech ne giyware e wi ng’at ma duong’ie moloyo e kindgi. Gikone, jootego dwaro ni Yesu omigie dwoko e wi wach mosebedo ka kelo ywaruok e kindgi. Gipenje niya: “En ng’ano ma kuom adier duong’ie moloyo e Pinyruodh polo?”—Mathayo 18:1.

En gima iwuoro ni kata bang’ bedo gi Yesu kuom higni ma dirom adek, jopuonjre pod bedo gi ywaruok ma kamano e kindgi. Kata kamano, en adier ni ok gin joma kare chuth nimar gin joricho. Bende, gipon e alwora ma ji jiwoe ahinya  wach bedo gi duong’ e wi jomamoko. E wi mano, nyocha eka Petro owinjo ka Yesu singone ni obiro miye “ofungu” mag Pinyruoth. Be dibed ni oparo ni oduong’ moloyo jowetene? Nyalo bedo ni Jakobo kod Johana bende paro ni giloyo jowetegi, nimar ne gineno gi wang’gi ka kit Yesu lokore e got.

Kata bed ni en wach mane ma miyo jopuonjrego bedo gi ywaruok, Yesu kawo okang’ mar rieyo pachgi. Oluongo nyathi moro matin, kendo ochunge e diergi kae to owacho ne jopuonjrene niya: “Ka ok ulokoru mubedo kaka nyithindo matindo, ok unudonj ngang’ e Pinyruodh polo. Kuom mano, ng’ato ang’ata ma bolore kaka nyathi matinni e ng’at maduong’ moloyo e Pinyruodh polo; to ng’ato ang’ata ma rwako nyathi matin kaka mae nikech nyinga, orwaka an bende.”​—Mathayo 18:3-5.

Donge mano en yo maber ahinya mar puonjo ji? Yesu ok bed gi mirima kod jopuonjrene kata jarogi ni gin mana joma laro duong’. Kar mano, otiyo gi ranyisi ma jopuonjrene nyalo neno kendo winjo tiende maber. Nyithindo matindo gin joma bolore kendo ok gilar duong’ moro amora e kindgi. Omiyo, kuom tiyo gi ranyisi mar nyathi matinno, Yesu nyiso ni jopuonjrene onego obed gi kido kaka mar nyithindo matindo e kindgi giwegi. Kae to Yesu wacho wechene mogik ne jolupne niya: “Ng’at ma duokore piny mogik e kindu uduto, ng’atno e ng’at maduong’.”​—Luka 9:48.