Yesu tsɔɔ e se nyɛɛli ɔmɛ kaa e sa nɛ a ba a he si. E sa nɛ a ba a he si kaa jokuɛwi, nɛ a kó wo a he nɔ. E sa nɛ kaseli ɔmɛ nɛ a ‘he jokuɛ ɔmɛ ngɛ Yesu biɛ mi kɛ tsɔɔ kaa a he lɛ hulɔ.’​​—Mateo 18:5.

Be bɔɔ nɛ be ɔ, kaseli ɔmɛ sã nya ngɛ a ti nɔ nɛ ji nɔmlɔ ngua pe kulaa a he, lɔ ɔ eko ɔ, a ma susu kaa Yesu ngɛ a hɛ mi kãe. Bɔfo Yohane bɔ nɔ́ kpa ko nɛ ya nɔ ngɛ jamɛ a ligbi ɔ mi ɔ he amaniɛ. E de ke: “Wa na nyumu ko nɛ ngɔ o biɛ kɛ ngɛ mumi yayami hiae, nɛ wa de lɛ ke e kpa, ejakaa pi e kɛ wɔ nɛ ngɛ nyɛɛe.”​​—Luka 9:49.

Anɛ Yohane susu kaa kaseli ɔmɛ pɛ nɛ a ngɛ he blɔ kaa a tsaa nihi loo a hia mumi yayamihi lo? Ke jã a, lɛɛ kɛ e ba lɛ kɛɛ nɛ nyumu ɔ nyɛ nɛ e hia mumi yayami ɔ? Yohane susu kaa e sɛ nɛ nyumu ɔ nɛ pee nyakpɛ nɔ́ ko ejakaa pi Yesu se nyɛɛlɔ ji lɛ, nɛ e piɛɛ we bɔfo ɔmɛ a he hulɔ.

Se e pee Yohane nyakpɛ kaa Yesu de ke: “Nyɛ ko tsi lɛ blɔ, ejakaa nɔ ko be nyɛe nɛ e kɛ ye biɛ ma tsu nyakpɛ ní nɛ amlɔ nɔuu ɔ e maa tu ye he munyu yayami. Nɔ nɛ ti si wui wɔ ɔ, e piɛɛ wa he. I ngɛ nyɛ dee ke, nɔ tsuaa nɔ nɛ ma ha nyɛ nyu nɛ nyɛ maa nu ngɛ imi Kristo ɔ ye he ɔ, hiɔwo kpakpa be lɛ bɔe.”​​—Marko 9:39-41.

E he hia we nɛ nyumu ɔ nɛ nyɛɛ Yesu se loko a ma de ke e piɛɛ Yesu he. Ejakaa jamɛ a be ɔ mi ɔ, a to we Kristofohi asafo ɔ sisi lolo. Enɛ ɔ he ɔ, a se nɛ nyumu ɔ nyɛɛ we ɔ tsɔɔ we kaa e te si kɛ wo mɛ, loo e ngɔ Yesu biɛ kɛ ya ngɛ lakpa jami mi níhi pee. E ngɛ heii kaa nyumu ɔ he Yesu ye, nɛ nɔ́ nɛ Yesu de ɔ tsɔɔ kaa a maa jɔɔ lɛ.

Se ke nɔ́ nɛ Yesu kaseli ɔmɛ a de loo a pee ɔ ha nɛ nyumu ɔ nane tɔtɔ ɔ, lɛɛ a tɔ̃. Yesu de ke: “Nɔ tsuaa nɔ nɛ ma ha jokuɛ tsɔwi nɛ ɔmɛ a ti nɔ kake maa pee yayami ɔ, afani nɛ a kɛ teji wɛ muɔ e kuɛ, nɛ a ya sake lɛ fɔ wo mi.” (Marko 9:42) Lɔ ɔ se ɔ, Yesu de kaa ke e se nyɛɛli ɔmɛ a nane loo a nine loo a hɛngmɛ ma ha nɛ a nane nɛ tɔtɔ ɔ, a sake kɛ fɔ he. E hi kaa a ma sake níhi nɛ a bua jɔ he ɔ kɛ fɔ he, konɛ a sɛ Mawu Matsɛ Yemi ɔ mi mohu pe nɛ jamɛ a ní ɔmɛ maa hi a he nɛ a ma sake mɛ kɛ fɔ Gehena (Hinom Dɔgba a mi). Eko ɔ, Yesu kaseli ɔmɛ naa nɛ a sãa dwɔmi ngɛ dɔgba nɛ ɔ mi ngɛ Yerusalem kasa nya. Enɛ ɔ he ɔ, kaseli ɔmɛ nu Gehena sisi kaa e daa si ha neneene hɛ mi kpatami.

