Nimanle wooneya ncicimiho na mu omwene wa Yesu ni ompenuxa mmiravo aamakiwe ni nsololo o Kaisareya o Filipi, Yesu onnaya Kafarnau. Owo onnacimula moovitheya, pahiru ni amuhuserya awe “wi ahikhale ì asuwele.” (Marko 9:30) Ela ennamvaha ekari ya waarehererya amuhuserya awe ntakhara okhwa wawe ni muteko yoowo awo anahaalaaya weerakano. Owo onnathariha: “Mwana a mutxhu onanvelèliwa wa atxhu. Nave yawo anamwipha. Nto nihiku naneraru naya onanvinya mokhwani.”—Mateu 17:22, 23.

Masu ala tahi mavyaani wa amuhuserya awe, woona wi Yesu ooloca woosiilo wi onahaala wiiphiwa, naamwi Petro aakhoonce weemererya wi eyo enahaala weereya chiryene. (Mateu 16:21, 22) Nave oohuserya araru a Yesu ahoona ncicimiho nawe nave tho ahiiwa ovaanela sa “orowa wawe.” (Luka 9:31) Vano, amuhuserya awe annatepa “winiwa mirima” ni yeeyo Yesu onaloceiye, naamwi ehiiwexexaka phaama yootaphulela ya masu awe. (Mateu 17:23) Nlelo, awo annoova omukoha sincipale vooloca sa yeeyo.

Ohoolo waya, awo annaphiya o Kafarnau, elapo yeeyo Yesu aatempeiye olaleeryawo ni elapo ya amuhuserya ancipale a Yesu ayariwaayawo. Weiwo, alipa a musokho a empa ya Muluku annamwaacamela Petro. Akhweya echunaka omphwanyerya nthowa Yesu wi hanaliva musokho, awo annakoha: “[Muhusiha] anyu hanaperekha musokho [wa empa ya Muluku]?”—Mateu 17:24.

Petro onnaakhula: “À onnaperekha,” ekookelaka owaani, Yesu onnasuwela yeeyo yeeren’ye. Nyenya, ohiya onweherya Petro wi uupuxerye mwaha owo, Yesu onnakoha: “Onupuwelani, Simoni? Mamwene a elapo anakhela nani sovelèla ni musokho? Wa anaya nari wa amalapo?” Petro onnaakhula ariki: “Wa amalapo.” Nave voocharela Yesu onnaloca: “Vawihiha anamwane hanaperekha.”—Mateu 17:25, 26.

Yesu Atiithi awe Mwene a elapo yoothene, navetho ti yaawo analapeliwa mu empa ya Muluku. Mwawiihiiha, Mwaana a Muluku hanaphwanela olivela musokho wa empa ya Muluku. “Vano wi hiyo nihahuwelihe awo, hawe ophareya, omureye nantxolo. Ehopa yopatxerya eni emmirye, ophare ni ohule eyano aya. Onamphwanyamo ikhorowa, okuse ni ovelèle wa yowo saka ni sawà.”—Mateu 17:27.

Ohoolo waya amuhuserya annathukumana, nave awo aakhalano nikoho anachunaaya ompakela Yesu vooloca sa taani oni akhale mutokweenexa mu Omwene. Alopwana amohamoha yaala yaahoovelela omukoha Yesu vooloca sa okhwa wawe, vano awo hanoovelela omwaacamela Yesu ni omukoha sa omwaahiyu waya. Yesu onnasuwela yeeyo amuhuserya awe anuupuwelaaya. Ola waari mwaha mmohamoha yoowo awo yaaloncaaya ehanle oculi erwaaka o Kafarnau. Mwawiihiiha Yesu onnaakoha: “Ti seni etxhu mwalontxanyu nrwaka mwimphironi?” (Marko 9:33) Yuuliwaka muru annamaala, nthowa nawi awo yaavaanyihana vooloca sa taani aari mutokweenexa. Wookuchulani, amuhuserya annamukoha Yesu nikoho nenlo awo yaathokoronryaaya: “Tani ori mutokwenesa momweneni wa wirimu?”—Mateu 18:1.

Ti woovila weemererya wi, naamwi sivinre iyaakha raru amuhuserya emoonaka ni onwiriyana Yesu, nlelo awo annatitelela ovaanyihana mmwaha yoola. Nyenya, awo toohiphaameya.  Nave tho unnunwe mu sookhovelela sa ikerexa mwemmo muteko ni otokweene sinacicimihiwaaya vancipale. Ohiya yeeyoru, Petro oomwiiwa Yesu amuroromelihaka omvaha “isavi” sa Omwene. Apwanne owo oniisoona okhala mutokweenesa? Akhweya tho Yakopo ni Yohani aniisoona mmukhalelo mmohamoha, woona wi yaakhalano ekari ya omoona Yesu mu ncicimiho nawe.

Moohipwacha yeeyo yeeren’ye, Yesu onnookolola moonelo aya. Owo onnamwiichana mwaana wi eemele ohoolo waya, nave onnaloca wa amuhuserya awe: “Eparipari miyo kinnolèlani wi, mwahirukunusà mirima ni mwahikhala ntoko anamwane, himurwaru nvolowa momweneni wa wirimu. Vano yole oni iyevihe ntoko mwana ola, yowo t’ori mutokwenesa momweneni wa wirimu. Nave yowo oni amwakhele mwana si yola wa nthowa na nsina naka, onakàkhela miyo ene.”—Mateu 18:3-5.

Ola chiryene mukhalelo waphaama wa ohusiha! Yesu hananyeenyeya ni amuhuserya awe naari owiichana ntoko achu ahiniiwa naari a wiirumiha. Ohiya yeeyo, onnapharihela echu wi aahusihe. Anamwane hanakhalano nchuno na ocicimihiwa naari ovuwa ori woothene. Yesu onooniherya wi amuhuserya awe anaphwanela wunnuwiha moonelo yoowo mmurimani mwaya. Voocharela, Yesu onnakuchula nihusiheryo wa amuhuserya awe, alocaka: “Yole oni akhale mwamukhani mwa nyuwo, yola onamukhala mutokwene.”—Luka 9:48.