Konyima yetyi Sesusi apilululwa, netyi ahakula omukuendye ankho una otyilulu motyilongo tyo Sesaleia ya Filipe, aende ko Kafalanau. Aende vala novalongwa vae, avahamonwa novanthu opo ‘vahanoñgonoke apa ekahi.’ (Maluku 9:30) Otyo atyimuavela omphitilo yokupongiya ovalongwa vae mokonda yononkhia mbae, novilinga ankho mavalingi. Ahangununa okuti: “Omona womulume mapakulwa pomavoko onondyale mbae ambumuipaa, mahi monthiki ya tatu mapindulwa-po.” — Mateusi 17:22, 23.

Otyipuka otyo ankho hatyipe-ko kovalongwa mokonda vetyiivile-ale. Sesusi wapopile-ale okuti makaipawa, mahi Petulu ehetavela okuti otyo matyikamoneka. (Mateusi 16:21, 22) Iya ono apositolu vetatu vamuene etyi Sesusi apilululwa, tupu veivile etompho konthele ‘yokuenda’ kwa Sesusi. (Luka 9:31) Etyi Sesusi apopila ovalanduli vae “ankho tyeveihama unene,” namphila ankho vahanoñgonokele nawa onondaka mbae. (Mateusi 17:23) Mahi ankho vatila owoma okumupula vali konthele yotyo.

Avehiki ko Kafalanau, omphangu yakolela movilinga vya Sesusi, otyilongo tyovanyingi po no apositolu mbae. Ovalume vamwe ankho vatantha elilimu avafuene pu Petulu. Tyafuile ankho vahanda okuhunga Sesusi okuti kafete elilimu, avapulu okuti: “Omulongesi wenyi nae ufeta onodalakema onombali mbelilimu [mondyuo ya Huku]?” — Mateusi 17:24.

Petulu akumbulula okuti: “Enga.” Etyi akondoka mondyuo, Sesusi ankho wii-ale etyi tyaenda-po. Moluotyo, etyi Petulu nkhele ehenepopie natyike, Sesusi emupulu okuti: “Oityi ove usoka Simau? Onohamba mba pano pohi mbuita elilimu ku valie? Mbuita kovana vambo ine okovanthu ovakuavo?” Petulu ati: “Okovanthu ovakuavo.” Ngotyo, Sesusi ati: “Otyili, ovana vavo kavafete elilimu.” — Mateusi 17:25, 26.

Tate ya Sesusi, Una ovanthu vafenda mondyuo ya Huku, Ohamba youye auho. Ngotyo, Omona wa Huku kesukisile okufeta elilimu yondyuo ya Huku. Iya Sesusi ati: “Mahi, opo tuhevenumanese, enda melunga oyumbu ondyolo momaande, ombisi yo tete wamakuate, tyina wamaikula momulungu wayo, movasi-mo ombongo yotyivela yopalata [ituuka onodalakema ononkhuana]. Ombongo oyo keifetele ame no ove elilimu.” — Mateusi 17:27.

Konyima, ovalongwa ankho veliongiya, ankho vahanda okupula Sesusi okuti olie makala omunene vali Mouhamba. Ankho vatila owoma wokupula Sesusi konthele yononkhia mbae, mahi pahe avahakala nowoma wokumupula olie puvo makala omunene. Sesusi ankho wii etyi vekahi nokusoka. Ankho velipatanene-ale konthele yotyo pu etyi vekahi moungendi wokukondoka ko Kafalanau. Ngotyo, Sesusi evepulu okuti: “Oityi ankho mukahi nokuyayela etyi tukahi metapalo?” (Maluku 9:33) Ovalongwa avakala nohonyi, avahapopi natyike, mokonda velipatanene olie omunene vali pokati kavo. Pahe, ono apositolu avapulu Sesusi konthele yetyi ankho vayayela, avati: “Olie omunene vali Mouhamba wo keulu?” — Mateusi 18:1.

Ankho tyihuvisa okutala ovalongwa valinga epulo olio, ngwe ankho vakala-le omanima ehungi pu etatu nokutala Sesusi, nokumutehelela. Mahi, ankho ovakuankhali. Tupu vekulila monongeleya ankho muna otyituwa tyokulipaka-ko nokukala novilinga viomunkhima. Tupu, Petulu ankho weiva etyi Sesusi emulaa okumuavela “onosapi” Mbouhamba. Okuti otyo tyemuhindila okulitehelela okuti omunene vali? Tiaku na Suau tyafuile ankho vasoka okuti ovanene vali mokonda vamwene etyi Sesusi apilululwa.

Katutyii omokonda yatyi, mahi Sesusi evekuatesako opo vayeke-po otyituwa otyo. Waihana omona umwe omututu, emupake pokati kavo, apopila ovalongwa okuti: “Inkha kamupiluluka amukala ngovana ovatutu, kamamukanyingila Mouhamba wo keulu. Ngotyo, una uliola omutima ngomona ou omututu, oe omunene Mouhamba wo keulu; iya una utambula omona omututu ngo ou menyina liange, tupu ame ekahi nokutambula.” — Mateusi 18:3-5.

Onkhalelo oyo yokulongesa ongwa unene! Sesusi kanumanene novalongwa vae, tupu kevepopile okuti vena elungavi. Mahi waundapesa omona omututu opo evelongese. Ovana ovatutu vetupu otyituwa tyokulipaka-ko ine okuovola omunkhima. Sesusi walekesa okuti ovalongwa vae ankho vesukisa okukala notyituwa ngo tyovana ovatutu. Sesusi amanuhula okulongesa ovalongwa vae, ati: “Una ulipaka koututu pokati kenyi amuho, oe omunene.” — Luka 9:48.