Yesu bɔ mɛ kɔkɔ hu ke: “Nyɛɛ hyɛ saminya nɛ nyɛ ko hie bimɛ tsɔwi nɛ ɔmɛ a ti nɔ ko. I ngɛ nyɛ dee ke, a bɔfohi nɛ ngɛ hiɔwe ɔ daa si ngɛ Tsaatsɛ nɛ ngɛ hiɔwe ɔ hɛ mi daa.” Kɛ “bimɛ tsɔwi” nɛ ɔmɛ a he jua wa ha e Tsɛ ɔ kɛɛ? Yesu ngɔ bɔ nɛ bimɛ tsɔwi a he jua wa kɛ ha e Tsɛ ɔ kɛ to nyumu ko nɛ e ngɛ to 100 nɛ kake laa a he. Nyumu ɔ je to 99 ɔmɛ a he nɛ e ho nɛ  e ya hla kake ɔ. Benɛ e na to nɛ laa a, e ná lɔ ɔ he bua jɔmi kulaa pe to 99 ɔmɛ nɛ a laa we ɔ. Yesu tsa nɔ ke: “Nyɛ Tsɛ nɛ ngɛ hiɔwe ɔ sume kaa bimɛ tsɔwi nɛ ɔmɛ a kpɛti nɔ kake nɛ laa.”​​—Mateo 18:10, 14.

Eko ɔ, Yesu ngɛ hlae nɛ e ye bua kaseli ɔmɛ konɛ a ko pɛ ngɛ nɔ nɛ maa pee nɔmlɔ ngua ngɛ a kpɛti ɔ he, enɛ ɔ he ɔ, e de mɛ ke: ‘Nyɛ ha nɛ ngo nɛ hi nyɛ mi, konɛ nyɛɛ kɛ nyɛmimɛ nɛ hi si ngɛ he jɔmi mi.’ (Marko 9:50) Ngo haa nɛ niye ní ngɔɔ. Ke nɔ ko wo e munyu he ngo ɔ, e ngɔɔ ngɛ nihi a tue mi nɛ e haa nɛ tue mi jɔmi baa, se atsinyɛ jemi kɛ tue mi jɔmi bɛ.​​—Kolose Bi 4:6.

Nyagba komɛ ma nyɛ maa ba, se Yesu tsɔɔ bɔ nɛ e sa nɛ wa tsu a he ní ha. E de ke: “Ke o nyɛmi pee mo yayami ɔ, yaa nɛ o ya tsɔɔ lɛ e tɔmi ɔ, o kɛ lɛ ni enyɔ kɛkɛ. Ke e bu mo tue ɔ kɛkɛ nyɛmi pee nyɛmi.” Se ke e bui mo tue hu nɛɛ? Yesu tsa nɔ ke: “Ngɔɔ nɔ kake, loo ni enyɔ ngɔ piɛɛ o he. Kɛkɛ ɔ, ni enyɔ, loo ni etɛ ɔmɛ maa pee odase yeli kɛ ma munyu ɔ nɔ mi.” Ke lɔ ɔ hu yi manye ɔ, nyɛ ya sɛɛ ha “asafo ɔ,” nɛ ji asafo mi nikɔtɔmahi nɛ a ma nyɛ ma tsu sane ɔ he ní ɔ. Nɛ ke loloolo ɔ, yayami peelɔ ɔ bui tue hu nɛɛ? Yesu tsɔɔ kaa e sa nɛ a ‘bu lɛ kaa wɔ jalɔ, loo tó tsulɔ.’ Yuda bi kɛ nihi kaa jã bɔɛ.​​—Mateo 18:15-17.

E sa nɛ asafo mi nikɔtɔmahi nɛ a ngɔ Baiblo ɔ kɛ tsu ní. Ke nyɛmi ko tɔ̃ tɔmi nɛ hɛdɔ ngɛ he, nɛ asafo mi nikɔtɔma amɛ ye e sane ɔ, bɔ tsuaa bɔ nɛ a maa mwɔ sane ɔ nya ha ngɛ zugba nɛ ɔ nɔ ɔ, jã nɛ ‘a mwɔ nya ngɛ hiɔwe.’ Yesu ngɔ blɔ tsɔɔmi nɛ ɔ kɛ ha konɛ ke a to Kristofohi asafo ɔ sisi ɔ, e ye bua mɛ. Ke nikɔtɔma amɛ kpe ngɛ sanehi nɛ hɛdɔ ngɛ a he kikɛ nɛ ɔ he ɔ, Yesu ngɛ tsɔɔe kaa e ngɛ a kpɛti. E de ke: “He nɛ ni enyɔ loo ni etɛ bua a he nya ngɛ ngɛ ye biɛ mi ɔ, i ngɛ a kpɛti ngɛ lejɛ ɔ.”​​—Mateo 18:18-20.