Pasure po kupinduka no kurapa mujaha ano dhimoni mu ndharaundha yo Sezareya yo Firipi, Jesu anoenda Kafarnaume. Anoita hwendo no vajiji vake basi, kuitira kuti mbungano itame kuzviziva. (Marco 9:30) Izvi zvinopa Jesu mukana wo kunasirira vajiji vake kuitira kufa kwake no basa ro vanozoita pa mukuvo unotevera. Iyena anodurujira kudari: “Mwana wo Mundhu anozopuwa mu nyara jo vandhu: Ivona vanozomuuraya, kaveta yena anozomuka mu njiku yocitatu.”—Mateu 17:22, 23.

Shwiro iyi asipi imbza ku vajiji. Pa mukuvo wakapera Jesu wakananga kuti anozourawa, asi Pedhru wakaramba kudaviri kuti zvinozoitikadi. (Mateu 16:21, 22) Zve vapostori vatatu vakavona kupinduka no kuzwa mabhuyo ngo pamusoro po “kubuda” ka Jesu. (Luka 9:31) Vateveri vake wari “vakacamwisisa” ngo zviri kunanga Jesu, pikija kuti avanasi kuzwisisa zvaanonanga. (Mateu 17:23) Asi vari kuthya kumubvunjisa ngo pamusoro pazvo.

Perepo vanoguma Kafarnaume, ku dhorobha rakabarihwa vapostori vazinji zve kunoshandihwa weya maningi ndi Jesu. Novaa kondhoyo, Pedhru anokhwederehwa ngo vandhu vanoshabisa mu themberi. Kangaije vacipsaka kupumbha Jesu kuti aashabi, vanobvunjisa kudari: “Mujijisi wenyu aaxabi [mukuruzado muviri jo themberi], kani?”—Mateu 17:24.

Pedhru anodavira kuti, “anoxaba.” Pedhru paanohwirira kanyi, Jesu anonga wazviziva kare. Ngokudaro, Pedhru acito ananga ciricese, Jesu anobvunjisa kudari: “Unorangarira kudini, Simoni? Majimambo o nyika anoxabisa ani no kuhengesa ani? Vana dangani vonyikanja?” Pedhru anodavira kuti, “vonyikanja.” Jesu anoenderera mberi aciti: “Ngokudaro vana vakaregerehwa.”—Mateu 17:25, 26.

Babake Jesu ndi Mambo wo mudenga no pasi zve Ndivona vanonamatwa mu themberi. Ngokudaro, mutemo autenderi kuti Mwana wa Mwari ashabe mu themberi. Jesu anoti: “Kaveta kuti ticavaxamaisa [kana kuvaitira cikhugu], endai ku jombe, khandirai civejo, hove yokuamba yo unozobata, funungurai marakaxa ayo, unozowana mondhomo mukuruzado umwe [estáter kana dhrakima]. Utorei, wozoupa ngo zina rangu no rako.”—Mateu 17:27.

Vajiji povanoungana, vanoda kubvunjisa Jesu kuti ndiani wavo anozova mukuru mu Umambo. Pa mukuvo waperari, vajiji ava vaithya kubvunjisa Jesu ngo pamusoro po kufa kwake kuri kuviyari, asi wari avaripi kuthya kumubvunjisa ngo pamusoro po kumbeji kwavo. Jesu anozviziva zvovari kurangarira. Ndizvonazve zvovaivereketesana sure kwake, povaiita hwendo kuhwirira mu Kafarnaume. Ngokudaro, Jesu anovabvunjisa kudari: “Maivereketesana cinyi mu gwanjemo?” (Marco 9:33) Vajiji vanonyararisa ngo kupseruka, ngokuti vaivereketesana ngo pamusoro pokuti ndiani ari mukuru. Pakupejisira, vapostori vanozoitira Jesu mubvunjo wovaibhuisana, wokuti: “Ndiani mukuru mu Umambo hwo mugore?”—Mateu 18:1.

Zvecivoneka kuti vajiji voda kuita makore matatu vacivona Jesu no kumupurukira, azvidaviriki kuti vangavereketesana ngo shwiro iyi. Asi, ivona avazivi kukwana. Zve vakakurira pakati po vandhu vanonamata vacireremeja maningi kuva no cigaro kana kuva vakakhwirira. Kusiyapo izvo, Pedhru wabva kuzwa Jesu acipikira kumupa “makhiya” o Umambo. Izvo zvingamuita  kuti ajizwe kuva mukuru pamberi po vamweni here? Jakobo na Johani vangajizwavo kudaro ngokuti vakavona kupinduka ka Jesu.

Azvinenyi kuti thangwe rakonda ngorapi, Jesu anoita zvirizvese kuti acinje murangariro javo. Anodanija mwana mudoko, womudira pakati pavo, wobvunja vajiji kudari: “Mukatama kutenderuka, mojiita inga vana vadoko, amuzonghwini mu Umambo hwo mugore. Ngokuti wiya anojidodokesa kudari inga cimwana ici, ndiyena anozova mukuru mu Umambo hwo mugore. Ndiani anoaxira mwana inga uu ngo ndava yo kundida, [anondiaxira].”—Mateu 18:3-5.

Majijisiro akanaka zvakadini! Jesu aavanyangajwiri no kuvabvunja kuti vano makaro kana vanoda maningi zvigaro. Kusiapo izvo, anoshandisa mufananijo unoshanda maningi. Vana vadoko avana cigaro kana nduma. Ngo kuita kudaro, Jesu anokhombija kuti vajiji vanodikana kusakurira mavonero aya pacavo. Perepo Jesu anopejisa ngo kubvunja vajiji vake kudari: “Mudoko pakati penyu, ndiyena mukuru wo vese.”—Luka 9:48.