Ka tsʼoʼok le transfiguración yéetel u tsʼaʼakal le xiʼipal endemoniado tumen Jesús tu luʼumil Cesarea tiʼ Filipooʼ, suunaj Capernaum chéen yéetel u disipuloʼob. Letiʼeʼ maʼ u kʼáat «ka ojéeltaʼak tumen mix máakiʼ» (Marcos 9:30). Lelaʼ tu tsʼáaj tuʼux u maas tsolik tiʼ u disipuloʼob bix kun kíimsbil yéetel baʼax meyajil unaj u beetkoʼob. Tu yaʼalaj: «U Paal máakeʼ aʼalaʼan yaan u kʼuʼubul tu kʼab le máaxoʼob pʼekmiloʼ yéetel yaan u kíimsaʼal; tu yóoxpʼéel kʼiin túuneʼ yaan u líiʼsaʼal» (Mateo 17:22, 23).

Lelaʼ maʼ unaj u beetik u jaʼakʼal u yóol le disipuloʼoboʼ, tumen maʼ yáax u yaʼaliktiʼobiʼ. Jesuseʼ tsʼoʼok u yáax aʼaliktiʼob, baʼaleʼ Pedroeʼ maʼ tu creertiʼ (Mateo 16:21, 22). Tsʼoʼoleʼ óoxtúul apostoloʼobeʼ tu yiloʼob le transfiguracionoʼ yéetel tu yuʼuboʼob u tʼaanoʼob tiʼ «u lukʼul way yóokʼol kaabeʼ» (Lucas 9:31). U disipuloʼobeʼ «jach okʼomchaj u yóoloʼob» tu kaʼatéen, kex maʼ tu jach naʼatoʼob le baʼaxoʼob tu yaʼaloʼ (Mateo 17:23). Baʼaleʼ letiʼobeʼ saajkoʼob u kʼáatoʼob u maasil yoʼolal lelaʼ.

Teʼ súutuk jeʼeloʼ kʼuchoʼob Capernaum, le tuʼux maas yaʼab meyaj tu beetaj Jesusoʼ. Lelaʼ u kaajal u maas yaʼabil tiʼ le apostoloʼoboʼ. Teʼeloʼ baʼpachtaʼab Pedro tumen le máaxoʼob cobrartik u impuestoil le templooʼ. Maʼ xaaneʼ táan u yaʼalikoʼob Jesuseʼ maʼatech u boʼotik u impuestoil le templooʼ, letiʼobeʼ tu yaʼaloʼob: «A j-kaʼansajeʼexeʼ, ¿ku boʼotik wa u impuestoil le kaʼapʼéel dracmaʼoboʼ?» (Mateo 17:24).

Pedroeʼ tu núukaj: «Ku boʼotik». Kex tiaʼan Jesús tu paach le najoʼ u yojel le baʼax úuchoʼ. Le oʼolal táanil tiʼ u tʼaan Pedroeʼ tu kʼáatajtiʼ: «¿Bix a wilik, Simón? ¿Máaxoʼob unaj u boʼotkoʼob le nojoch impuesto yéetel le uláakʼ impuestoʼob tiʼ u reyiloʼob le yóokʼol kaabaʼ? ¿U paalaloʼob, wa yaanal máakoʼob?». Pedroeʼ tu yaʼaleʼ «yaanal máakoʼob». Jesús túuneʼ tu yaʼalaj: «Jeʼeloʼ, u paalaloʼob túuneʼ maʼ unaj u boʼotkoʼob impuestoiʼ» (Mateo 17:25, 26).

U Taata Jesuseʼ letiʼ u Reyil tuláakal baʼal yéetel letiʼ ku adorartaʼal teʼ templooʼ. Le oʼolal u Hijoeʼ maʼ unaj u boʼotik u impuestoil le templooʼ. Jesuseʼ tu yaʼalaj: «Baʼaleʼ utiaʼal maʼ k-beetik u tsʼíikiloʼobeʼ, xeen teʼ kʼáaʼnáaboʼ ka a pul junpʼéel anzueloiʼ, chʼaʼ le yáax kay ken a chukoʼ, ken a jap u chiʼeʼ yaan a wilik junpʼéel u taakʼinil plataiʼ, ka chʼaʼikeʼ ka bisiktiʼob tin woʼolal yéetel ta woʼolal» (Mateo 17:27).

