Zezi i fek servi en legzanp pour montre son bann disip sa latitid ki zot devret annan. Zot devret konsider zot lekor konman bann zanfan, setadir zot devret annan limilite e pa met tro gran lenportans lo pozisyon. Si bann disip i ‘resevwar en zanfan parey sa enn akoz Zezi se konmsi i resevwar Zezi osi.’​—Matye 18:5.

Pa tro lontan pase, bann zapot ti pe dispit lo lekel ki pli gran, alor i kapab ki zot konsider sa ki Zezi in fek dir konman en reprimann. Aprezan, zapot Zan i koz lo en keksoz ki fek arive: “Nou ti vwar en dimoun pe sas demon par servi ou non, nou ti esey anpes li akoz i pa ansanm avek nou.”​—Lik 9:49.

Eski Zan i krwar ki zis bann zapot ki ganny drwa geri lezot oubyen sas demon? Si sa i leka, ki mannyer sa zonm Zwif in reisi sas sa bann demon? I paret ki Zan i krwar ki sa zonm pa devret pe fer sa bann mirak akoz i pa pe akonpanny Zezi ek bann zapot.

Me Zan i sirprann ler Zezi i dir: “Pa bezwen anpes li, parski napa personn ki pou fer mirak par servi mon non e deswit apre pou kapab koz an mal lo mwan. Parski sa ki pa kont nou i avek nou. En dimoun ki donn ou en ver delo akoz ou en disip Kris, vreman mon dir zot, i pou sirman ganny son rekonpans.”​—Mark 9:39-41.

Sa letan, i pa ti neseser ki sa zonm i akonpanny Kris pour montre ki i lo kote Zezi. Kongregasyon Kretyen pa ti ankor ganny formen, alor lefet ki sa zonm pa pe vwayaz avek Zezi pa vedir ki i opoz li oubyen ki i pe promot en fo larelizyon. I evidan ki sa zonm i annan lafwa dan non Zezi e sa ki Zezi i dir i montre ki sa zonm pou ganny son rekonpans.

De lot kote, i ti pou grav si sa zonm ti fer pese akoz parol ek aksyon bann zapot. Zezi i dir: “Sa ki fer en dimoun ki annan lafwa dan mwan e ki parey en zanfan fer pese, plito en ros moulen i ganny anmare dan son likou e i ganny zete dan lanmer.” (Mark 9:42) Apre, Zezi i dir ki son bann disip i devret pare pour sakrifye menm en keksoz ki presye parey en lanmen, lipye oubyen lizye si sa ti pou fer en dimoun fer pese. I pli byen ki nou viv san en keksoz ki annan bokou valer pour nou e antre dan Rwayonm Bondye plito ki gard sa keksoz e ganny zete dan Zeenn (Vale Inonm). I tre probab ki bann zapot in vwar Vale Inonm ki pros avek Zerizalenm kot bann salte i ganny brile, alor zot kapab konpran ki sa pe reprezant destriksyon permanan.

Zezi i osi averti: “Fer atansyon ki zot pa mepriz enn sa bann dimoun ki parey en zanfan, parski mon dir zot ki zot lanz dan lesyel i toultan devan mon Papa.” Ki mannyer Papa i konsider ‘sa bann dimoun ki parey zanfan’? Pour  montre ki kantite valer zot annan, Zezi i servi legzanp en zonm ki annan 100 mouton me ki perdi enn. Sa zonm i kit sa 99 pour rod sa enn ki’n perdi e ler i vwar li i annan plis lazwa pour sa enn ki pour sa 99. Zezi i osi dir: “Mon Papa dan lesyel pa anvi ki ni enn sa bann dimoun ki parey en zanfan i perdi.”​—Matye 18:10, 14.

Petet Zezi pe mazin ler son bann zapot ti pe dispit lo lekel ki pli gran, ler i donn zot sa lankourazman: “Met disel dan zot lavi e reste anpe avek kanmarad.” (Mark 9:50) Disel i fer manze pli goute. Alor, met disel dan sa ki nou dir i vedir koz dan en fason ki fer li fasil pour lezot aksepte e sa i kapab ede gard lape olye argimante.​—Kolosyen 4:6.

Par ler, nou kapab ganny bann gro problenm e Zezi i dir ki mannyer nou kapab regle zot. I dir: “Si ou frer i komet en pese, al kot li tousel e montre li son fot. Si i ekout ou, ou’n ed ou frer pour fer sa ki byen.” Me si i pa ekoute? Zezi i dir: “Anmenn avek ou enn oubyen de lezot dimoun, pour konnen si en keksoz i vre oubyen fo, i bezwen annan de oubyen trwa temwen.” Si malgre sa, zot pa kapab rezourd sa problenm, zot devret koz avek “kongregasyon,” setadir, avek bann ansyen ki kapab pran en desizyon. Ki arive si kantmenm sa, sa dimoun pa ekoute? “Konsider li konman en dimoun lezot nasyon ek en kolekter taks,” bann dimoun ki bann Zwif pa devret asosye avek.​—Matye 18:15-17.

Bann sirveyan dan kongregasyon i bezwen swiv bann lenstriksyon ki dan Parol Bondye. Si en dimoun in fer en pese e i bezwen ganny disiplinen, zot zizman “pou’n fini ganny anmare dan lesyel.” Me ler en dimoun i inosan, i pou’n “ganny delarge dan lesyel.” Sa bann lenstriksyon pou itil ler kongregasyon Kretyen i ganny formen. Dan bann ka koumsa, Zezi i dir: “Kot i annan de oubyen trwa ki’n rasanble ansanm an mon non, mon pou avek zot.”​—Matye 18:18-20.