Iesu a ase xome la nekönatr nyine amamane la aqane tro la itretre drei nyidrëti a ujë. Öni nyidrë, loi e tro angatr a ‘kapa la nekönatr ka tui nyën pine la ëje i nyidrë, ke angatre lai a kepe Iesu.’ (Mataio 18: 5) Haawe, nyipiewekë tro la itretre dreng a tui itre nekönatr, me tha pi mama.

Pine angatr isi pi ka tru, ma angatre jë a mekune ka hape, Iesu a wesitrë angatr. Ngo enehila, Ioane aposetolo a thuemacanyi Iesu la ketre ewekë ka hnyipi traqa. Öni angeic: “Hne huni hna öhne la ketre atr ka helëne la itre dremoni ngöne la ëje i nyipë, nge hne huni hna thele troa sewe angeic, ke tha ka ce xötrethenge nyipëti kö me eahun.”—Luka 9:49.

Ioane kö a mekune laka, itre aposetolo casi hi la ka ijije troa aloinyi atr maine helë dremoni? Maine eje hi, hnauëne la kola atreine helë dremoni hnene la atre Iudra? Ioane a mekune laka, tha ijije kö tro la atre cili a kuca la itre huliwa nyine hain, ke tha ka xötrethenge Iesu kö me itre aposetolo.

Ngo sesëkötre pi kö Ioane la aqane sa i Iesu, öni nyidrë: “The sewe angeice kö, ke pëkö atr ka atreine kuca la itre huliwa ka hetre menen ngöne la ëjeng, nge ase jë hi, kola ha qaja angazo ni. Ke e tha ka icilekeu kö me easë la atr, ce angeice lai me easë. Nge ame la atr thue ime nyipunie tim pine laka, ce nyipunie me Keriso, eni a qaja hnyawa koi nyipunie laka, tha tro kö a thapa qaathei angeic la thupen.”—Mareko 9:39-41.

Ngöne la ijine cili, tha nyipiewekë kö tro la atr a xötrethenge Iesu matre nyixöle i nyidrë. Eje hi, tha hna eköthe pala kö la ekalesia, matre maine nyipici ka hape, tha angeice kö a xötrethenge Iesu, ngo tha kolo kö a hape, angeic a icilekeu me nyidrë, maine tro fë hmi ka thoi. Ngo itre trengewekë i Iesu pe a amamane laka, ka lapaun angeic ngöne la ëje i Iesu, nge tha tro kö a patre la thupe i angeic.

Ngo eje hi laka, tha nyine wangacone kö e tro la atre cili a kei pine la itre trengewekë me aqane ujë ne la itre aposetolo, ke öni Iesu: “Ame la atre akeine la ketre ka co nge ka lapaune koi ni, loi e troa athipe ngöne la nyinawa i angeic la ketre ietë ka tru nyine amudron hna hule hnei boliko, nge troa kuië angeice fë e kuhu hnagejë.” (Mareko 9:42) Thupene lai, Iesu a qaja jë ka hape, loi e tro angatr a thupatrije la itre ewekë ka nyipiewekë tune la wanakoim, me waca, maine alamek e kola akeinyi angatr. Ke loi ju kö troa patre la itre ewekë ka tru cili, me lö kowe la Baselaia i Akötresie, hune la troa lapa fë me kuiën kowe la Gena (Hnathup e Hinom). Öhne hë itre aposetolo la götrane cili ke tha nanyi kö qa Ierusalema. Nge hna dreuthetrij e cili la itre salite, matre tha jole kö koi angatr troa trotrohnine laka, kola nyihatren la ewekë hna apatrene paluan.

 Iesu a hmekëne hmaca ka hape: “Wange pala kö, the wangacone kö la ketre atr ka tune la nekönatr, ke eni a qaja hnyawa koi nyipunie laka, itre angela i angatr pala hi a iqëmekekeu me Kaka e hnengödrai.” Nemene la aqane goeëne la Keme i Iesu la itre “atr ka tune la nekönatr”? Iesu a sa me qaja la ketre atr ka 100 lao mamoe, nge patre hë la ketre. Hnene la atr hna pane nue la ala 99 troa thele la ka patr. Nge ame hë la angeic a öhn, angeic a madri nyën hune la 99. Matre öni Iesu jë hi: “Ketre tune mina fe, tha aja i Kakati kö e hnengödrai troa paatre la ketre ka co celë.”—Mataio 18:10, 14.

Maine jë, Iesu hë a mekune lo itretre dreng a isi pi ka tru, matre öni nyidrë: “Sootrëne pi la mele i nyipunie, nge catre pi mele tingetinge me itre xan.” (Mareko 9:50) Eje hi, sootr a ahnyapane la xen, matre tune fe, ame la itre trengewekë hna sootrën, tre itre trengewekë ka hmaloi troa kapa, nge ka akökötrene la tingeting. Ngo tha ceitu kö me iwesitrë.—Kolose 4:6.

Ngo eje hi laka, tro fe a traqa la itre jol, matre Iesu a qaja jë la aqane tro angatr a sei jol. Öni nyidrë: “Maine tro la ketre trejin a kuca la ketre ewekë ka ngazo, tro jë koi angeic, nge ce ithanatane jë epon. Nge maine tro angeic a drei eö, haawe, mele hë lai trejine hnei eö.” Ngo nemene ju hë e tha drenge kö? Öni Iesu: “Ce tro jë memine la ala cas, maine lue xan, ke tro ha eje la nöjei ewekë hnene la hna anyipicin hnei ala lue maine ala kön.” Ngo e jole pala ha, tro ha ithanata kowe la “ekalesia,” ene la itre qatre thup ka macaj göi troa axecië mekun. Ngo nemene ju hë e xele pala kö la atre ka kuca la ngazo? Öni Iesu: “Xomi angeice jë ceitu me atre ne fen, maine ketre atre hle mani,” itre atre lai hna xele ma wang hnei angetre Iudra.—Mataio 18:15-17.

Nyipiewekë tro la itre atre thup hnine la ekalesia a fedre kowe la Trengewekë i Akötresie. Matre e öhne hë angatr ka hape, hetre zö ne la atre kuca la ngazo, nge nyipiewekë troa ameköti angeic, ase hë ‘acatrene’ la hnei angatr hna amekötin e hnengödrai. Ngo e öhne hi angatr ka hape, pëkö engazo i ketre, “hna senge fe hë lai e hnengödrai.” Itre hna amekötine lai ka troa xatuane la ekalesia hna troa eköth. Nge e troa axeciëne la itre mekune ka tru cili, öni Iesu: “Ame la kola icasikeu ngöne la ëjeng hnene la ala lu, maine ala kön, eni fe hi lai e nyipi angatr.”—Mataio 18:18-20.