Despues di e transfigurashon i despues di a saka demoño for di un mucha hòmber den e region di Sesarea di Filipo, Hesus a kue rumbo pa Kapernaum. Ta su disipelnan so tabata huntu kuné, pasobra e no tabata ke pa otro hende “haña sa” di su biahe. (Marko 9:30) Esaki lo a dun’é mas chèns di prepará su disipelnan pa su morto i pa e trabou ku nan lo mester a hasi despues. El a splika nan: “E Yu di hende mester keda entregá den man di su enemigunan, nan lo mat’é, anto riba e di tres dia lo e ser lantá for di morto.”—Mateo 17:22, 23.

E notisia akí no mester tabata algu nobo pa e disipelnan di Hesus pasobra, na un okashon anterior, Hesus a bisa nan ku hende lo a mat’é. Pero na e okashon ei, Pedro no kier a ker’é. (Mateo 16:21, 22) Ademas, tres di su apòstelnan a mira e transfigurashon i a tende e kòmbersashon tokante ‘Hesus su baimentu’ for di mundu. (Lukas 9:31) Tòg ora Hesus tabata papia atrobe tokante su morto, su siguidónan a bira “masha tristu” maske nan no a komprondé bon ki efekto su morto i resurekshon lo tabatin. (Mateo 17:23) Pero nan tabatin miedu di hasié pregunta tokante e asuntu.

Despues, nan a yega na Kapernaum, e sentro di Hesus su aktividatnan i e stat kaminda vários di e apòstelnan tabata biba. Einan, e hòmbernan ku tabata kobra belasting di tèmpel a aserká Pedro. Kisas nan intenshon tabata pa akusá Hesus ku e no ta paga belasting. Nan a puntra Pedro: “Boso maestro no ta paga e belasting di tèmpel [ku ta dos drakma]?”—Mateo 17:24.

Pedro a bisa nan: “Sí.” Ora Pedro a yega kas, Hesus tabata sa kaba kiko a sosodé. P’esei, promé ku Pedro por a bisa algu, Hesus a puntr’é: “Kiko bo ta pensa, Simon? Di ken e reinan di tera ta risibí vários belasting? Di nan yunan òf di otro hende?” Ora Pedro a kontestá “di otro hende,” Hesus a bis’é: “Bon mirá anto, e yunan ta liber di belasting.”—Mateo 17:25, 26.

Hesus su Tata ta e Rei di universo i Esun ku hende tabata adorá na tèmpel. P’esei, komo e Yu di Dios, Hesus no tabatin nodi di paga belasting. No opstante, el a bisa Pedro: “Pa nos no pone nan trompeká, bai laman, tira un anzue i kue e promé piská ku bini ariba. I ora bo habri su boka, lo bo haña un moneda di plata [un tetradrakma]. Kue e moneda ei, i duna nan pa mi i pa bo.”—Mateo 17:27.

Djis despues, ora e disipelnan tabata huntu, nan tabata ke puntra Hesus ken ta esun di mas grandi den e Reino. Figura bo, e mesun personanan ku djis un poko promé tabatin miedu di hasi Hesus pregunta tokante su morto awor sí no tabatin miedu di hasié pregunta tokante nan futuro. Pero Hesus tabata sa loke nan tabata pensa. Dikon? Pasobra tabata un tópiko ku nan a yega di diskutí tokante dje kaba ora nan tabata kana su tras bayendo Kapernaum. P’esei awor, el a puntra nan: “Kiko boso tabata diskutí na kaminda?” (Marko 9:33) E disipelnan a keda ketu, pasobra nan tabatin bèrgwensa ku nan tabata diskutí tokante ken tabata esun di mas grandi. Finalmente, e apòstelnan a disidí di hasi Hesus e pregunta ku nan tabata diskutí riba dje. Nan a puntr’é: “Ken realmente ta esun di mas grandi den e Reino di shelu?”—Mateo 18:1.

Por a parse inkreibel ku e disipelnan tabatin e diskushon ei despues di a opservá i tende Hesus pa kasi tres aña. Pero nan tabata hende imperfekto. Ademas, den e ambiente religioso ku  nan a lanta, hende tabata duna hopi importansia na puesto òf rango haltu. Es mas, Hesus a primintí Pedro ku lo el a dun’é e yabinan di Reino. Kisas esei lo a pone Pedro sinti ku e tabata esun di mas importante? Podisé Santiago i Huan tambe lo a kuminsá sinti nan importante debí ku nan tabatin e privilegio di mira e transfigurashon di Hesus.

Sea kual sea tabata e kaso, Hesus a dal paso pa korigí nan. El a yama un mucha bin para meimei di nan i el a bisa su disipelnan: “A ménos ku boso kambia i bira manera mucha chikitu, boso sigur lo no drenta e Reino di shelu. P’esei, ken ku humiá su mes manera e mucha akí ta esun di mas grandi den e Reino di shelu, i ken ku risibí un mucha manera esaki den mi nòmber ta risibí mi tambe.”—Mateo 18:3-5.

Ki un método maravioso di siña hende! Hesus no a rabia ku nan ni bisa ku nan tabata ambisioso. Mas bien, Hesus a usa un ehèmpel práktiko pa korigí nan. Mucha no sa pensa riba puesto haltu ni prominensia. Pues, Hesus tabata ke siña su disipelnan ku nan mester tabata humilde manera mucha. Pa konkluí su lès, Hesus a bisa su siguidónan: “Esun ku ta komportá su mes komo esun di mas chikitu meimei di boso tur, esei ta esun ku ta grandi.”—Lukas 9:48.