Katapos han pagbag-o han hitsura ni Jesus ngan ha pagtambal ha bata nga ginsaniban hin demonyo didto ha rehiyon han Cesarea Filipos, kumadto hi Jesus ha Capernaum. An iya la mga disipulo an iya upod ha pagbiyahe basi an mga tawo diri “mahibaro hito.” (Marcos 9:30) Naghatag ini ha iya hin dugang nga higayon basi maiandam an iya mga disipulo ha iya kamatayon ngan ha buruhaton nga ira hihimoon. Hiya nagsiring: “An Anak han tawo sigurado nga itutubyan ha iya mga kaaway ngan ira papatayon hiya, pero babanhawon ha ikatulo ka adlaw.”—Mateo 17:22, 23.

An mga disipulo maaram na unta mahitungod hini nga ginsiring ni Jesus. Diri pa la maiha, nag-istorya hi Jesus nga papatayon hiya, pero waray tumoo hito hi Pedro. (Mateo 16:21, 22) Nakita han tulo nga apostol an pagbag-o han hitsura ni Jesus ngan hinbatian nira an paghisgot mahitungod han iya “pagbaya.” (Lucas 9:31) Hini nga takna, an mga sumurunod ni Jesus “nasubo gud” ha iya ginsiring, bisan kon waray nira ito masabti hin bug-os. (Mateo 17:23) Pero nahadlok hira nga magpakiana pa mahitungod hito.

Ha urhi, inabot hira ha Capernaum, an sentro han buruhaton ni Jesus ngan an lugar han iba nga apostol. Didto, an mga tawo nga nangungolekta hin buhis para ha templo dumaop kan Pedro. Posible nga basi maakusaran hi Jesus ha diri pagbayad hin buhis, nagpakiana hira: “Nagbabayad ba hin duha ka drakma nga buhis [para ha templo] an iyo magturutdo?”—Mateo 17:24.

Hi Pedro bumaton: “Oo.” Maaram na hi Jesus han nahitabo. Ngan didto ha balay, imbes nga hulaton hi Pedro nga mag-istorya, hi Jesus nagpakiana: “Ha imo paghunahuna Simon, tikang kan kanay nakarawat hin magkalain-lain nga buhis an mga hadi ha tuna? Tikang ha ira mga anak o ha mga estranghero?” Hi Pedro binaton: “Tikang ha mga estranghero.” Katapos hi Jesus nagsiring: “Kon sugad, an mga anak libre gud ha buhis.”—Mateo 17:25, 26.

An Amay ni Jesus amo an Hadi ha uniberso ngan an Usa nga ginsisingba ha templo. Salit an Anak han Dios diri maoobligar han balaud nga magbayad hin buhis ha templo. Hi Jesus nagsiring: “Pero basi diri hira masina, kadto ha dagat ngan pangawil. Ha baba han siyahan nga isda nga imo makakawil makakaagi ka hin usa nga sinselyo [silber nga sinselyo, o upat ka drakma]. Kuhaa ito ngan ihatag ha ira sugad nga buhis naton nga duha.”—Mateo 17:27.

Waray pag-iha, an mga disipulo nagtirirok ngan karuyag nira ipakiana kan Jesus kon hin-o an magkakaada gidadakui nga awtoridad ha Ginhadian. Ha naglabay, ini nga kalalakin-an nahadlok magpakiana kan Jesus mahitungod han iya tiarabot nga kamatayon, pero yana waray hira mahadlok panginsayod ha iya mahitungod han ira tidaraon. Maaram hi Jesus han ira ginhuhunahuna. Mahitungod ito han ira gindidiskusyonan han nagsinunod hira ha iya tipabalik ha Capernaum. Salit nagpakiana hiya: “Ano an iyo gindidiskusyonan ha dalan?” (Marcos 9:33) Naalohan an mga disipulo, salit waray na hira magyakan kay nagdiniskusyon hira kon hin-o an mas labaw ha ira. Ha kataposan, iginpakiana han mga apostol kan Jesus an ira gindidiniskusyonan: “Hin-o gud an may gidadakui nga awtoridad ha Ginhadian han langit?”—Mateo 18:1.

Baga hin diri katoohan nga an mga disipulo magkakaada hin sugad nga argumento katapos han haros tulo ka tuig nga pag-inobserbar ngan pagpinamati kan Jesus. Pero diri hira mga hingpit. Ngan nagtubo hira ha relihiyon diin ginpapabug-atan an posisyon ngan katungdanan. Dugang pa, diri pa la maiha nga nagsaad hi Jesus kan Pedro nga ihahatag ha iya an “mga yawi” han Ginhadian. Posible ba nga inabat ni Pedro nga labaw hiya? Bangin ito liwat an inabat nira Santiago ngan Juan kay nakita nira an pagbag-o han hitsura ni Jesus.

Anoman an ira inabat, ginios hi Jesus basi tadungon an ira disposisyon. Iya gintawag an usa nga bata, ginpatindog ha ira butnga, ngan ginsidngan an mga disipulo: “Diri kamo makakasulod ha Ginhadian han langit kon diri kamo magbag-o ngan magin pariho han kabataan. Salit an bisan hin-o nga magpaubos pariho hini nga bata amo an may gidadakui nga awtoridad ha Ginhadian han langit. Ngan an bisan hin-o nga nakarawat ha usa nga bata nga pariho hini tungod ha akon ngaran, nakarawat liwat ha akon.”—Mateo 18:3-5.

Maopay gud ito nga paagi ha pagtutdo! Hi Jesus waray masina ha iya mga disipulo ngan waray niya hira tawaga nga hakog o ambisyoso. Lugod, naggamit hiya hin ilustrasyon. An kabataan diri gud naghuhunahuna nga labaw o kilala hira. Salit iginpakita ni Jesus nga kinahanglan kultibaron han iya mga disipulo ito nga disposisyon. Kahuman, gintapos ni Jesus an leksyon mahitungod ha pagpaubos, ha pagsiring: “An nagawi sugad nga ubos ha iyo ngatanan amo an may daku nga awtoridad.”—Lucas 9:48.