Maʼ sáameʼ láaj kʼuch le disipuloʼoboʼ ka tu kʼáatoʼob tiʼ Jesús máax u maas nojchil teʼ Reinooʼ. Maʼ úucheʼ saajkoʼob kaʼach u kʼáatoʼob tiʼ Jesús u maasil ka tu yaʼalaj yaan u kíimil, baʼaleʼ beoraaʼ maʼ sajakchajoʼob u kʼáatoʼob máax kun antal naatsʼ tiʼiʼ. Jesuseʼ u yojel baʼax ku tuklikoʼob. Letiʼe baʼax ku taal u baʼateltʼantikoʼob le táan u suutoʼob Capernaumoʼ. Ka tu yaʼalajtiʼob: «¿Baʼax ka baʼateltʼantikeʼex kaʼach teʼ bejoʼ?» (Marcos 9:33). Letiʼobeʼ suʼlakchajoʼob, maʼ tu yaʼaloʼob mix baʼaliʼ, tumen táan u baʼateltʼantikoʼob máax u maas nojchil ichiloʼob. Ka tsʼoʼokeʼ tu kʼáatoʼob tiʼ Jesús: «¿Máax jach tu jaajil u maas nojchil tu Reinoil kaʼan?» (Mateo 18:1).

Maʼ tu creertaʼal bix u tuukuloʼob, tumen tsʼoʼok óoliʼ óoxpʼéel jaʼab káajak u yilkoʼob baʼaxoʼob ku beetik yéetel ku kaʼansik Jesús. Baʼaleʼ letiʼobeʼ j-kʼebanoʼob. Letiʼobeʼ suukaʼan u yilkoʼob bix u tsʼíiboltaʼal nukuch puestoʼob tumen u nuuktakiloʼob le judíoʼoboʼ. Tsʼoʼoleʼ Pedroeʼ  tsʼoʼok u yaʼalaʼaltiʼ yaan u tsʼaʼabaltiʼ u llaveiloʼob le Reinooʼ. Maʼ xaaneʼ le oʼolal ku yuʼubikuba nojchil ichiloʼob. Santiago yéetel Juaneʼ bey xan u tuukuloʼoboʼ, tumen letiʼobeʼ tu yiloʼob xan le transfiguracionoʼ.

Jeʼel bixakeʼ, Jesuseʼ tu yáantoʼob u kʼex bix u tuukuloʼob. Tu tʼanaj juntúul chan paaleʼ ka tu waʼakuntaj chúumuk tiʼobeʼ ka tu yaʼalajtiʼob: «Wa maʼ ta kʼexik a tuukuleʼex ka a beetabaʼex jeʼex mejen paalaleʼ, junpuliʼ maʼ kan ookleʼex tu Reinoil kaʼan. Le oʼolaleʼ, jeʼel máaxak ka u kabalkúunt u yóol jeʼex le chan xiʼipalaʼ, letiʼ u maas nojchil tu Reinoil kaʼan, yéetel jeʼel máaxak ka u kʼam tin kʼaabaʼ juntúul chan xiʼipal jeʼex lelaʼ, tak teen ku kʼamken» (Mateo 18:3-5).

¿Máasaʼ jach jatsʼuts bix úuchik u kaʼanskoʼob? Jesuseʼ maʼ kʼuuxilnaj yéetel u disipuloʼobiʼ mix tu yaʼalaj wa táan u tsʼíiboltkoʼob baʼaloʼob nuuktakiʼ. Baʼaxeʼ tu kaʼansoʼob yéetel yaabilaj. Le mejen paalaloʼoboʼ maʼatech u tsʼíiboltkoʼob u beetik u nojchiloʼob. Le oʼolal Jesuseʼ tu yeʼesaj u kʼaʼabéetil u tuukuloʼob xan beyoʼ. Tu yaʼalajtiʼob: «Le máax ku beetkuba jeʼex juntúul tiʼ le mejentakoʼob ichileʼexoʼ letiʼ u nojchil» (Lucas 9:48).