Se qai vakamacalataka oti ga o Jisu na rai me tiko vei ratou na nona imuri. E dodonu me ratou vaka na gonelailai, me ratou yalomalumalumu se kua ni vaqara rogo. Ke ratou ‘vakacegui ira era vaka na gonelailai ena yaca i Jisu, sa ratou vakacegui Karisito tale ga.’—Maciu 18:5.

Ratou veibataka ena dua na gauna sa oti na yapositolo o cei e levu duadua, eratou rairai nanuma gona ni veivunauci na vosa i Jisu. E cavuta sara na yapositolo o Joni e dua na ituvaki se qai yaco ga: “Keitou raica e dua na tagane ni vakasavi ira voli na timoni ena yacamuni, keitou via tarovi koya ni sega ni dau tomani kedatou.”—Luke 9:49.

Vakacava a nanuma o Joni ni vakadonui ga me ratou veivakabulai na yapositolo se vakasavi ira na timoni? Ke dina qori, e rawa vakacava ni vakasava na timoni na tagane e Jiu? De dua a nanuma o Joni ni sega ni dodonu me cakamana na tagane qori ni sega ni dau muri Jisu kei ratou na yapositolo.

E kurabui o Joni ni tukuna o Jisu: “Dou kua ni saga mo dou tarovi koya, ni sega ni dua ena cakamana oti ga ena yacaqu me na qai vakasewasewani au tale. Ni nodatou ito o koya e sega ni saqati kedatou. Au tukuna vakadodonu vei kemudou, ena vakaicovitaki dina ga o koya e solia vei kemudou e dua na bilo wai mo dou gunuva ni dou itokani i Karisito.”—Marika 9:39-41.

E sega ni vinakati me salavata sara kei Jisu na tagane qo me qai nona ito. E se bera tale ga ni tauyavu na ivavakoso vaKarisito, ke sega gona ni tomani Jisu, sega ni kena ibalebale ya ni dau veitusaqati o koya se tokona na lotu lasu. E vakabauti Jisu na tagane qo, qai laurai ena ka e tukuna o Jisu ni na vakaicovitaki.

Ena yasana adua, e sega ni vinaka ke tarabe na tagane ena ka ratou tukuna se cakava na yapositolo! E kaya o Jisu: “O koya e vakatarabetaka e dua vei ira na lalai qo e vakabauti au, e vinaka cake me vesu i domona e dua na vatuniqaqaqi levu e dau dreta na asa, me qai kolotaki i wasawasa.” (Marika 9:42) E tukuna o Jisu ni dodonu me ratou muduka laivi na nona imuri na tikiniyago talei mada ga me vaka na liga, yava, se mata ke vakatarabetaki ratou. E vinaka cake me yali e dua na ka talei va qori qai curu ina Matanitu ni Kalou, me kua ga ni vakamareqeta tiko qai kolotaki i Qiena (Buca o Inomi). Eratou sa rairai raica na buca qori volekati Jerusalemi na yapositolo, e dau kama kina na benu. Ratou na kila gona ni dusia tiko ya na rusa tawamudu.

E veivakasalataki tale ga o Jisu: “Dou kua gona ni beca e dua vei ira na lalai qo, au tukuna vei kemudou ni nodra agilosi mai lomalagi era dau tu ga ena mata i Tamaqu.” Vakacava era talei vei Tamana na “lalai” qori? E vakamacalataka sara o Jisu e dua na tagane e 100 na nona sipi qai yali  e dua. E biuti ira tu na 99 me lai vaqara na dua e yali. Ni sa kunea, ena levu cake nona marautaka na dua qori mai na 99 era sega ni yali. E tomana o Jisu: “E sega tale ga ni taleitaka na Tamaqu mai lomalagi me rusa e dua vei ira na lalai qo.”—Maciu 18:10, 14.

De dua ni vakasamataka tiko o Jisu nodratou veiletitaka nona yapositolo se o cei e levu duadua, e uqeti ratou kina: “Mo dou vakamasimataki kemudou, dou veiyaloni tiko ga.” (Marika 9:50) E dau vakamasima na kakana me taleitaki kina. Ni vakamasima vakaivakatakarakara na nona vosa e dua, ena ciqomi rawarawa qai vakilai tiko ga na veiyaloni. Qori e sega ni cakava rawa na veiba.—Kolosa 4:6.

Ena so na gauna eda na veileqaleqati kei ira eso tale, qai vakamacalataka o Jisu na ka meda cakava ena ituvaki va qori: “Ke valavala ca e dua na tacimu, lai vakaraitaka vua nona cala ni drau tiko taurua. Ke rogoci iko, o sa vakabula na tacimu.” Vakacava ke sega ni vakarorogo? E veivakasalataki o Jisu: “Kauta e dua se rua tale, me rawa ni vakadeitaki na ka kece ena itukutuku ni le rua se tolu na ivakadinadina.” Ke sega ni walia qori na leqa, me tukuni “ina ivavakoso,” oya vei ira na qase ni ivavakoso mera qai vakatulewa kina. Vakacava ke sega tiko ga ni vakarorogo o koya e valavala ca? “Me okati o koya me vaka e dua mai na veimatanitu, se daukumuni ivakacavacava,” era sega ni dau veimaliwai kei ira va qori na Jiu.—Maciu 18:15-17.

Bibi mera muria na ivakatawa na Vosa ni Kalou. Ke ra vakatulewataka ni cala dina e dua qai gadrevi me vunauci, nodra vakatulewa qori ‘sa na vauci oti mai lomalagi.’ Ia sa na “sereki oti mai lomalagi” ke ra vakatulewataka ni sega ni cala. Ena yaga sara na idusidusi qori ni sa tauyavu na ivavakoso vaKarisito. Ni vinakati me vakayacori eso na vakatulewa bibi, e kaya o Jisu: “Na vanua e soqoni kina e le rua se tolu ena yacaqu, au na tiko ena kedratou maliwa.”—Maciu 18:18-20.