Na peko ti changengo ti tere ti Jésus, nga na peko ti so lo sava mbeni molenge so sioni yingo ayeke na yâ ti lo na kodro ti Césarée ti Philippe, Jésus amû lege ti Capernaüm. Lo ye ti hon gi lo na adisciple ti lo, tongaso si gbâ ti azo “ahinga tënë ni ape.” (Marc 9:30). Lo sara tongaso ti tene lo wara lege ti leke adisciple ti lo ti ku na kuâ ti lo, nga ndali ti kua so ala yeke sara ande. Lo tene: “A yeke kä Molenge ti zo na azo, na ala yeke fâ lo, me na ota lango ni, a yeke zingo lo na kuâ.”—Matthieu 17:22, 23.

Tënë so ayeke fini tënë na adisciple ni ape. Jésus asara tënë ti kuâ ti lo kozo na ala awe, me Pierre ake lani ti yeda na ni (Matthieu 16:21, 22). Abazengele ota abâ lani changengo ti tere ti Jésus nga ala mä tënë so a tene na ndo ti “hongo” ti lo (Luc 9:31). Fadeso, “vundu asara ala mingi” ndali ti tënë so Jésus atene so, atâa so ala mä yâ ni kue ape (Matthieu 17:23). Ye oko, ala sara mbeto ti kiri ti hunda lo na ndo ni.

Ala si fadeso na Capernaüm, ndo so Jésus ayeke sara ka mingi ti akusala ti lo dä nga kodro ti mingi ti abazengele ti lo la. Kâ, azo ti rongo nginza ti impôt aga na tere ti Pierre. Peut-être ala yeke gi ti bi tënë na li ti Jésus ti fa so lo yeke futa impôt ape, ala hunda lo atene: “Maître ti ala ayeke futa ti lo impôt ti drachme use ape?”—Matthieu 17:24.

Pierre atene: “Lo yeke futa ni.” Jésus angbâ kâ na yâ ti da ni, me lo hinga ye so asi so. Lo ku kungo ape ti tene Pierre la asigi na tënë ni, lo hunda Pierre: “Simon, mo tene ti mo nyen? Agbia ti sese ayeke hunda douane wala impôt na maboko ti azo wa? Na maboko ti amolenge ti ala wala na maboko ti ambeni zo nde?” Pierre atene: “Na maboko ti ambeni zo nde.” Jésus angbâ atene: “Tongaso, amolenge ni ayeke futa impôt ape.”—Matthieu 17:25, 26.

Babâ ti Jésus ayeke Gbia ti dunia kue, lo la lo yeke Nzapa so azo ayeke voro lo na yâ ti temple ni so. Tongaso, Molenge ti Nzapa ayeke na droit pëpe ti futa impôt ti temple. Me Jésus atene: “Ti tene e bi tënë na sese ape, gue na kota ngu, mo bi yango. Kozo susu so mo gbu lo, zi yanga ti lo, na mo yeke wara lê ti nginza ti argent oko [stater wala drachme]. Mû ni, mo gue mo futa na impôt ni na li ti mbi na mo.”—Matthieu 17:27.

Kete na pekoni, adisciple ni kue awara tere place oko, na ala yeke na mbeni hundango ndo ti hunda ni na Jésus. Ala ye ti hinga zo wa la ayeke ga kota mingi na popo ti ala kue na yâ ti Royaume. Me, gi oko ala so, ade ti ninga ape, ala yeke na mbeto lani ti hunda Jésus na ndo ti tënë ti kuâ so ayeke ku lo, me fadeso ala sara mbeto ape ti hunda tënë na lo na ndo ti aye so ayeke ku ala. Jésus ahinga pensé ti ala. A yeke mbeni ye so ala papa na ndo ni awe, na ngoi so ala yeke lani na peko ti lo tongana ala yeke na lege ti kiringo ni na Capernaüm. Tongaso, Jésus ahunda ala atene: “Tënë ti nyen la si ala yeke papa fade ngbanga ni na lege so?” (Marc 9:33). Adisciple ni angbâ aduti kpô, kamene asara ala ngbanga ti so ala yeke papa na popo ti ala ti hinga wala zo wa la ayeke kota ahon amba ti lo. Na pekoni, abazengele ni angbâ afa na Jésus hundango ndo so asara si papa ti ala ni alondo. Ala tene: “Zo wa la ayeke kota mingi na yâ ti Royaume ti yayu?”—Matthieu 18:1.

Na bango ni, adisciple apeut ti tene fade mara ti tënë ni so ape, na peko ti so ala mä Jésus nga ala bâ aye so lo sara, teti ngu ota tongaso. Me ala kue ayeke na siokpari na tere ti ala, nga ala kono na milieu ti azo ti vorongo Nzapa so afa so ti duti na kota ndo la ayeke bien. Na mbage, ade ti ninga ape, Jésus atene na Pierre so lo yeke mû ande na lo “aclé” ti Royaume. Eskê ye so apusu peut-être Pierre ti bâ tere ti lo kota? Jacques na Jean kue apeut ti bâ tere ti ala tongaso, ndali ti so ala bâ na lê ti ala changengo ti tere ti Jésus.

Atâa ye ni ayeke tongana nyen lani, Jésus asara mbeni ye ti changé bango ndo ti ala. Lo iri mbeni kete molenge, lo ga na lo na milieu ti ala na lo tene na ala, lo tene: “Tongana ala changé lege ti ala ape na ala ga tongana akete molenge ape, ala yeke lï na yâ ti Royaume ti yayu oko pëpe. Ni la, zo so ayeke sara ande tere ti lo kete tongana kete molenge so, lo la lo yeke kota mingi na yâ ti Royaume ti yayu. Nga, zo so ayamba mbeni kete molenge tongana lo so ndali ti iri ti mbi, lo yamba mbi nga.”—Matthieu 18:3-5.

So pendere kode ti fango ye! Jésus asara ngonzo na tere ti adisciple ti lo ape wala lo tene ape so ala yeke azo so asara bê ti ye mingi. Nde na so, lo sara kua na mbeni tapande. Amolenge ayeke azo so ayeke nga na kota ndo ape. Tongaso, Jésus aye ti fa na adisciple ti lo so alingbi ala bâ nga tere ti ala tongaso. Na pekoni, Jésus afa na adisciple ti lo ye so a lingbi ala manda dä. Lo tene: “Zo so ayamba kete molenge so ndali ti iri ti mbi, lo yamba mbi nga. Nga, zo so ayamba mbi, lo yamba nga lo so atokua mbi. Zo so asara tere ti lo kete na popo ti ala kue, lo la lo yeke kota.”—Luc 9:48.